Content de lai

Malawm Ni Hpe Lai U

 DAW 34

Midian Masha Ni Hpe Gidon Awng Dang Wa

Midian Masha Ni Hpe Gidon Awng Dang Wa

Aten ni na wa ai hpang, Israela ni gaw Yehowa hte bai tsan gang wa nna, shut shai ai hpara ni hpe nawku hpang wa ma ai. Sanit ning tup, Midian masha ni gaw Israela ni a dusat ni hpe lagu la ai hte, nsi naisi ni hpe mung jahten kau ya ma ai. Midian ni a lata kaw nna lawt na matu, Israela ni gaw lung pu hku ni hte bum ga hkan makoi nga ra ai. Dai majaw, shanhte hpe hkye la na matu, Yehowa hpang hpyi shawn wa ai. Yehowa gaw Gidon ngu ai ala langai hpang de, lamu kasa langai shangun dat ai. Lamu kasa ndai hku tsun ai: ‘Yehowa gaw nang hpe share ninghkrin hku nna lata da sai.’ Gidon ndai hku bai tsun ai: ‘Israela ni hpe ngai gara hku hkye la lu na a ta? Ngai gaw hpa n re nngai.’

Gidon gaw Yehowa shi hpe lata ai lam gara hku nna chye lu na kun? Shi gaw sagu mun hpe ga hta hpyen tawn da nna, Yehowa hpe ndai hku tsun ai: ‘Jahpawt du yang sagu mun hta numri ni madi taw nga nna, aga gaw hkun hkraw nga yang Israela ni hpe hkye la na matu, ngai hpe lata ai lam chye lu na re.’ Hpang jahpawt hta, sagu mun gaw grai madi taw nga nna, aga gaw hkun hkraw nga ai. Raitim, Gidon gaw hpang jahpawt hta sagu mun gaw hkun hkraw nna, aga hpe madi ya na matu kalang bai tsun ai. Shi tsun ai hte maren byin wa ai hpe Gidon mu ai shaloi, Yehowa shi hpe lata da ai lam kam mat ai. Dai majaw, shi gaw Midian masha ni hte gasat na matu, hpyen la ni hpe mahkawng dat ai.

Yehowa gaw Gidon hpe ndai hku tsun ai: ‘Israela ni  hpe awng dang na ahkang ngai jaw na. Raitim, nang hta hpyen la ni grai law taw nga ai. Majan awng dang yang, tinang a atsam hte awng dang ai ngu shadu na re. Hkrit ai masha ni nga yang, nta de wa shangun u.’ Dai majaw, marai 22,000 gaw nta de wa mat nna, 10,000 sha ngam ai. Yehowa ndai hku bai tsun ai: ‘Ya mung hpyen la ni grai naw law nga ai. Shanhte hpe hka makau de woi sa nna hka lu shangun u. Hka lu ai shaloi, hpyen ni hpe maja nna yu nga ai ni hpe sha, nang hte rau ngam tawn da u.’ Marai 300 sha hka lu ai shaloi maja nga ai. Yehowa gaw ndai masha kachyi mi hte sha, Midian hpyen la 135,000 hpe gasat awng dang lu na re nga nna ga sadi jaw ai.

Dai shana hta Yehowa gaw Gidon hpe ndai hku tsun ai: ‘Ya gaw Midian ni hpe gasat na aten du sai!’ Gidon gaw shi a masha ni hpe pahtau hte wan rawng ai di bu kaba ni hpe jaw ai. Shi gaw shanhte hpe: ‘Ngai hpe yu nna, ngai galaw ai hte maren hkan galaw u’ nga nna tsun ai. Gidon gaw shi a pahtau dum nna, di bu hpe ga kau ai hte wan shadaw hpe kayin kawai dat ai. Dai hpang, ndai hku marawn jahtau dat ai: ‘Yehowa hte Gidon a nhtu!’ Shi a masha 300 mung dai hte maren hkan galaw ma ai. Midian masha ni mung hkrit kajawng ai hte, hkrup mara kagat hprawng mat ma ai. Dai hku kashuk kashak byin nga ai laman, shanhte langai hte langai gasat hpang ma ai. Yehowa gaw Israela ni shanhte a hpyen ni hpe awng dang hkra kalang bai karum ya wa sai.

‘Dai chyahtum chyalai re ai n-gun atsam gaw anhte kaw na n re ai sha, Karai Kasang kaw na pru nga ai.’​​​​​​​​​​​​​—⁠⁠⁠⁠⁠⁠⁠⁠⁠⁠⁠⁠⁠2 Korinhtu 4:7