Content de lai

Malawm Ni Hpe Lai U

 DAW 102

Yawhan A Shingran

Yawhan A Shingran

Kasa Yawhan gaw Patmu zunlawng hta bawng dung hkrum nga ai shaloi, Yesu gaw htawm hpang hte seng nna shingran 16 hpe langai hpang langai jaw ai. Dai shingran ni gaw Yehowa a mying ningsang gara hku chyoi pra wa na lam, shi a Mungdan du wa na lam hte shi a yaw shada lam sumsing lamu hta hpring tsup wa ai zawn, mungkan ga hta mung hpring tsup wa na lam ni hpe madun dan ai.

Shingran langai hta, sumsing lamu kaw nga ai tingnyang hta Yehowa dung nga ai. Dai tingnyang hpe palawng ahpraw hpun da nna, aja janmau gup da ai salang 24 gaw wang da ai hpe Yawhan mu wa ai. Tingnyang kaw nna myihprap gala ai hpe mu nna, mu ngoi ai nsen hpe mung na ai. Salang 24 gaw Yehowa a man hta, gum dagup let nawku daw jau nga ma ai. Hpang na shingran langai hta, Yehowa hpe nawku daw jau nga ai mungdan shagu hte amyu baw lakung shagu hta na masha wunawng wuwa hpe Yawhan mu ai. Sagu Kasha re ai Yesu gaw, shanhte hpe yu lanu lahku ya nna, asak hka hpawk de du hkra lam woi ya ai. Kaga shingran langai hta, Yesu gaw sumsing lamu hta Hkawhkam hku hkaw dung hpang nna, salang 24 hte arau uphkang nga ai. Dai hpang mu ai shingran hta, Yesu gaw baren numraw re ai Satan hte shi hpang hkan ai nat ni hpe, gasat nga ai majan langai Yawhan mu wa ai. Yesu gaw shanhte hpe sumsing lamu kaw nna, mungkan ga de jahkrat kau dat ai.

 Dai hpang, Yawhan gaw grai tsawm ai shingran langai hpe mu ai. Sagu kasha gaw, lata la hkrum ai 144,000 hte arau Sumsing Lamu Ziun Bum hta tsap nga ai hpe mu ai. Mungkan ga ntsa pyen nga ai lamu kasa hpe mung mu ai. Karai Kasang hpe hkrit hkungga na matu hte Shi a hpung shingkang hpe shagrau na matu, shinggyim masha ni hpe dai lamu kasa tsun shana nga ai.

Hpang na shingran hta, Hara Magedon majan byin nga ai hpe mu ai. Dai majan hta, Yesu hte shi a hpyen dap gaw Satan hte shi a nhkru ai lam yawng hpe gasat awng dang lu wa ai. Hpang jahtum na shingran hta, sumsing lamu hte mungkan ga gaw Yehowa yaw shada da ai hte maren, ngwi pyaw simsa lam lu nga ai hpe Yawhan mu wa ai. Satan hte shi hpang hkan ai ni gaw tsep kawp jahten kau hkrum sai. Sumsing lamu hte mungkan ga kaw nga ai ni yawng gaw, chyoi pra ai Yehowa a mying ningsang hpe shagrau nna, shi hpe chyu sha nawku daw jau nga ma ai.

“Nang hte numsha hpe mung, na a amyu matu hte shi a amyu matu hpe mung, ngai majan shangun da na ma de ai: shi gaw na a baw abrep na ra ai, nang mung, shi a lahtin achye na ra ai.”​​​​​—⁠⁠⁠⁠⁠Ningpawt 3:15