Content de lai

Malawm Ni Hpe Lai U

 DAW 101

Pawlu Hpe Roma De Sa Dat

Pawlu Hpe Roma De Sa Dat

Pawlu a masum lang ngu na sasana hkrun lam gaw Yerusalem hta htum mat ai. Dai kaw bawng rim hkrum nna, htawng jahkrat hkrum ai. Lana mi hta, Yesu gaw shingran hku nna shi hpe ndai hku sa tsun ai: ‘Nang gaw Roma mare de sa nna, dai shara hta hkaw tsun ra na re.’ Pawlu hpe Yerusalem kaw nna Kesare mare de sa dat ai. Dai hta, lahkawng ning htawng jahkrat hkrum ai. Munggyi Hpestu man hta san jep hkrum ai shaloi, Pawlu ndai hku tsun ai: ‘Kehta kaw sha tara dara hkrum mayu ai.’ Hpestu ndai hku bai tsun ai: ‘Kehta a tara dara hkrum mayu yang, nang hpe shi kaw sa ya na.’ Dai majaw, Pawlu hpe Roma de sa na sanghpaw li kaw bang dat ai. Luka yan Aristarku mung hkan nang mat ai.

Panglai hta nhtoi loi mi na ai hpang, nbung laru kaba ru wa ai. Dai majaw, masha yawng gaw si sana re ngu shadu ma ai. Raitim, Pawlu ndai hku tsun ai: ‘Manang ni e, mana yupmang hta lamu kasa gaw: “Pawlu e, hkum hkrit u. Nang Roma de du nan du na re. Sanghpaw li kaw na masha yawng mung asak lawt na re” ngu sa tsun ai. Dai majaw, n-gun dating mu! Anhte n si ai.’

Nhtoi 14 ya tup nbung laru ru nga ai. Dai hpang, zunlawng langai hpe mu ai. Dai gaw Melite zunlawng re. Sanghpaw li gaw zaibru jang hpe sa adawt nna, hten run mat ai. Raitim, sanghpaw li hta lawm wa ai marai 276 ting gaw asak lawt wa ai. Nkau mi gaw hka hpungyawt nna, nkau mi gaw sanghpaw li chyahten kaw na hpun pyen adaw achyen ni hpe noi nna rap ma ai. Melite zunlawng kaw na masha ni gaw, shanhte hpe yu lanu lahku ya ma ai. Shanhte wan kra na matu mung wan wut ya ai.

Shata masum na ai hpang, hpyen la ni gaw Pawlu hpe kaga sanghpaw li hte Roma de shaga sa mat ai. Dai kaw du ai shaloi, hpunau ni gaw shi hpe sa jahkrum ma ai. Shanhte hte hkrum ai shaloi, Pawlu gaw Yehowa hpe shakawn nna n-gun lu wa ai. Pawlu gaw bawng masha raitim, sin ai hpyen ma hte arau nta shap nna san san nga na matu ahkang lu ai. Dai hta 2 ning nga ai. Masha ni shi hpe sa jahkrum yang, Karai Kasang a Mungdan hte seng ai lam hkaw tsun ai. Yesu a lam mung sharin achyin ya ai. Pawlu gaw Asha Maina hte Yuda mung kaw nga ai nawku hpung ni hpang de mung laika ka wa ai. Yehowa gaw Pawlu hpe mungdan shagu hta kabu gara shiga chyam bra na matu teng sha akyu jashawn wa ai.

“Shakut sharang ai law law hta, tsin-yam tsindam hta, kyin dut ai hta, shagyeng ai hta, . . . Karai Kasang a bungli daw ai sara ni rai nga ga ai gaw, lam shagu hta anhte hkum marai dan nga ga ai.”​​​​​—⁠⁠⁠⁠⁠2 Korinhtu 6:4, 10