Content de lai

Malawm Ni Hpe Lai U

 DAW 92

Yesu Gaw Sape Ni Shawng Bai Hkum Shadan Dan

Yesu Gaw Sape Ni Shawng Bai Hkum Shadan Dan

Yesu gaw kasa ni hpe hkum shadan dan ngut ai hpang, Petru gaw nga hkwi na matu, Galile Nawng de sa mat ai. Htawma, Yaku, Yawhan hte kaga sape ni mung shi hte arau hkan nang ai. Shana tup nga hkwi tim, langai mi mung n lu ma ai.

Hpang jahpawt jau jau hta, hka hkin-gau kaw masha langai tsap nga ai hpe, shanhte mu ma ai. Dai masha gaw shanhte hpe: ‘Nanhte nga lu rim ai kun?’ ngu marawn nna san ai. Shanhte ndai hku bai tsun ai: ‘N lu ai.’ Shaloi: ‘Li a hkra maga de nanhte a sumgawn hpe jahkrat dat u’ ngu nna shi tsun ai. Shi tsun ai hte maren galaw yang, sumgawn hta nga grai law hkra lu la ai majaw, shanhte pyi n lu gang ma ai. Shaloi, dai wa gaw Yesu re ai hpe Yawhan kalang ta chye mat nna ndai hku tsun ai: “Madu she rai nga ai.” Dai shaloi, Petru gaw hka de kalang ta yu nna, hka hkin-gau de hka hpungyawt let sa mat ai. Kaga sape ni gaw li hte hkan nang ma ai.

Hka hkin-gau de shanhte du ai shaloi, wan mang hta kakang da ai muk hte nga hpe mu ai. Yesu gaw sha na matu, shanhte hkwi lu ai nga nkau mi mung la  sa wa u nga nna tsun ai. Bai Yesu ndai hku tsun ai: ‘Jahpawt shat sha ga.’

Sha ngut ai hpang, Yesu gaw Petru hpe ndai hku san ai: ‘Nga hkwi ai hta ngai hpe grau tsawra ai kun?’ Petru ndai hku bai tsun ai: ‘Madu e, ngai nang hpe tsawra ai lam nang chye ai le.’ Yesu ndai hku tsun ai: ‘Rai yang, nye a sagu ni hpe bau nga u.’ Yesu ndai hku bai san ai: ‘Petru e, nang ngai hpe tsawra ai kun?’ Petru gaw: ‘Madu e, ngai tsawra ai hpe nang chye ai le’ nga nna bai tsun ai. Yesu gaw: ‘Nye a sagu ni hpe rem nga u’ nga nna tsun ai. Masum lang ngu na bai san ai shaloi, Petru gaw grai yawn mat nna ndai hku tsun ai: ‘Madu e, Nang gaw yawng mayawng hpe chye ai. Ngai nang hpe tsawra ai mung nang chye ai le.’ Yesu ndai hku bai tsun ai: ‘Nye a sagu ni hpe bau maka nga u.’ ‘Ngai hpang de matut hkan nang u’ nga nna mung bai tsun ai.

“Shi [Yesu] gaw, Ngai kaw hkan marit; masha hpe hkan hkwi na masha, ngai nan hpe shatai na made ai, ngu nna shan hpe tsun mu ai. Shaloi jang, shan gaw dai sumgawn ni hpe kau da nna shi kaw hkan nang ma ai.”​​​​​​—⁠⁠⁠⁠⁠⁠Mahte 4:19, 20