Content de lai

Malawm Ni Hpe Lai U

 DAW 57

Hkaw Tsun Na Matu Yeremia Hpe Yehowa Shangun

Hkaw Tsun Na Matu Yeremia Hpe Yehowa Shangun

Yehowa gaw Yeremia hpe Yuda ni a myihtoi hku nna lata ai. Masha ni hpe hkaw tsun na matu hte n kaja ai lam ni n galaw na matu, sa sadi jaw shangun ai. Dai shaloi, Yeremia ndai hku tsun ai: ‘Yehowa e, ngai gaw ma naw rai nga ai. Masha ni hte ga mung n chye shaga ai.’ Yehowa ndai hku bai tsun ai: ‘Hkum hkrit u. Nang hpa tsun ra na hpe ngai tsun dan na. Nang hpe ngai karum ya na.’

Du salang ni hpe zup hpawng nna, shanhte a man hta ga dibu hpe agrawp ga kau na matu, Yeremia hpe Yehowa tsun ai. Ndai hku mung tsun shangun ai: ‘Yerusalem mare gaw ndai zawn ga mat na re.’ Yehowa htet da ai hku Yeremia galaw ai shaloi, du salang ni gaw grai masin pawt mat ai. Hkinjawng Pashura gaw Yeremia hpe kayat nna, sharen da ai. Yeremia gaw shana tup n mai shamu shamawt ai. Hpang jahpawt hta, Pashura gaw shi hpe shalawt ya dat ai. Dai hpang, Yeremia ndai hku tsun ai: ‘Ngai n lu hkam sai. Mungga hpe n hkaw tsun sai.’ Shi kaja wa n hkaw tsun mat sai kun? N re ai. De a malai, ‘nye a myit masin hta, nang Yehowa a Mungga ni gaw wan zawn grung nga nna, n hkaw tsun ai sha n lu nga ai’ nga nna Yeremia tsun wa ai. Yeremia gaw masha ni hpe matut nna sadi jaw ai.

Shaning ni lai mat wa ai hpang, Yuda mung hta hkawhkam nnan hkaw dung ai. Hkinjawng ni hte myihtoi masu ni gaw, Yeremia a shiga hpe n ra ma ai. Shanhte gaw hkawseng shadang sha ni hpe: ‘Ndai wa gaw si ging ai wa re’ nga nna sa tsun ma ai. Shanhte hpe Yeremia ndai hku tsun ai: ‘Lama na nanhte ngai hpe sat yang, mara n kap ai wa hpe sat ai re. Ngai gaw Yehowa a ga ni hpe tsun dan ai sha re. Nye a ga n re.’ Hkawseng shadang sha ni gaw dai ga hpe na yang, ndai hku tsun ma ai: ‘Ndai wa gaw si ging ai wa n re.’

Yeremia gaw matut nna hkaw tsun ai. Dai majaw, hkawseng shadang sha ni mung grai pawt wa nna, Yeremia hpe sat  kau na matu hkawhkam wa hpe sa tsun ai. Hkawhkam wa gaw Yeremia hpe nanhte kam ai hku galaw u nga nna tsun ai. Dai majaw, shanhte gaw Yeremia hpe rim nna, hkum pup htat ai hte sung ai hka htung de sa nna, dai shara hta sha si mat na matu kabai jahkrat kau ai. Yeremia mung hkum pup hta angwi ngwi lup nga ai.

Dai shaloi, hkawhkam nta hta aya lu ai Ebed-melek gaw hkawhkam wa hpe ndai hku sa tsun ai: ‘Hkawseng shadang sha ni gaw Yeremia hpe hka htung de kabai jahkrat kau sai. Shi hpe dai hku sha tawn da yang, si mat na re.’ Masha 30 hpe shaga sa nna Yeremia hpe hka htung kaw nna bai shaw la na matu, Ebed-melek hpe Hkawhkam wa tsun ai. Hkaw tsun ai hpe pat shingdang ai lapran hta, n hkaw ai sha n nga wa ai Yeremia hpe anhte kasi la mayu ai n re i?

“Nye a amying majaw masha nlang hte gaw nanhte hpe ndawng n wawm na myit dai: rai timung, htum hkra shakut sharang ai wa gaw, hkye hkrang la ai hkrum na ra ai.”​​​​​​​​​​—⁠⁠⁠⁠⁠⁠⁠⁠⁠⁠Mahte 10:22