Content de lai

Malawm Ni Hpe Lai U

 DAW 13

Yaku Hte Esaw Simsa Hkra Galaw

Yaku Hte Esaw Simsa Hkra Galaw

Yehowa gaw Abraham hte Isak hpe makawp maga ya ai zawn, Yaku hpe mung makawp maga ya na ngu ga sadi jaw ai. Yaku gaw Haran ngu ai shara hta shanu nga ai. Dai hta dinghku de nna dinghku kaba byin wa ai. Grai lu su wa ai.

Yehowa gaw Yaku hpe: ‘Na a buga de bai wa sanu’ nga nna tsun ai. Dai majaw, Yaku hte shi a nta masha ni gaw hkrun lam galu hkawm sa ma ai. Hkrun lam hkawm nga ai shaloi, Yaku a mayam ni gaw shi kaw sa wa nna ndai hku tsun ai: ‘Na a kahpu Esaw gaw masha 400 hte rau sa wa nga ai.’ Yaku gaw shi hte shi a dinghku hpe Esaw hkra machyi hkra galaw na hpe hkrit tsang ai. Yehowa hpang shi akyu hpyi ai: ‘Chyeju hte ngai na kahpu a hpyen kaw na hkye la ya rit.’ Hpang shani hta, Yaku gaw Esaw hpang de sagu ni, bainam ni, dumsu ni, gaw-la-uk ni hte lawze ni hpe kumhpa shagun dat ai.

Dai shana hta, Yaku shi hkrai sha nga taw ai shaloi lamu kasa hpe mu dat ai. Lamu kasa gaw shi hpe shawng nnan kamu wa ai. Shan gaw jahpawt du hkra kamu hkat nga ma ai. Yaku gaw machyi tim, asum n jaw ai. Lamu kasa ndai hku tsun ai: ‘Ngai hpe dat dat sanu.’ Raitim, Yaku ndai hku tsun ai: ‘Ngai hpe shaman chyeju n jaw dingsa ngai n dat ai.’

Lamu kasa gaw hpang jahtum hta Yaku hpe shaman chyeju jaw dat ai. Dai majaw, Esaw gaw shi hpe hkra machyi hkra galaw na ahkang Yehowa n jaw na hpe Yaku chye mat ai.

Dai jahpawt hta, Yaku gaw tsan tsan de mada yu dat yang, Esaw hte shi a masha 400 hpe mu dat ai. Yaku gaw shi a dinghku masha ni hta  shawng, shi kahpu ba a man de sa nna, sanit lang gum dagup let hkung ga jaw ai. Esaw gaw Yaku hpang kagat sa nna ahpum dat ai. Shan nau lahkawng gaw myiprwi si ni mung hkrat nga ma ai. Shan nau simsa lam lu sai. Yaku simsa hkra galaw ai hte seng nna Yehowa gara hku hkamsha na kun?

Esaw gaw shi nta de bai wa mat ai. Yaku mung matut nna hkrun lam hkawm ai. Yaku hta shadang sha 12 nga ai. Shanhte a amying ni gaw Rubin, Simun, Lewi, Yuda, Dan, Naphtali, Gad, Asha, Yishahka, Zebulun, Yosep hte Ben-yamin re. Yehowa gaw Shi a amyu masha hpe hkye la na matu shanhte hta na Yosep hpe akyu jashawn wa ai. Gara hku nna kun? Yu yu ga.

“Nanhte a hpyen ni hpe tsaw ra mu; nanhte hpe zingri zingrat ai ni a matu mara akyu hpyi mu: shingrai yang gaw, sumsing lamu hta nga ai nanhte a Kawa a kashu kasha ni gaw, nanhte tai na marin dai.”​​​​​​​​​​​​​​​​—⁠⁠⁠⁠⁠⁠⁠⁠⁠⁠⁠⁠⁠⁠⁠⁠Mahte 5:44, 45