Content de lai

Malawm Ni Hpe Lai U

 DAW 44

Yehowa A Matu Nawku Htingnu

Yehowa A Matu Nawku Htingnu

Shawlumon gaw Israela hkawhkam byin wa ai hpang, Yehowa shi hpe ndai hku tsun ai: ‘Ngai kaw nna nang hpa hpyi shawn mayu ai kun?’ Shawlumon ndai hku bai tsun ai: ‘Ngai asak naw kaji ai majaw, hpa galaw ra na hpe n chye ai. Na a masha ni hpe atsawm uphkang lu na matu chyeju hte ngai hpe hpaji byeng ya jaw rit.’ Yehowa ndai hku bai tsun ai: ‘Nang ngai hpe hpaji byeng ya hpyi ai majaw, mungkan ting hta hpaji rawng dik htum masha byin hkra, ngai nang hpe shaman chyeju jaw na. Grai lusu hkra mung galaw ya na. Nang nye a ga madat mara na nga yang, asak galu na re.’

Shawlumon gaw nawku htingnu hpe nnan gawgap hpang wa ai. Kaja htum aja, gumhpraw, hpun hte manu hpu ai nlung ni hte gawgap ai. Bungli hta grai byin ai hkying hku law ai anum, ala ni hte nawku htingnu hpe gawgap ai. Sanit ning na ai hpang, nawku htingnu hpe Yehowa hpang ap nawng na matu jin jin rai nga sai. Nawku htingnu hta tawn hkungri nga nna, dai hta hkungga nat nawng ai. Shawlumon gaw tawn hkungri shawng hta hput di di nna, Yehowa hpang ndai hku akyu hpyi ai: ‘Yehowa e, ndai nawku htingnu gaw nang shanu nga na daram n kaba ai. Raitim, anhte nawku ai hpe hkap la nna akyu hpyi ga hpe madat ya rit.’ Yehowa gaw, nawku htingnu hte Shawlumon a akyu hpyi ga hpe gara hku mu mada ai kun? Shawlumon akyu hpyi ngut ai hte kalang ta, Yehowa gaw lamu kaw nna wan jahkrat let, tawn hkungri ntsa kaw nna wan nat hkungga hpe nat kau ya ai. Dai lam hku nna Yehowa gaw nawku htingnu hpe ra sharawng ai lam madun wa ai. Dai hpe Israela ni mu ai shaloi, grai kabu ma ai.

Hkawhkam Shawlumon hpaji byeng ya rawng ai hpe Israela mung ting sha n-ga, grai tsan ai kaga mungdan ni kaw na masha ni pyi chye ma ai. Masha ni gaw shanhte a manghkang ni hpe hparan ya na matu, Shawlumon hpang sa ma ai. Sheba hkawhkam jan mung grai yak ai ga san ni san nna, shi hpe hpaji sa chyam ai. Shawlumon a mahtai ni hpe na yang, shi ndai hku tsun ai: ‘Na a lam masha ni tsun ai shaloi, ngai n kam ai. Ya, ngai nang hpe mu yang, nang gaw shanhte tsun ai hta grau hpaji rawng ai hpe ngai chye sai. Na a Karai Kasang Yehowa nang hpe shaman chyeju jaw da ai re.’ Israela ni a prat gaw ngwi pyaw simsa nga ai. Raitim, masa ni gaw galai shai hkyen sai.

“Yu mu ndai yang e, Shawlumon hta grau kaba ai wa nga nga ai.”​​​​​​​​​​​​—⁠⁠⁠⁠⁠⁠⁠⁠⁠⁠⁠⁠Mahte 12:42