Content de lai

Malawm Ni Hpe Lai U

 DAW 86

Lazaru Hpe Yesu Asak Bai Jahkrung Ya

Lazaru Hpe Yesu Asak Bai Jahkrung Ya

Yesu hta Behtani kahtawng kaw nga ai grai hkau ai manang masum nga ai. Shanhte gaw, Lazaru hte shi a kana Mari yan Marhta re. Lani mi hta, Yawdan hka wora hkran kaw Yesu du nga ai. Dai shaloi, Mari yan Marhta kaw nna grai ahkyak ai shiga du wa ai: ‘Lazaru machyi sawng taw ai. Chyeju hte lawan sa wa ya rit.’ Yesu kalang ta n sa ai. Dai laman hta, Lazaru si mat ai. Lahkawng ya na ai hpang she, kasa ni hpe: ‘Behtani kahtawng de sa ga. Lazaru yup pyaw nga ai. Shi hpe ngai sa jasu na’ ngu tsun ai. Kasa ni gaw: ‘Lazaru yup pyaw nga ai rai yang, shi mai wa na re’ nga nna tsun ai. Dai shaloi, Yesu tsun ai gaw: ‘Lazaru si mat sai.’

Behtani kahtawng de Yesu du wa ai shaloi, Lazaru hpe makoi mayang ngut ai mali ya na sai. Masha law law mung Mari yan Marhta hpe shalan shabran ya na matu du taw nga ai. Yesu du wa sai lam Marhta na yang, shi hpe sa tau na matu alawan sa nna: ‘Madu e, Nang ndai kaw nga taw yang, nye kanau si na n re’ ngu tsun ai. Yesu shi hpe ndai hku tsun ai: ‘Na a kanau asak bai hkrung wa na re. Marhta e, dai hpe nang kam ai kun?’ Marhta ndai hku bai tsun ai: ‘Hkrung rawt ai nhtoi hta Lazaru hkrung rawt wa na hpe ngai kam ai.’ Dai shaloi, Yesu gaw: ‘Ngai gaw bai hkrung rawt ai lam hte asak hkrung ai lam rai nga ai’ nga nna Marhta hpe tsun ai.

Dai hpang, Marhta gaw Mari hpang de sa nna ndai hku tsun ai: ‘Yesu du sai.’ Mari gaw Yesu hpang de kagat sa yang, masha hpawng mung shi hpang hkan nang ma ai. Mari gaw Yesu a lagaw nhpang kaw dingnyawm nna grai hkrap let ndai hku tsun ai: ‘Madu e, Nang ndai kaw nga taw yang, nye kanau asak hkrung taw nga na re.’ Mari grai hkamsha nna hkrap ai hpe Yesu mu yang, shi mung hkrap wa ai. Masha hpawng gaw Yesu hkrap ai hpe mu yang, ndai hku tsun ai: ‘Yesu gaw Lazaru hpe grai tsawra ai she re nga ai.’ Raitim, nkau mi gaw ndai hku tsun ma ai: ‘Shi a manang hpe hpa majaw n hkye la ai kun?’ Ya, Yesu hpa galaw na kun?

Yesu gaw lup de sa yu ai. Lup chyinghka hpe nlung kaba hte pat tawn da ai. Shi ndai hku tsun ai: ‘Dai nlung hpe sit kau u.’ Marhta ndai hku tsun ai: ‘Makoi mayang da ai mali ya na sai majaw, manam taw sana re.’ Rai timung, dai nlung hpe shanhte galau kau ai. Dai hpang, Yesu ndai hku akyu hpyi ai: ‘Wa e, nang nye a ga madat ya ai majaw, ngai nang hpe shakawn nngai law. Nang galoi mung nye a ga madat ya ai hpe ngai chye ai. Raitim, nang ngai hpe  shangun dat ai hpe ndai kaw nga taw ai masha ni chye hkra nsen ja ja hte akyu hpyi ai re.’ Dai hpang: ‘Lazaru e, pru wa rit!’ nga nna nsen kaba hte jahtau dat ai. Dai shaloi, grai mauhpa lam langai byin wa ai. Lazaru gaw lup sung hku kaw nna sumpan kayawp let pru wa ai. Yesu gaw: ‘Shi hpe sumpan raw kau ya nna dat dat u’ ngu tsun ai.

Dai mabyin hpe mu ai masha law law gaw Yesu hpe kamsham wa ma ai. Raitim, masha nkau mi gaw Hparishe ni hpe dai lam sa tsun dan ma ai. Dai aten kaw nna, Hparishe ni gaw Yesu yan Lazaru hpe sat kau mayu wa ma ai. Kasa 12 kaw nna langai re ai Yuda Iskarut gaw Hparishe ni hte sa hkrum ai. ‘Yesu hpe tam mu hkra nanhte hpe ngai karum ya yang, ngai hpe gumhpraw kade jaw na?’ ngu nna san ai. Shanhte gaw Yuda hpe gumhpraw lap 30 jaw na matu myit hkrum ma ai. Dai aten kaw nna, Yuda gaw Yesu hpe Hparishe ni a lata de ap na matu ahkaw ahkang tam nga ai.

“Kawa gaw si ai ni hpe sharawt nna jahkrung ya ai hte maren, Kasha wa mung shi ra mara ni hpe jahkrung ya wu ai.”​​​​​​​—⁠⁠⁠⁠⁠⁠⁠Yawhan 5:21