Content de lai

Malawm Ni Hpe Lai U

 DAW 97

Korneli Chyoi Pra Ai Wenyi Lu La

Korneli Chyoi Pra Ai Wenyi Lu La

Kesare mare hta Korneli ngu ai Roma hpyen du langai nga ai. Shi gaw Yuda masha n rai tim, Yuda ni gaw shi hpe grai hkungga ma ai. Shi gaw matsan ai ni hte ra kadawn nga ai ni hpe shawang myit hte karum ya ai. Korneli gaw Yehowa hpe kamsham nna, galoi mung akyu hpyi ai. Lani mi hta, lamu kasa langai dan pru wa nna, Korneli hpe ndai hku tsun ai: ‘Na a akyu hpyi ga ni hpe Karai Kasang na ai. Ya, Petru nga taw ai Yopa mare de masha dat dat nna, nang hpang de saw shaga dat u.’ Korneli gaw deng 30 daram tsan ai dingda maga kaw na Yopa mare de, ala 3 hpe kalang ta dat dat ai.

Dai aten hta sha, Yopa mare kaw du taw ai Petru mung, shingran langai mu ai. Dai shingran hta, Yuda masha ni n mai sha ai dusat ni hpe mu nna, dai hpe sha u ngu ai nsen hpe mung na ai. Dai majaw, Petru gaw ndai hku tsun ai: ‘N san seng ai shan hpe nye prat hta kalang mi mung n sha ga ai.’ Shaloi, dai nsen gaw ndai hku bai tsun ai: ‘N san seng ai dusat ni ngu nna hkum tsun. Karai Kasang gaw san seng hkra galaw ya sai.’ Dai hpang ndai hku bai na ai: ‘Na chyinghka shawng kaw ala 3 du taw ai. Shanhte hte arau hkan nang mat su.’ Petru chyinghka de sa nna dai ala ni hpe hpa majaw sa wa ai lam san ai. Shanhte ndai hku tsun ai: ‘Anhte hpe Roma hpyen du Korneli shangun dat ai re. Kesare mare hta nga ai shi nta de nang hpe saw shaga dat ai.’ Petru gaw dai ala ni hpe shi nta hta, lana mi yup na matu saw shaga ai. Hpang shani hta,  Yopa mare kaw na hpunau nkau mi hpe shaga nna, dai ala ni hte arau Kesare mare de sa mat ai.

Korneli gaw Petru hpe mu yang, hput di di dat ai. Dai majaw, Petru ndai hku tsun ai: ‘Rawt u! Ngai mung masha sha re. Yuda ni gaw maigan amyu masha ni a nta de n sa ga tim, Karai Kasang gaw ngai hpe na nta de sa shangun ai. Nang ngai hpe hpa majaw saw shaga ai lam, chyeju hte ya naw tsun dan rit.’

Korneli gaw Petru hpe ndai hku tsun ai: ‘Lai wa sai 4 ya hta, Karai Kasang hpe ngai akyu hpyi nga ai shaloi, lamu kasa langai gaw nang hpe shaga na matu ngai hpe tsun ai. Chyeju hte Yehowa a mungga ngai hpe sharin ya rit.’ Petru ndai hku tsun ai: ‘Karai Kasang gaw myiman n lata ai hpe ngai chye sai. Shi gaw shi hpe nawku mayu ai kadai hpe mung hkap la ai.’ Petru gaw shanhte hpe Yesu a lam law law sharin ya ai. Dai hpang, Korneli hte shi hte arau nga taw ai ni a ntsa, chyoi pra ai wenyi du wa nna, shanhte yawng hkalup hkam la ma ai.

“Amyu baw shagu hta shi hpe hkrit hkungga ai hte ding man ai amu galaw ai wa gaw, shi kaw myi man pa nga ai.”​​​​​​—⁠⁠⁠⁠⁠⁠Kasa 10:35