Content de lai

Malawm Ni Hpe Lai U

 DAW 54

Yona Hpe Yehowa Myit Galu Wa

Yona Hpe Yehowa Myit Galu Wa

Asuri masha ni nga ai Ninewe mare na masha ni gaw grai n hkru n kaja ma ai. Yehowa gaw shi a myihtoi Yona hpe Ninewe de sa shangun nna, dai mare hta nga ai masha ni myit galai shai wa na matu sa sadi jaw shangun ai. Raitim, Yona gaw Tarshi mung de sa na sanghpaw li jawn nna, kaga lam de hprawng mat ai.

Sanghpaw li gaw panglai de du ai shaloi, nbung laru kaba ru wa ai majaw, sanghpaw la ni gaw grai hkrit kajawng ma ai. Dai majaw, shanhte gaw shanhte a hpara ni hpe akyu hpyi nna ndai hku san ma ai: ‘Hpa majaw ndai hku byin a ta?’ Hpang jahtum, Yona gaw shanhte hpe ndai hku tsun ai: ‘Nye mara she re. Yehowa galaw shangun ai hpe n galaw nna, ngai hprawng wa ai majaw re. Ngai hpe panglai de jahkrat dat yang, nbung laru zim mat na re.’ Sanghpaw la ni gaw shi hpe dai hku n kam galaw ai. Raitim, Yona gaw atik anang hpyi shawn ai. Shanhte shi hpe panglai de jahkrat kau ai hte kalang ta, nbung laru zim mat ai.

Yona gaw shi si na sai ngu shadu da ai. Raitim, shi panglai kata de angwi ngwi lup nga ai laman, Yehowa kaw shi akyu hpyi ai. Dai majaw, Yehowa gaw grai kaba ai nga kaba langai hpe shangun dat ai. Dai nga kaba gaw Yona hpe n kawa sha ai sha, mayu sha mayu kau ai. Nga a kan kata hta, Yona ndai hku akyu hpyi ai: ‘Na a ga hpe galoi mung madat mara na nga nna ngai ga sadi jaw nngai law.’ Yehowa gaw Yona hpe nga kaba a kan hta 3 ya nga shangun nna, dai hpang kawng ntsa de madawn dat shangun ai.

Yehowa gaw Yona hpe hkye la wa ai majaw, Ninewe mare de shi sa n ra sai kun? N re ai. Dai shara de sa na matu Yona hpe Yehowa kalang bai tsun ai. Ndai  kalang hta gaw, Yona madat mara wa ai. Yona gaw Ninewe mare de sa nna, n hkru ai masha ni hpe ndai hku sa tsun ai: ‘Nhtoi 40 ya na jang, Ninewe mare gaw hten mat na re.’ Mau hpa gaw, Ninewe masha ni myit galai shai wa ai. Ninewe hkawhkam mung shi a mung masha ni hpe ndai hku tsun ai: ‘Karai Kasang hpe shaga nna myit malai lu mu. Rai yang, shi anhte hpe n jahten yang n jahten na re.’ Masha ni myit malai lu ai hpe Yehowa mu ai shaloi, Ninewe mare hpe n jahten sai.

Dai mare hpe n jahten kau ai majaw Yona grai masin pawt ai. Myit yu ga. Yehowa gaw Yona hpe myit galu nna matsan dum myit madun wa ai. Raitim, Yona gaw Ninewe mare masha ni a ntsa matsan dum ai myit n nga ai. Shi gaw mare shinggan de pru nna, tauba si hpun npu kaw myiman mup mup hte sa dung taw nga ai. Dai aten hta, tauba hpun si mat ai majaw Yona bai pawt wa ai. Dai shaloi, Yehowa gaw shi hpe ndai hku tsun ai: ‘Nang gaw ndai hpun a majaw myit n pyaw nga ai kun? Rai yang, Ninewe kaw nga ai masha ni a matu ngai grau nna myit n pyaw ging ai n re i? Ngai gaw shanhte hpe matsan dum ai majaw, n jahten kau ai.’ Ndai kaw nna hpa sharin la lu ai kun? Ninewe mare masha ni gaw hpun hta na grau manu dan ai.

“Yawng mayawng myit kayin wa nna, kadai rai ti mung, hten bya ai n hkrum mu ga, shi ra nga ai majaw, shi [Yehowa] nanhte hpe myit galu kaba madun nga ai.”​​​​​​​​​​​—⁠⁠⁠⁠⁠⁠⁠⁠⁠⁠⁠2 Petru 3:9