Content de lai

Malawm Ni Hpe Lai U

 DAW 43

Hkawhkam Dawi Galaw Ai Yubak Mara

Hkawhkam Dawi Galaw Ai Yubak Mara

Shawlu si ai hpang, Dawi gaw hkawhkam byin wa ai. Asak 30 hta hkaw dung hpang ai. Hkawhkam byin ai shaning loi mi na ai hpang, Dawi gaw mara kaba langai galaw hkrup ai. Lana mi hta, Dawi gaw shi a hkawhkam htingnu ntsa kaw nna, grai tsawm ai anum langai hpe mu dat ai. Shi a amying gaw Batsheba re. Shi gaw hpyen la Uria a madu jan re ai hpe sagawn yu yang chye dat ai. Dawi gaw Batsheba hpe shi a hkawhkam htingnu de shaga dat ai. Shan lahkawng arau yup nna, Batsheba hta ma hkum kap wa ai. Dawi gaw shi galaw ai mara hpe makoi magap na matu shakut ai. Dawi gaw shi a hpyen du hpang de, Uria hpe majan pa shawng de dat dat nna, langai sha ngam da na matu laika ka dat ai. Uria majan pa hta si mat ai. Dai hpang, Dawi gaw Batsheba hpe hkungran la ai.

Raitim, Yehowa gaw byin wa ai n kaja ai lam yawng hpe mu ai. Shi hpa galaw na kun? Yehowa gaw shi a myihtoi Nahtan hpe, Dawi hpang shangun dat ai. Nahtan ndai hku tsun ai: ‘Grai lusu ai masha langai hta, sagu ni grai law hkra nga ai. Grai matsan ai masha langai hta gaw, sagu kasha langai sha nga nna, shi gaw dai sagu hpe grai tsawra ai. Sahti wa gaw, matsan ai wa a sagu kasha hpe la kau ya ai.’ Dawi grai pawt nna ndai hku tsun ai: ‘Dai sahti wa gaw si ging ai wa re!’ Dai shaloi, Nahtan gaw Dawi hpe ndai hku tsun ai: ‘Dai sahti wa gaw nang mahtang re!’ Dawi gaw grai yawn mat nna: ‘Yehowa hpe ngai mara galaw hkrup sai’ nga nna Nahtan kaw shi a mara hpe yin la wa ai. Dai mara a majaw, Dawi hte shi a dinghku hta manghkang ni grai law hkra hkrum wa ai. Yehowa gaw Dawi hpe ari jaw tim, si dam gaw n jaw ai. Hpa majaw nga yang, shi gaw myit dingman nna, shagrit shanem ai majaw re.

Dawi gaw Yehowa a matu nawku htingnu gawgap mayu ai. Raitim, Yehowa gaw Dawi a kasha Shawlumon hpe sha gawgap shangun ai. Dawi gaw nawku htingnu hpe Shawlumon gawgap lu na matu arung arai ni hkyen lajang  ya nna ndai hku tsun ai: ‘Yehowa a nawku htingnu gaw hpung shingkang nga nna hkik hkam ra ai. Shawlumon gaw naw kaji ai. Raitim, shi gawgap ai shaloi lang na matu, arai ni yawng hpe ngai hkyen lajang da ya na.’ Dawi gaw gawgap bungli a matu shi a gumhpraw law law hpe alu bang ai. Bungli hta grai byin ai ni hpe hkan tam ai. Aja, gumhpraw hte Turu hte Sidon mare kaw nna arit hpun ni hpe mung shi mahkawng da ya ai. Dawi asak grai kaba wa ai shaloi, Shawlumon hpe nawku htingnu gawgap na matu, nawku htingnu hkrang sumla jaw ai. Shi ndai hku tsun ai: ‘Ndai ni gaw nang na matu, Yehowa ngai hpe matsun da ai lam ni re. Yehowa nang hpe karum ya na re. Hkum hkrit yaw. Nden marai rawng nna gawgap u.’

“Tinang mara ip da ai wa gaw gan ga lu na, n rai; Mara tawngban nna koi kau ai wa chyawm gaw, n-gaw nwai ai hkam Ia na ra ai.”​​​​​​​​​​​​—⁠⁠⁠⁠⁠⁠⁠⁠⁠⁠⁠⁠Ga Shagawp 28:13