Yesu si mat ai hpang, lusu ai masha langai re ai Yosep gaw, Yesu a hkum tsawp hpe hpun shadaw kaw nna shayu na matu Pilat kaw ahkang hpyi ai. Yosep gaw, yesu a hkum tsawp hpe lachyit sumpan hte kayawp nna, manam pyaw ai baw chya ya ai. Dai hpang, lup nnan hta makoi ya ai. Lup sung hku mahka hpe nlung kaba hte pat da ya ai. Hkinjawng ni gaw Pilat hpe ndai hku tsun ai: ‘Yesu a sape ni gaw, Yesu a moi mang hpe lagu la nna, shi asak bai hkrung wa sai ngu tsun na hpe anhte tsang ai.’ Dai majaw, Pilat gaw shanhte hpe ndai hku tsun ai: ‘Lup hpe pat da nna, masha sin shangun da u.’

Masum ya na ai hpang, num nkau mi gaw jahpawt jau jau lup sung hku de sa ai. Dai shaloi, galau da ai nlung hpe mu ma ai. Lup sung hku kata kaw nna, lamu kasa langai gaw dai num ni hpe ndai hku tsun ai. ‘Hkum hkrit mu. Yesu gaw bai hkrung rawt sai. Shi hpe Galile mung hta sa hkrum na matu, sape ni hpe sa tsun su.’

Magdala Mari gaw alawan sa mat nna, Petru hte Yawhan hpe sa tam ai. Shi shanhte hpe ndai hku tsun ai: ‘Yesu a moi mang hpe marai langai ngai lagu la mat sam sai!’ Petru yan Yawhan gaw lup sung hku de sa yu ai. Dai hta hpa n nga ai hpe mu yang, nta de bai wa mat ai.

Mari lup de du ai shaloi, lamu kasa lahkawng kata kaw nga taw ai hpe mu ai. Shi shan hpe ndai hku tsun ai: ‘Nye madu hpe shanhte gara de la sa mat sai kun n chye ai.’ Dai hpang, la langai hpe shi mu ai shaloi, sun sin ai wa ngu shadu nna ndai hku tsun ai: ‘Nang nye madu hpe gara de la sa mat ai kun?’ Raitim, dai la wa gaw “Mari!” ngu nna shaga dat ai shaloi, shi gaw Yesu re ai hpe Mari chye dat ai. “Sara!” ngu shi marawn shaga nna, Yesu hpe ahpum dat ai. Yesu gaw shi hpe ndai hku tsun ai: ‘Ngai hpe mu wa ai ngu, nye sape ni hpe sa tsun dan su.’ Dai shaloi, shi kalang ta kagat sa mat nna, Yesu hpe mu wa ai lam sape ni hpe sa tsun dan ai.

Dai shani a shana daw hta, sape lahkawng gaw, Yerusalem kaw nna Ema-u kahtawng de lam hkawm sa taw nga ai. La langai mung shan hte arau lam hkawm sa nna, hpa lam jahta nga ai hpe san ai. Shan ndai hku tsun ai: ‘Nang n na shi ai i? Lai wa sai masum ya hta, hkinjawng agyi ni gaw Yesu hpe sat kau ai. Raitim, shi asak bai hkrung wa ai ngu num nkau mi tsun nga ai.’ Shaloi dai la gaw: ‘Nan myihtoi ni hpe n kam ai i? Hkristu gaw si nna bai hkrung rawt wa na ngu shanhte myihtoi htoi wa ai le.’ Shi gaw matut nna, Chyum Laika lam ni hpe  sanglang dan ai. Ema-u kahtawng de shanhte du ai shaloi, shan hte arau hkan wa na matu dai la hpe tsun ai. Shana shat sha ai shaloi, muk a matu dai la akyu hpyi ya ngut ai hpang, shi gaw Yesu re ai hpe sape ni chye mat ai. Dai hpang, Yesu mat mat ai.

Dai sape lahkawng gaw, Yerusalem hta nga ai nta langai kaw hkrum zup nga ai kasa ni hpang de alawan sa mat nna, byin wa ai lam ni hpe tsun dan ai. Shanhte nta kata kaw nga taw ai laman, shanhte yawng a man hta Yesu dan pru wa ai. Shawng nnan hta, shi gaw Yesu re ai hpe kasa ni n kam ma ai. Shaloi Yesu gaw: ‘Nye lata ni hpe yu u. Ngai hpe jum yu mu. Hkristu gaw si ai kaw nna bai hkrung rawt wa na ngu Chyum Laika hta ka da ai.’