Content de lai

Malawm Ni Hpe Lai U

 DAW 36

Yephta A Ga Sadi

Yephta A Ga Sadi

Israela ni gaw Yehowa hpe kalang bai kau da nna, shut shai ai hpara ni hpe bai nawku wa ma ai. Israela ni hpe Amon masha ni sa gasat ai shaloi, dai hpara ni gaw shanhte hpe n lu karum ya ai. Israela ni gaw shaning law law, nni nhkri hkrum wa ai. Hpang jahtum shanhte gaw Yehowa hpe ndai hku tsun ma ai: ‘Anhte yubak galaw hkrup sai. Chyeju hte anhte hpe hpyen ni kaw nna hkye la ya rit.’ Israela ni gaw gawng ngu sumla ni hpe jahten kau nna Yehowa hpe bai nawku wa ma ai. Yehowa gaw shanhte jam jau nga ai hpe matut nna n lu yu sai.

Yephta ngu ai share ninghkrin gaw, Israela ni hpe woi awn nna Amon masha ni hpe gasat na matu lata hkrum ai. Shi gaw Yehowa hpe ndai hku tsun ai: ‘Lama na, anhte hpe ndai majan awng dang hkra karum ya yang, majan awng dang nna nta de bai wa ai shaloi, ngai hpe shawng nnan  hkap tau ai wa hpe jaw na, ngu ga sadi jaw ai.’ Yehowa gaw Yephta a akyu hpyi ga hpe madat ya nna, majan awng dang hkra karum ya ai.

Yephta nta de bai wa ai shaloi, shawng nnan hkap tau la ai wa gaw shi a kasha shingtai rai taw nga ai. Shi a kasha gaw shup sheng dum nna ka let pru wa ai. Yephta hpa galaw na kun? Shi a ga sadi hpe dum nna ndai hku tsun ai: ‘Nye sha e! Nye salum ga sai. Yehowa hpe ngai ga sadi jaw da sai. Dai ga sadi dung hkra, Shilo mare na nawku sum hta amu gun na matu, ngai nang hpe sa nan sa ra sai.’ Shi kasha ndai hku bai tsun ai: ‘Wa e, Yehowa hpe ga sadi jaw da yang, dai hte maren ga sadi dung u. Nye manang ni hte arau bum ntsa de shata lahkawng sa nga na matu ahkang jaw rit nga nna sha hpyi shawn mayu ai. Dai hpang ngai sa na.’ Yephta a kasha gaw prat tup nawku sum hta sadi dung let ap nawng wa ai. Shaning shagu, shi a manang ni gaw Shilo mare hta nga ai shi hpang sa chyai ma ai.

‘Kadai mung . . . ngai hpe tsaw ra ai hta, shayi shadang sha hpe grau nna tsaw ra ai wa gaw, ngai hte n ging n dan nga ai.’​​​​​​​​​​​​​—⁠⁠⁠⁠⁠⁠⁠⁠⁠⁠⁠⁠⁠Mahte 10:37