Content de lai

Malawm Ni Hpe Lai U

 DAW 48

Gaida Jan A Shadang Sha Asak Bai Hkrung Wa

Gaida Jan A Shadang Sha Asak Bai Hkrung Wa

Jan gri ai aten laman, Yehowa gaw Elia hpe ndai hku tsun ai: ‘Zarephta mare de sa su. Dai kaw nga ai gaida jan gaw, nang hpe lusha jaw sha na re.’ Mare chyinghka kaw du yang, Elia gaw hpun hta nga ai matsan ai gaida jan hpe mu ai. Elia gaw hka gawm mi jaw lu na matu gaida jan hpe hpyi dat ai. Hka sa la na matu shi sa ai shaloi, Elia gaw ndai hku bai tsun dat ai: ‘Chyeju hte ngai na matu muk hkyep mi mung la sa wa ya rit.’ Gaida jan ndai hku bai tsun ai: ‘Ngai hta, nang hpe jaw sha na muk n nga ai. Ngai hte nye kasha sha na matu daram sha, muk shadung hte sau kachyi mi sha nga ai.’ Elia gaw shi hpe ndai hku tsun ai: ‘Nang ngai hpe muk jaw yang, na a muk shadung hte sau gaw marang n htu ding yang, galoi mung ma na n re nga nna Yehowa ga sadi jaw ai.’

Dai majaw, gaida jan mung nta wa nna Yehowa a myihtoi na matu muk sa kabaw ai. Yehowa ga sadi jaw da ai hte maren, jan gri nga ai laman, gaida jan hte shi a shadang sha hta shahpa galoi mung nga ai. Dibu na muk shadung hte dibu na sau mung ma mat ai lam n nga ai.

Dai hpang, grai yawn hpa lam byin wa ai. Gaida jan a shadang sha gaw grai machyi nna si mat ai. Shi gaw Elia hpe karum hpyi ai. Elia gaw gaida  jan a lata na la kasha hpe pawn la nna, nta ntsa na gawk de lung mat wa ai. Ma hpe yup ra kaw mara dat nna shi ndai hku akyu hpyi ai: ‘Yehowa e, chyeju hte ndai ma a asak hpe bai jahkrung ya rit.’ Yehowa gaw dai akyu hpyi ga hku galaw ya na nga yang, mau hpa lam re. Hpa majaw nga yang, si mat ai ni asak bai hkrung wa ai lam shawng hta n nga ga shi ai majaw re. Gaida jan hte shi a shadang sha mung Israela amyu masha n re.

Dai ma kasha gaw asak bai hkrung wa nna, nsa bai sa wa ai. Elia gaw gaida jan hpe ndai hku tsun ai: ‘Yu u! Na kasha asak bai hkrung wa sai.’ Shi gaw grai kabu nna Elia hpe ndai hku tsun ai: ‘Nang gaw Karai Kasang a masha teng sha rai nga ai. Hpa majaw nga yang, nang gaw Yehowa tsun shangun ai hpe sha tsun nna, dai lam ni mung teng sha byin wa ai.’

“U hka ni n gat n hkai, n dan n shu ma ai hpe, myit yu mu: dai ni gaw mam dum hte sutdek n lu ma ai: rai ti mung Karai Kasang gaw dai ni hpe shahpa jaw da nga mu ai: nanhte gaw u ni hta gade grau hpu nga myit ta!”​​​​​​​​​​​​—⁠⁠⁠⁠⁠⁠⁠⁠⁠⁠⁠⁠Luka 12:24