Content de lai

Malawm Ni Hpe Lai U

 DAW 17

Mawshe Gaw Yehowa Hpe Nawku Na Matu Lata Wa

Mawshe Gaw Yehowa Hpe Nawku Na Matu Lata Wa

Egutu mung hta, Yaku a dinghku hpe Israela amyu masha ni ngu chye wa ma ai. Yaku hte Yosep si mat ai hpang, Hpara-u nnan langai up hkang wa ai. Shi gaw Egutu ni hta grau nna, Israela amyu sha ni n-gun atsam kaba wa na hpe hkrit tsang nga ai. Dai majaw ndai Hpara-u gaw Israela ni hpe mayam shatai kau ai. Hpara-u gaw shanhte hpe wut tawng ni galaw shangun nna hkauna pa ni hta mung grau shangun sha wa ai. Egutu ni amu grau galaw shangun magang, Israela amyu sha ni gaw grau law htam wa magang re. Dai hpe Hpara-u n ra ai majaw, Israela ni hta lasha shangai yang sat kau na matu matsun da ai. Israela ni kade daram hkrit tsang nga na hpe shingran yu u.

Israela num Yohkebe gaw, grai tsawm ai ma shangai wa ai. Dai ma hpe makawp maga ya na matu, ka tawng hta ma hpe bang nna Nila hkanu a tsingdu ni lapran hta sa makoi da ai. Ma a kana Miriam gaw hpa byin wa na hpe chye na matu, dai makau hta sa nga nga ai.

Hpara-u a shayi sha gaw hka shin na matu, hkanu de yu wa ai shaloi ka tawng hpe sa mu ai. Ka tawng  kata hta hkrap taw nga ai ma hpe shi mu nna, grai matsan dum mat ai. Miriam gaw: ‘Na a malai ma hpe yu lajang na num langai hpe ngai sa tam ra na kun?’ ngu san ai. Hpara-u a shayi sha gaw, mai sa, ngu tsun ai shaloi, Miriam gaw kanu majing Yohkebe hpe woi sa wa ai. Hpara-u a shayi sha gaw: ‘Ndai ma hpe nye a malai gawn lajang ya u. Ngai nang hpe gumhpraw jaw na’ ngu tsun ai.

Ma kaba wa ai shaloi, Yohkebe gaw Hpara-u a shayi sha hpang de woi sa ai. Hpara-u a shayi sha gaw Mawshe ngu shamying nna shi a ma majing hku bau la ai. Mawshe gaw hkawseng shadang hku kaba wa nna, shi ra ai yawng hpe lu mai ai. Raitim, Mawshe gaw Yehowa hpe galoi mung n malap ai. Shi gaw Egutu amyu n re ai sha Israela amyu re ai hpe chye ai. Yehowa hpe magam gun na matu mung shi lata wa ai.

Asak 40 ning du wa ai shaloi, shi a amyu sha ni hpe karum na matu Mawshe dawdan wa ai. Egutu masha langai gaw Israela mayam langai hpe adup nga ai hpe Mawshe mu ai. Dai shaloi, Egutu masha hpe shi bai kayat adup ai majaw si mat ai. Mawshe gaw dai wa hpe zaibru kata hta makoi da ai. Hpara-u gaw dai lam hpe chye mat ai shaloi, Mawshe hpe sat na matu shakut wa ai. Raitim, Mawshe gaw Midian mung de hprawng mat wa ai. Dai shara hta Yehowa gaw shi hpe makawp maga ya ai.

“Mawshe gaw . . . kam sham ai hte Hpara-u a shayi sha a kasha ngu na hpe ndang kau wu ai; . . . Karai Kasang a amyu masha ni hte rau tsin-yam tsindam hkrum na hpe shi grau ra nga ai.”​​​​​​​​​​​​​​​—⁠⁠⁠⁠⁠⁠⁠⁠⁠⁠⁠⁠⁠⁠⁠Hebre 11:24, 25