Content de lai

Malawm Ni Hpe Lai U

 DAW 56

Karai Kasang A Tara Hpe Tsawra Hkungga Ai Yoshia

Karai Kasang A Tara Hpe Tsawra Hkungga Ai Yoshia

Yoshia gaw asak 8 ning hta, Yuda mung a hkawhkam byin wa ai. Dai aten hta, mung masha ni gaw nat hpaji ni hte seng ai lam ni hpe hkan galaw nna, gawng ngu sumla ni hpe nawku nga ma ai. Yoshia asak 16 ning hta, Yehowa hpe teng man ai hku, gara hku nawku lu na lam hpe shakut nna hkaja ai. Shi asak 20 ning du ai shaloi, mung ting hta nga ai gawng ngu sumla ni hte tawn hkungri ni hpe jahten kau ai. Asak 26 ning du yang, Yehowa a nawku htingnu hpe gram lajang na matu lajang wa ai.

Hkinjawng agyi Hilkia gaw nawku htingnu hta Yehowa a Tara laika katsu hpe mu wa ai. Dai katsu gaw, Mawshe ka wa ai laika katsu mai byin ai. Hkawhkam wa a amu madu Shahpan gaw laika katsu hpe Yoshia hpang la sa wa nna, nsen ja ja hte hti dan ai. Yoshia gaw madat ngut ai hpang, mung masha ni gaw Yehowa hpe shaning law law madat mara lam n nga wa ai hpe chye mat ai. Hkawhkam Yoshia gaw Hilkia hpe ndai hku tsun ai: ‘Yehowa gaw anhte hpe grai masin pawt na re. Shi hpe sa san su. Anhte hpa galaw ra na hpe tsun dan na re.’ Yehowa gaw num myihtoi Hulda hku nna ndai hku mahtai jaw wa ai: ‘Yuda masha ni gaw ngai hpe kau da sai. Shanhte hpe ngai ari jaw na re. Raitim, Yoshia uphkang nga ai laman gaw n re. Hpa majaw nga yang, shi gaw shagrit shanem ai majaw re.’

Dai lam hpe Hkawhkam Yoshia na yang, nawku htingnu de sa nna Yuda masha ni hpe zup hpawng na matu shaga dat ai. Dai hpang, Yehowa a Tara hpe, mung masha yawng na hkra nsen ja ja hte shi hti dan ai. Yoshia hte masha ni gaw Yehowa hpe myit kraw lawang mahkra hte madat mara na nga nna ga sadi jaw ma ai.

 Yuda mung hta Shalai Wa Ai Poi n galaw ai shaning ni grai na sai. Raitim, Shalai Wa Ai Poi hpe shaning shagu galaw ra ai lam, Yoshia gaw Tara Laika hti ai shaloi chye mat ai. Dai majaw, mung masha ni hpe shi ndai hku tsun ai: ‘Yehowa a matu Shalai Wa Ai Poi galaw ga.’ Dai hpang, shi gaw shagu hkungga law law hpe hkyen lajang ai. Nawku htingnu hta mahkawn hkawn na matu masha ni hpe mung mahkawng ya ai. Dai hpang, Yuda masha ni gaw Shalai Wa Ai Poi galaw ma ai. Dai poi ngut ai hte kalang ta, Matsi N Rawng Ai Muk Sha Ai Poi hpe sanit ya tup galaw ma ai. Dai zawn Shalai Wa Ai Poi hpe Samuela prat hta hpang jahtum galaw wa ai re. Yoshia gaw Karai Kasang a Tara hpe teng sha tsawra hkungga ai wa re. Nang mung Yehowa a lam sharin la lu ai majaw kabu ai kun?

“Na a mungga nye a lagaw a pyengdin hte, Nye a hkrun lam a nhtoi rai nga ai.”​​​​​​​​​​​—⁠⁠⁠⁠⁠⁠⁠⁠⁠⁠⁠Shakawn 119:105