Content de lai

Malawm Ni Hpe Lai U

 DAW 63

Shakum Kaw Na Laika

Shakum Kaw Na Laika

Hpang hta, Belashaza gaw Babelon hkawhkam byin wa ai. Lana mi hta, shi gaw mungdan hta nga ai ahkyak ai masha 1,000 hpe shaga la nna, lusha poi kaba galaw ai. Shi gaw Yehowa a nawku htingnu kaw nna, Nebuhkadneza zing la wa ai aja gawm ni hpe sa la wa na matu, shi a mayam ni hpe shangun dat ai. Belashaza hte shi a manang ni gaw dai gawm ni hte lusha nna shanhte a hpara ni hpe shakawn nga ma ai. Dai shaloi, a kajawng sha masha lata langai pru wa nna, shanhte lusha nga ai gawk a shakum hta mau hpa gasi ni ka hpang wa ai.

Belashaza gaw grai hkrit kajawng mat ai. Dai majaw, shi a mandan hpaji sara ni hpe shaga la nna, shanhte hpe ndai hku ga sadi jaw ai: ‘Ndai laika hpe hti nna, lachyum htai dan ya lu ai wa hpe Babelon ting hta na, nambat 3 ahkaw ahkang kaba htum ai wa shatai na.’ Shanhte grai shakut yu tim, dai lachyum hpe kadai mung n lu htai ya ai. Dai shaloi, hkawhkam jan shang wa nna ndai hku tsun ai: ‘Hkawhkam Nebuhkadneza lakhtak hta, makoi magap da ai lam ni hpe sanglang ya lu ai Daniela ngu ai masha langai nga ai. Shi gaw ndai gasi ni a lachyum hpe sanglang dan ya lu na re.’

Daniela gaw hkawhkam wa a shawng de du sa wa ai. Belashaza gaw shi hpe ndai hku tsun ai: ‘Lama na, ndai ga hpe hti nna, lachyum hpe htai dan lu na nga yang, ngai nang hpe aja kachyi jaw na. Bai nna, Babelon ting hta, nambat 3 ahkaw ahkang kaba htum ai masha mung shatai na.’ Daniela ndai hku bai tsun ai: ‘Hkawhkam wa jaw na kumhpa ni hpe ngai n ra nngai. Raitim, dai gasi ni a lachyum hpe gaw ngai htai dan ya na. Na nwa Nebuhkadneza gaw grai gumrawng ai. Dai majaw, Yehowa gaw shi hpe shagrit shanem kau ai. Nebuhkadneza hpa byin wa ai hpe nang yawng chye ai. Raitim, nang gaw Yehowa hpe n gawn n sawn di nna, Shi a nawku htingnu kaw na la sa wa ai aja gawm ni hte tsabyi jahku lu ai. Dai majaw, Karai Kasang gaw: Mana, Mana, Tekela hte Uhparsin ngu ai gasi ni hpe ka ai re. Dai gaw, Medi hte Persi masha ni gaw Babelon hpe gasat awng dang nna, nang mung hkawhkam aya sum mat na re ngu ai lachyum re.’

Babelon hpe kadai mung gasat awng dang lu na zawn n san ai. Dai mare hpe sung ai hka nu, grai kaba ai mare bunghku ni hte wang tawn nna, makawp maga da ai. Raitim, dai shana hta sha, Medi hte Persi masha ni gaw dai mare hpe gasat lu wa ai. Persi Hkawhkam Kuru gaw hka nu hpe lam jashai kau ai.  Dai majaw, mare chyinghka de shi a hpyen la ni lam hkawm sa lu ai du hkra, hka yawm mat ai. Hpyen la ni chyinghka de du yang, chyinghka mung hpaw malang taw nga ai. Dai majaw, hpyen la ni gaw mare de kalang ta shang gasat awng dang lu nna, hkawhkam wa hpe mung sat kau ai. Dai hpang, Kuru gaw Babelon hkawhkam byin wa ai.

Laning mi laman hta sha, Kuru ndai hku ndau shana ai: ‘Yehowa gaw Yerusalem hta nga ai, shi a nawku htingnu hpe bai gawgap na matu, ngai hpe tsun ai. Dai amu hpe galaw na matu, sa mayu ai kadai rai timung mai sa ai.’ Dai hku ahkang jaw ai hku nna, Yehowa ga sadi jaw wa ai hte maren, Yerusalem jahten hkrum ai shaning 70 na ai hpang, Yuda masha law law gaw tinang a mare de bai wa lu ai. Shanhte hte arau nawku htingnu kaw nna, Nebuhkadneza zing la wa ai aja, gumhpraw gawm ni hte arung arai ni hpe mung, Kuru gaw bai bang dat ya ai. Yehowa gaw Kuru hpe akyu jashawn nna, Shi a masha ni hpe karum ya wa ai.

“Galu kaba ai Babelon gaw kadawng daw mat sai, kadawng daw mat sai; dai shara gaw, nat tsasam ni a de nga ai shara . . . tai mat sai.”​​​​​​​​​​—⁠⁠⁠⁠⁠⁠⁠⁠⁠⁠Shingran 18:2