Content de lai

Malawm Ni Hpe Lai U

 DAW 40

Dawi Hte Goliat

Dawi Hte Goliat

Yehowa gaw Samuela hpe ndai hku tsun ai: ‘Yese a nta de sa su. Shi a shadang sha ni kaw nna langai gaw, hpang lung na Israela hkawhkam byin wa na.’ Dai majaw, Samuela gaw Yese a nta de sa mat ai. Shi gaw Yese a kasha alat hpe mu ai shaloi, ndai hku myit ai: ‘Ndai wa mahtang rai na re.’ Raitim, Yehowa gaw Samuela hpe dai wa n re ngu tsun ai. Yehowa ndai hku tsun ai: ‘Ngai gaw masha langai a ntsa lam hpe n re ai sha, shi a myit masin kata hta hpa rawng ai hpe sha yu ai.’

Yese gaw shi a kaga shadang sha marai kru hpe Samuela hpang bai shaga sa wa ai. Samuela ndai hku tsun ai: ‘Yehowa gaw shanhte kaw nna kadai hpe mung n lata ai. Nang hta kaga shadang sha naw nga ai kun?’ Yese ndai hku tsun ai: ‘Ngai hta Dawi ngu ai kaji htum shadang sha langai gaw naw nga ai. Shi gaw nye a sagu ni hpe rem taw nga ai.’ Dawi du wa ai shaloi, Yehowa gaw Samuela hpe ndai hku tsun ai: ‘Ngai lata ai wa gaw ndai wa mahtang re!’ Samuela gaw Dawi a baw ntsa sau ru jaw ai hku nna, hpang lung na Israela hkawhkam hku nna aya tang dat ai.

Shaning loi mi na ai hpang, Israela ni gaw masha numraw Goliat lawm ai Hpilisti masha ni hte majan byin ai. Goliat gaw shani shagu Israela ni hpe jahpoi asawng nga ai. Shi ndai hku marawn jahtau ai: ‘Ngai hte gasat gwi ai marai langai hpe shangun dat u. Lama na shi dang yang, anhte gaw nanhte a mayam galaw na. Raitim, ngai dang yang nanhte gaw anhte a mayam tai ra na re.’

Dawi gaw Israela hpyen dap kaw, hpyen la galaw nga ai shi kahpu ni hpang de, malu masha sa jaw ai. Goliat tsun ai ga hpe na yang, shi ndai hku tsun ai: ‘Ngai shi hte gasat na!’ Hkawhkam Shawlu gaw ndai hku tsun ai: ‘Nang gaw ma naw rai nga ai.’ Dawi ndai hku bai tsun ai: ‘Yehowa ngai hpe karum ya na re.’

 Shawlu gaw shi a hpri palawng hpun shangun yang, Dawi ndai hku tsun ai: ‘Ndai hpri palawng hte ngai n gasat ai.’ Dawi gaw lungdin bang nna kabai mai ai baw lakli hpe la nhtawm hka shi de sa mat ai. Shi gaw manem tsawm ai lungdin manga hpe lata nna, shi a nhpye kaw bang dat ai. Dai hpang, Goliat hpang kagat sa mat ai. Dai masha numraw gaw ndai hku marawn ai: ‘E ma kasha, sa wa rit! Na a shan hpe ntsa malen na u ni, nam na matse ai dusat dumyen ni hpe jaw sha kau na.’ Dawi gaw kachyi mi pyi n hkrit ai sha, ndai hku tsun ai: ‘Nang gaw ri nhtu hte ngai hpang de sa wa ai. Ngai chyawm gaw, Yehowa a amying ningsang hte nanhte hpang de sa wa ai. Nang gaw ngai hpe gasat nga ai n re. Karai Kasang hpe gasat nga ai re. Yehowa gaw ri nhtu ni hta grau nna, hpung atsam kaba ai hpe ndai kaw nga ai masha yawng chye lu na re. Shi gaw nanhte yawng hpe anhte a lata de ap ya na re.’

Dawi gaw lungdin langai hpe shi a lakli hta bang nna n-gun atsam mahkra hte kabai dat ai. Yehowa karum shingtau ya ai majaw, lungdin gaw Goliat a lahtan hpe hpawk di nna shang mat wa ai. Goliat gaw ga de kadawng si mat ai. Dai shaloi, Hpilisti ni gaw shanhte a asak lawt na matu kalang ta hprawng mat wa ai. Dawi zawn Yehowa hpe nang kamsham ai kun?

“Dai amu gaw masha n dang di lu timung, Karai Kasang gaw, n dang di lu ai n nga ai; kaning rai nme law, Karai Kasang gaw yawng mayawng hpe dang di lu ai.”​​​​​​​​​​​​—⁠⁠⁠⁠⁠⁠⁠⁠⁠⁠⁠⁠Marku 10:27