Content de lai

Malawm Ni Hpe Lai U

 DAW 71

Yesu Hpe Yehowa Makawp Maga Ya

Yesu Hpe Yehowa Makawp Maga Ya

Israela mung a sinpraw maga na masha ni gaw, shanhte hpe shagan ni lam matsun ya lu ai nga nna kamsham ma ai. Lana mi hta, htoi kabrim ai shagan langai hpe sinpraw maga na masha nkau mi mu nna, dai shagan sa ai hpang hkan nang ma ai. Dai “shagan” gaw shanhte hpe Yerusalem de lam woi ya ai. Yuda ni a hkawhkam byin wa na ma langai shangai wa ai hpe shanhte chye ma ai. Dai majaw, shanhte gaw dai ma gara kaw nga ai kun nga nna, masha ni hpe san ma ai. Hpa majaw nga yang, dai ma hpe shanhte hkungga jaw mayu ai majaw re.

Yerusalem mare a hkawhkam Herod gaw, hkawhkam nnan hte seng ai lam hpe na yang, grai myit tsang mat ai. Hkinjawng agyi ni hpe shaga nna, ndai hku san ai: ‘Hkawhkam byin wa na ma gaw, gara kaw shangai wa na ngu tsun da ai kun?’ Shanhte ndai hku htai ai: ‘Betlehem mare hta shangai wa na ngu myihtoi ni tsun ma ai.’ Dai majaw, Herod gaw sinpraw maga kaw na sa wa ai masha ni hpe shaga nna, ndai hku tsun ai: ‘Betlehem de sa nna, dai ma hpe sa tam su. Shi hpe mu yang, ngai hpe bai sa tsun dan u. Ngai mung shi hpe hkungga sa jaw mayu ai.’ Dai gaw masu ai ga re.

Shagan gaw shara bai htawt mat ai. Dai masha ni mung, shagan hpang hkan nang yang, Betlehem mare de du wa ai. “Shagan” gaw nta langai a ntsa hkring mat ai shaloi, shanhte gaw dai nta kata de shang mat ai. Yesu hpe shi kanu Mari hte arau nga taw ai hpe mu ai. Shanhte gaw ma hpe gum dagup let hkungga jaw nna, aja, lawban hte mura hpe kumhpa hku nna jaw ma ai. Yesu hpe sa jahkrum na matu, dai masha ni hpe Yehowa teng sha shangun dat ai kun? N re ai.

Dai shana hta sha, Yehowa gaw Yosep hpe yup mang jaw nna, ndai hku tsun ai: ‘Herod gaw Yesu hpe sat mayu taw nga ai. Na a madu jan hte kasha hpe shaga nna, Egutu mung de hprawng u. Wa na matu shimlum sai ngu, ngai n tsun dingyang, dai kaw sha matut nga taw mu.’ Yosep hte shi a dinghku gaw Egutu mung de, kalang ta pru sa mat wa ai.

Yehowa gaw sinpraw maga na masha ni hpe mung, Herod hpang de bai n sa na matu tsun ai. Herod gaw dai masha ni, shi hpang de bai n sa wa sai hpe chye yang, grai masin pawt mat ai. Yesu hpe shi tam n mu ai majaw, Betlehem mare na Yesu a asak daram nga ai, la kasha ma ni yawng hpe sat kau na matu, matsun dat ai. Raitim, Yesu gaw, grai tsan ai Egutu mung kaw du taw nga sai majaw, shimlum nga ai.

 Hpang e, Herod si mat ai. Yehowa gaw Yosep hpe ndai hku tsun ai: ‘Ya, nanhte wa na matu shimlum nga sai.’ Yosep, Mari hte Yesu gaw Israela mung de bai wa nna, Nazaret mare kaw shanu nga ai.

“Nye n-gup kaw na pru ai mungga mung, dai hte maren tai na ra ai, . . . ngai shangun ai amu hta, awng wa na ra ai.”​​​​​​​​​—⁠⁠⁠⁠⁠⁠⁠⁠⁠Esaia 55:11