Content de lai

Malawm Ni Hpe Lai U

 DAW 18

Wan Grung Nga Ai Sum Wum

Wan Grung Nga Ai Sum Wum

Mawshe gaw Midian mung hta 40 ning nga wa sai. Shi gaw dinghku de nna kasha ni lu wa ai. Lani mi hta, Horeb bum makau kaw shi a sagu ni hpe rem nga ai shaloi, mauhpa lam langai hpe shi mu wa ai. Ju sum wum langai wan grung nga ai raitim, wan n hkru mat ai. Hpa byin ai hpe chye na matu Mawshe sa yu ai shaloi, sum wum kaw nna n sen pru wa ai: ‘Mawshe, shawng de hkum sit wa. Nang kabye ai lamu ga gaw chyoi pra ai majaw, na a hkyep din hpe raw kau u.’ Lamu kasa langai hpe akyu jashawn nna, Yehowa ga shaga ai re.

Mawshe gaw hkrit nna shi myi man hpe magap kau ai. Nsen gaw: ‘Israela amyu sha ni hkrum ai tsin-yam hpe ngai mu sai. Shanhte hpe Egutu mung kaw nna hkye la nna, kaja ai mung de ngai woi sa na. Nang gaw nye a amyu sha ni hpe Egutu mung kaw nna shapraw la na matu woi awn ra na re’ ngu tsun ai. Mawshe grai mau mat na re.

Mawshe ndai hku san ai: ‘Masha ni gaw nang hpe kadai shangun dat ai kun? ngu ngai hpe san yang, ngai gara hku htai na?’ Karai Kasang ndai hku bai tsun ai: ‘Abraham a Karai Kasang, Isak a Karai Kasang, Yaku a Karai Kasang re ai Yehowa shangun dat ai ngu shanhte hpe tsun u.’ Mawshe ndai hku bai san ai: ‘Lama na nye a ga shanhte n madat yang gaw gara hku kun?’ Shi karum ya na hpe Mawshe chye hkra Yehowa sakse madun dan ai. Daw hkrawng hpe ga de kabai dat na matu, Mawshe hpe tsun ai. Dai shaloi daw hkrawng gaw, lapu tai mat ai. Mawshe gaw lapu a nmai hpe magra dat ai shaloi, daw hkrawng bai byin mat ai. Yehowa ndai hku tsun ai: ‘Nang dai hku galaw dan yang, ngai nang hpe shangun dat ai lam sakse madun ai re.’

‘Ngai gaw aga hpe kaja ai hku n chye shaga ai’ ngu Mawshe tsun ai. Yehowa gaw shi hpe ndai hku ga sadi jaw ai: ‘Nang tsun ra na hpe ngai tsun dan na. Nang hpe karum na matu mung na kahpu Arun hpe ngai shangun dat na.’ Yehowa gaw shi hte arau re ai hpe Mawshe chye mat ai. Dai majaw, shi a madu jan, kasha ni hpe woi nna Egutu mung de sa wa ai.

“Kaning ngu nna, hpa hku tsun lu na hpe, myit hkum tsang myit: dai ahkying hta, hpa tsun mai na gaw, nanhte hpe shadum na ma rin dai:”​​​​​​​​​​​​​​​—⁠⁠⁠⁠⁠⁠⁠⁠⁠⁠⁠⁠⁠⁠⁠Mahte 10:19