Content de lai

Malawm Ni Hpe Lai U

 DAW 93

Sumsing Lamu De Yesu Lung Mat

Sumsing Lamu De Yesu Lung Mat

Yesu gaw Galile mung hta shi a sape ni hte hkrum ai. Shi gaw shanhte hpe grai ahkyak ai ndai lam matsun jaw ai: ‘Shara shagu kaw nna masha ni hpe sape byin hkra sa nna hkaw tsun u. Ngai nanhte hpe sharin ya ai lam ni hpe sa sharin ya nna, shanhte hpe hkalup jaw u.’ Bai nna: ‘Ngai nanhte hte galoi mung arau nga na hpe dum nga mu’ ngu nna ga sadi jaw ai.

Yesu gaw hkrung rawt nna nhtoi 40 ya laman, Galile mung hte Yerusalem mare hta nga ai tsa lam hku law ai sape ni a man hta hkum shadan dan ai. Shi gaw shanhte hpe grai ahkyak ai lam ni sharin ya nna, mauhpa amu law law hpe mung madun dan ai. Dai hpang, Yesu gaw Tsanlun Bum hta hpang jahtum lang hku nna, kasa ni hte hkrum ai. Yerusalem kaw nga ai shaloi, kasa ni hpe Yesu ndai hku tsun wa ai: ‘Nanhte ndai mare kaw nna hkum pru mat u. Nye Wa ga sadi jaw da ai lam hpe ala nga u.’

Raitim, Yesu hpa tsun mayu ai hpe sape ni n chye na ai. Dai majaw, ya shanhte gaw Yesu hpe ndai hku san ai: ‘Nang gaw ya Israela ni a Hkawhkam byin nga sai kun?’ Yesu ndai hku tsun ai: ‘Ngai Hkawhkam byin na matu Yehowa masat da ai aten garai n du shi ai. Kade n na yang, nanhte gaw chyoi pra ai wenyi a atsam lu la nna, nye a sakse ni tai wa na ra ai. Yerusalem mare, Yuda mung, Samari mung hte lamu ga htum hkra sa nna hkaw tsun su.’

Dai hpang, Yesu gaw lamu de lung mat nna, summwi gaw shi hpe ka-up mat ai. Sape ni yu taw nga ai laman, shi mat mat ai.

Sape ni gaw Tsanlun Bum kaw na yu wa ai hpang, Yerusalem de sa ma ai. Shanhte gaw nta langai a ntsa htap kaw ayan hkrum zup nna, arau akyu hpyi ma ai. Shanhte gaw Yesu kahtap jaw na lam matsun ni hpe la taw nga ma ai.

“Dai mungdan a kabu gara shiga gaw, masha amyu baw shagu a matu mara sakse tai lu u ga, mungkan ting hta e hkaw dan lu na rai nga ai; dai hpang e dai jahtum ai gaw du na ra ai.”​​​​​​—⁠⁠⁠⁠⁠⁠Mahte 24:14