Content de lai

Malawm Ni Hpe Lai U

 DAW 103

“Na A Mungdan Du Wa Ru Ga”

“Na A Mungdan Du Wa Ru Ga”

Yehowa ndai hku ga sadi jaw ai: ‘Hkrap ngu hkrap ngoi ai, machyi makaw ai hte si hkrung si htan mung n nga na sai. Myi hta na myi prwi pru ma pru hpe ngai katsut kau ya na. Moi byin wa ai nhkru n kaja ai lam yawng hpe dum sana n re.’

Yehowa gaw Adam yan Ewa hpe ngwi pyaw simsa let Edin sun hta nga na matu shara jaw da ai. Shan gaw sumsing lamu Kawa hpe nawku ra nna, shan a ma ni hte mungkan ga hpe jahpring ra na re. Adam yan Ewa gaw Yehowa hpe madat mara ai lam n nga wa tim, Yehowa gaw shi a yaw shada lam hpe n galai shai ai. Karai Kasang ga sadi jaw da ai lam yawng hpring tsup wa ai hpe ndai laika buk kaw nna anhte chye wa sai. Abraham hpe ga sadi jaw da ai hte maren, Karai Kasang a Mungdan gaw mungkan ga ntsa shaman chyeju law law jahpring ya na re.

Kade n na yang, Satan, nat ni hte nhkru ai masha yawng nga sana n re. Hkrung mahkrung yawng gaw Yehowa hpe nawku na re. Machyi makaw lam hte si hkrung si htan mung n nga sai. De a malai, shani shagu n-gun atsam hpring let rawt lu nna, angwi apyaw hte asak hkrung lu na re. Mungkan ga gaw  hparadisu byin wa na. Masha yawng gaw, mu mu mai mai sha lu nna, shimlum ai nta kaw nga lu na re. Masha ni gaw, matsan dum chye nna, zingri zingrat ai lam, dawsa ai lam ni nga sana n re. Matse ai dusat ni hpe mung hkrit ra sana n re. Dai dusat ni mung anhte hpe n hkrit ra sai.

Masha ni hpe Yehowa asak bai jahkrung ya ai shaloi, grai myit kahpra hpa aten rai wa na re. Abela, Noa, Abraham, Sara, Mawshe, Ruhta, Eshta hte Dawi ni zawn moi prat na masha ni hpe anhte hkap hkalum la lu na re. Mungkan ga hpe hparadisu galaw ai amu bungli hta, anhte hte arau shanhte mung jawm galaw na re. Myit pyaw shangun ai amu bungli ni galoi mung nga nga na re.

Yehowa gaw nang hpe dai kaw nga shangun mayu ai. Nang galoi mung n myit yu ga ai lam hku, Yehowa hpe chye chyang wa na re. Ya mung, htawm hpang hta mung, shani shagu Yehowa hte anhte a hku hkau lam ngang kang hkra shakut mat ga!

“Anhte a Madu Karai Kasang e, nga yawng nga pra hte hpe nang hpan tawn da . . . ai majaw, nang gaw hpung shingkang, arawng sadang hte hpung dagu lu la na ging dan nga ndai law.”​​​​​—⁠⁠⁠⁠⁠Shingran 4:11