Content de lai

Malawm Ni Hpe Lai U

 DAW 78

Mungdan Kabu Gara Shiga Yesu Hkaw Tsun

Mungdan Kabu Gara Shiga Yesu Hkaw Tsun

Yesu hkalup hkam ngut nna kade n na yang, ‘Karai Kasang a Mungdan ni wa sai lam’ hkaw tsun hpang wa ai. Galile hte Yuda mung ting bu hkawm ai shaloi, sape ni mung Yesu hpang hkan nang ma ai. Yesu gaw shi a daidaw buga re ai Nazaret mare de bai wa ai shaloi, tara jawng de sa ai. Dai shara hta, shi gaw Esaia laika katsu hpe hpaw nna ndai hku nsen ja ja hte hti dan ai: ‘Kabu gara shiga hkaw dan na matu Yehowa gaw ngai hpe chyoi pra ai wenyi ru jaw ya ai.’ Dai gaw hpa lachyum kun? Yesu mauhpa amu ni galaw dan na hpe masha ni myit mada tim, chyoi pra ai wenyi lu ai madung lam gaw, kabu gara shiga hkaw tsun na matu sha re. Dai majaw, shi tsun ai ga madat nga ai masha ni hpe ndai hku tsun ai: ‘Ndai myihtoi ga gaw dai ni hpring tsup sai.’

Hpang hta, Yesu gaw Galile Nawng de sa ai. Dai shara kaw, shi a sape ni byin wa na, nga hkwi ai masha marai mali hte hkrum ai. Shanhte hpe shi ndai hku saw shaga ai: ‘Ngai kaw hkan nang marit. Ngai nanhte hpe masha hkan hkwi na masha shatai na.’ Shanhte gaw Petru, Andre, Yaku hte Yawhan re. Shanhte mung nga hkwi ai bungli hpe kau da nna, Yesu hpang kalang ta hkan nang ma ai. Shanhte gaw Galile mung ting Yehowa a Mungdan lam hkaw tsun ma ai. Tara jawng ni, gat ni hte lam hkan e mung hkaw tsun ma ai. Shanhte sa ai shara shagu de masha wunawng wuwa kaba gaw hkan dingyang re. Yesu hte seng ai shiga gaw shara shagu chyam bra mat nna, grai tsan ai Suri mung de pyi du mat ai.

Aten loi mi na ai hpang, Yesu gaw shi a sape ni hpe ana shamai lu ai atsam hte nat ni hpe shaden lu ai atsam jaw ai. Yesu hte shi a sape ni gaw mare langai hpang langai, kahtawng langai hpang langai hkaw tsun ma ai. Magdala Mari, Yawhana, Susanna hte kaga sadi dung ai anum law law gaw, Yesu hte shi a sape ni hpe galaw daw na matu hkan nang ma ai.

Yesu gaw shi a sape ni hpe shaman shakyang ya ngut ai hpang, hkaw tsun na matu shanhte hpe shangun dat ai. Shanhte gaw Galile mung ting hkaw tsun ai. Masha law law gaw sape byin wa nna hkalup hkam la ma ai. Sape byin mayu ai masha grai law hkra nga ai. Dai majaw, Yesu gaw mam dan na matu jin jin rai nga sai lam hte shingdaw nna ndai hku tsun ai: ‘Mam dan na masha law law sa ya na matu Yehowa kaw akyu hpyi mu.’ Dai hpang, Yesu gaw sape 70 hpe lata nna, Yuda mung ting hta hkaw tsun na matu marai lahkawng hpra ginrun nna shangun dat ai. Shanhte gaw amyu baw shagu hpe Karai Kasang a  Mungdan hte seng ai lam hkaw tsun ai. Sape ni bai wa ai shaloi, shanhte hkrum wa ai lam hpe myit rawt let Yesu hpe sa tsun dan ma ai. Hkaw tsun bungli hkring mat hkra Satan hpa mung n lu galaw ai.

Yesu gaw ginding aga ntsa shi n nga mat ai hpang hta mung, hkaw tsun bungli hpe sape ni matut galaw lu hkra atsawm lajang ya wa ai. Yesu gaw sape ni hpe ndai hku tsun wa ai: ‘Kabu gara shiga hpe mungkan ting hkaw tsun mu. Masha ni hpe Karai Kasang a Mungga sharin ya nna hkalup jaw mu.’

“Karai Kasang mungdan a kabu gara shi ga hpe, mare kaga ni hta mung ngai hkaw tsun lu na nngai; dai matu ngai hpe shangun dat ni ai.”​​​​​​​​—⁠⁠⁠⁠⁠⁠⁠⁠Luka 4:43