Content de lai

Malawm Ni Hpe Lai U

 DAW 1

Karai Kasang Gaw Sumsing Lamu Hte Ginding Aga Hpe Hpan Da

Karai Kasang Gaw Sumsing Lamu Hte Ginding Aga Hpe Hpan Da

Yehowa Karai Kasang gaw anhte a Hpan Madu re. Shi gaw anhte mu lu ai hte n mu lu ai arai yawng mayawng hpe hpan da ai. Shi gaw anhte mu lu ai arai ni hpe garai n hpan shi yang, lamu kasa law law hpe hpan da ai. Lamu kasa ni gaw hpa re ai hpe chye ai kun? Lamu kasa ni gaw Yehowa a mayam ni re. Yehowa gaw shi hte bung hkra shanhte hpe hpan da ai. Yehowa hpe anhte n mu lu ai zawn, shanhte hpe mung n mu lu ai. Yehowa shawng nnan hpan ai lamu kasa gaw, shi hpe karum ya ai. Shagan ni, gintawng ni hte kaga arai yawng mayawng hpe Yehowa hpan ai shaloi, dai lamu kasa gaw karum ya wa ai. Dai gintawng ni kaw nna langai re ai ginding aga gaw anhte a nta re.

Dai hpang, Yehowa gaw du sat ni hte shinggyim masha ni nga na matu, ginding aga hpe shajin da ya ai. Ginding aga de jan a nhtoi htoi lu hkra shi hpan da ya ai. Bum ni, nammukdara ni hte hka nu ni hpe mung hpan da ai.

Hpa ni naw hpan ai kun? Yehowa ndai hku tsun ai: ‘Tsingdu ni, hpun kaji ni hte hpun kaba ni hpe naw galaw na.’ Amyu hkum ai namsi namsaw ni, namlaw namlap ni hte nampu nampan ni hpe tu shangun ai. Dai hpang, ntsa malen pyen ai, hka hpung yawt ai, wa hkawm hkawm ai, gumrawt hkawm ai dusat yawng hpe Yehowa hpan da ai. Shi gaw prangtai zawn kaji ai dusat ni hte magwi zawn kaba la ai dusat ni hpe mung hpan da ai. Nang hpa dusat hpe ra ai kun?

Dai hpang, Yehowa gaw shawng nnan na lamu kasa hpe ndai hku tsun ai: “Shinggyim lasha hpe hpan ga.” Shinggyim masha gaw dusat ni hte shai na re. Shanhte gaw arai ni hpe gin shalat lu ai. Ga shaga chye ai, mani chye nna akyu hpyi chye ai. Shanhte gaw ginding aga hte dusat ni hpe yu ra na re. Shawng  nnan na shinggyim masha hpe chye ai kun? Yu yu ga.

“Shawng ningpawt e Karai Kasang gaw sumsing lamu hte ginding aga hpe hpan da wu ai.”​​​​​​​​​​​​​​​​—⁠⁠⁠⁠⁠⁠⁠⁠⁠⁠⁠⁠⁠⁠⁠⁠Ningpawt 1:1