Content de lai

Malawm Ni Hpe Lai U

 DAW 21

Shi Lang Na Ari Zinli

Shi Lang Na Ari Zinli

Nang hpe hpang kalang hkrum na matu, ngai shakut sana n re ngu nna Hpara-u hpe Mawshe tsun ai. Raitim, shi n pru wa shi yang Hpara-u hpe ndai hku tsun ai: ‘Shana yuptung hta, Egutu hta nga ai kasha alat ni yawng, Hpara-u a shadang sha kaw nna hkawt, mayam ni a shadang sha ni du hkra yawng si na ra ai.’

Yehowa gaw Israela ni hpe laksan lu sha ai lamang galaw na matu tsun ai. Shi ndai hku tsun ai: ‘Asak laning mi rai sai sagu, shing nrai bainam ala hpe sat nna asai nkau mi hpe nanhte a chyinghka hta chya u. Ashan hpe gaw ju nna matsi n lawm ai muk hte sha u. Kalang ta pru sa lu na matu, nanhte bu hpun nna hkyep din hpe mung din da u. Dai shana hta ngai nanhte hpe shalawt dat ya na.’ Israela ni kade daram myit kahpra taw nga na hpe shingran yu u.

Shana yuptung hta, Yehowa a lamu kasa gaw Egutu mung hta nga ai nta shagu kaw sa ai. Chyinghka hta sai n chya da ai nta kaw nna kasha alat gaw si mat ai. Raitim, sai chya da ai nta ni hpe gaw lamu kasa lai kau da ai. Lusu ai, matsan ai n ginhka ai sha Egutu dinghku shagu kaw nna kasha ni si mat ai. Raitim, Israela kasha langai mi mung n si ai.

Hpara-u a kasha pyi si mat ai. Hpara-u n lu sharang sai. Kalang ta Mawshe hte Arun hpe ndai hku tsun ai: ‘Pru mat u. Ndai shara kaw nna pru mat wa sanu. Nanhte a Karai Kasang hpe sa nawku sanu. Dusat ni hpe mung la mat wa u.’

 Shagawng shana hta, Israela ni gaw dinghku, amyu baw sang hku kahkyin gumdin let Egutu mung kaw nna pru wa ai. Dai hta Israela la ni hkrai 600,000 hte hpawn, num ni hte ma ni mung manu mana lawm ai. Kaga masha law law mung shanhte hte arau pru sa wa ai majaw, shanhte mung Yehowa hpe nawku lu ai. Hpang jahtum hta gaw Israela ni lawt lu sai!

Shanhte hpe Yehowa gara hku hkye la wa ai hpe dum na matu, shanhte gaw dai zawn laklai ai lu sha lamang hpe shaning shagu galaw ma ai. Dai lamang hpe Shalai Wa Ai Poi ngu shaga ai.

“Nang hta nye a atsam madun dan lu nna, ga ntsa ting e nye a amying gumhkawng wa u ga she, ngai nang hpe sharawt dat de ai.”​​​​​​​​​​​​​​​—⁠⁠⁠⁠⁠⁠⁠⁠⁠⁠⁠⁠⁠⁠⁠Roma 9:17