Content de lai

Malawm Ni Hpe Lai U

 DAW 60

Htani Htana Agrin Nga Na Mungdan

Htani Htana Agrin Nga Na Mungdan

Lana mi hta, Hkawhkam Nebuhkadneza gaw grai laklai ai yup mang langai hpe mu ai. Dai gaw shi hpe yup n lu hkra myit sharu ya nga ai. Dai majaw, shi gaw mandan hpaji sara ni hpe shaga la nna: ‘Nye yup mang hpe htai dan rit’ nga nna tsun ai. Shanhte ndai hku tsun ai: ‘Chyeju hte Hkawhkam wa mu wa ai yup mang hpe, hkai dan ya mai na kun?’ Raitim, Nebuhkadneza ndai hku tsun ai: ‘Ngai hpa yup mang mu ai hpe sha nanhte tsun u. N rai yang, ngai nanhte hpe sat kau na.’ Shanhte ndai hku bai tsun ai: ‘Hkawhkam wa mu wa ai yup mang hpe hkai dan yang she, anhte lachyum htai dan lu na re.’ Hkawhkam wa ndai hku tsun ai: ‘Nanhte yawng ngai hpe hkalem taw nga ai. Ngai hpa yup mang mu ai hpe sha tsun dan u.’ Shanhte mung hkawhkam wa hpe ndai hku tsun ai: ‘Dai hku galaw lu ai masha kadai mung nga na n re. Hkawhkam wa hpyi shawn ai gaw n mai byin ai lam re.’

Dai shaloi, Nebuhkadneza grai pawt mat nna, mungdan ting hta nga ai mandan hpaji sara ni hte hpaji rawng ai ni hpe sat kau na matu, matsun dat ai. Dai masha ni hta, Daniela, Shadrak, Meshak hte Abed-nego ni mung lawm ai. Dai majaw, Daniela gaw hkawhkam wa hpe aten loi mi jaw na matu, sa hpyi shawn ai. Shi hte shi a manang ni gaw karum ya na matu Yehowa hpang akyu hpyi ma ai. Yehowa hpa galaw ya wa ai kun?

Yehowa gaw Daniela hpe Nebuhkadneza a yup mang hte lachyum hpe shingran hku nna madun dan ai. Hpang shani hta, Daniela gaw hkawhkam wa a masha kaw sa nna: ‘Hpaji rawng ai masha kadai hpe mung hkum sat u. Hkawhkam wa a yup mang hpe ngai sanglang dan lu ai’ nga nna sa tsun ai. Dai majaw, shi gaw Daniela hpe Nebuhkadneza hpang shaga sa ai. Daniela gaw hkawhkam wa hpe ndai hku tsun ai: ‘Karai Kasang gaw htawm hpang hte seng ai lam, nang hpe tsun dan ai re. Na a yup mang gaw ndai hku re: Hkawhkam wa gaw grai kaba ai gawng ngu sumla langai hpe mu ai. Shi a baw gaw aja hte galaw da nna, sinda hte lata ni hpe gaw gumhpraw, akan hte magyi gaw magri, shinglang gaw hpri, lagaw lahpan gaw hpri daw mi, ga kagam daw mi rai nga ai. Dai hpang, bum ntsa kaw nna nlung langai gaw lagaw lahpan hpe adawt dat ai. Dai majaw, yawng agrawp mani mat nna, nbung gaw dai ni hpe ahpawt kau ai. Nlung  mahtang gaw, kaba ai bum langai byin wa nna, mungkan ting hpring mat ai.’

Daniela ndai hku matut tsun ai: ‘Yup mang a lachyum gaw ndai hku re: Na a mungdan gaw dai gawng ngu sumla a aja baw re. Gumhpraw gaw na a hpang paw pru wa na mungdan re. Dai hpang, mungkan ting hpe uphkang na, magri hte bung ai mungdan paw pru wa na re. Bai, hpri zawn ja ai mungdan paw pru wa na re. Hpang jahtum hta, hpri zawn ja nna, ga kagam zawn kya ai dumbru dumbra byin nga ai mungdan paw pru wa na re. Bum byin mat ai nlung gaw Karai Kasang A Mungdan re. Karai Kasang A Mungdan gaw dai mungdan ni yawng hpe, agrawp shamyit kau nna htani htana agrin nga wa na re.’

Dai shaloi, Nebuhkadneza gaw Daniela a shawng hta, ga kaw gum dagup nna ndai hku tsun ai: ‘Na a Karai Kasang gaw, nang hpe dai yup mang a lam tsun dan ai re. Shi zawn Karai kadai mung n nga ai.’ Nebuhkadneza gaw Daniela hpe sat na malai, hpaji rawng ai ni mahkra a agyi hku aya tang nna, Babelon mungdaw hpe uphkang shangun ai. Daniela a akyu hpyi ga hpe Yehowa gara hku mahtai jaw ai hpe nang mu ai kun?

“Dai nat wenyi ni gaw hkawhkam ni hpe, Hebre ga hte Hara Magedon ngu ai shara de jahpawng da mu ai.”​​​​​​​​​​—⁠⁠⁠⁠⁠⁠⁠⁠⁠⁠Shingran 16:16