Content de lai

Malawm Ni Hpe Lai U

 Daw Matsat

Karai Kasng A Mungdan Gaw Hpa Rai A Ta?

Karai Kasng A Mungdan Gaw Hpa Rai A Ta?

1. Gara akyu hpyi ga hpe anhte hkaja na kun?

YESU sharin ya ai akyu hpyi ga hpe masha wan law law chye ai. Yesu gaw dai akyu hpyi ga hte gara hku akyu hpyi na lam sape ni hpe sharin ya wa ai. Shi hpa lam akyu hpyi ai kun? Dai ni anhte a matu ndai akyu hpyi ga gaw hpa majaw ahkyak a ta?

2. Anhte akyu hpyi na matu Yesu sharin ya ai lam masum gaw hpa rai a ta?

2 “Nanhte gaw ning ngu akyu hpyi mu, Sumsing lamu na anhte a Wa e, Na a amying nsang chyoi pra nga lit ga; Na a mungdan du wa ru ga; Lamu tang hta, na a myit dik nga ai hte maren, ga ntsa e mung, dik lit ga law” nga nna Yesu tsun wa ai. (Mahte 6:9-13 hpe hti u.) Dai lam masum hpe akyu hpyi na matu, Yesu anhte hpe hpa majaw sharin ya wa ai kun?—Jahtum Matsing 19 hpe yu u.

3. Karai Kasang a Mungdan lam hte seng nna anhte hpa ni chye ra na kun?

3 Karai Kasang a amying gaw Yehowa re ai lam anhte hkaja ngut sai. Mungkan ga hte masha a matu Karai Kasang a yaw shada lam hpe mung anhte hkaja ngut sai. Raitim, “Na a mungdan du wa ru ga” ngu ai Yesu a ga gaw hpa lachyum rai kun? Karai Kasang a mungdan gaw hpa rai a ta? Dai Mungdan gaw hpa galaw ya na kun? Mungdan gaw Karai Kasang a amying chyoi pra hkra, gara hku galaw ya na hpe hkaja yu ga.

KARAI KASANG A MUNGDAN GAW HPA RAI A TA?

4. Karai Kasang a Mungdan gaw hpa rai kun? De a Hkawhkam gaw kadai rai kun?

4 Karai Kasang a Mungdan ngu ai gaw Yehowa Karai Kasang lata da ai hkawhkam hte gaw de da ai asuya langai  re. Karai Kasang Mungdan a Hkawhkam gaw kadai rai kun? Yesu Hkristu re. Shi gaw “hkawhkam ni a Hkawhkam, madu ni a Madu” re ai. (1 Timohti 6:15) Yesu gaw shinggyim asuya yawng hta na, grau kaja ai hpe lu galaw ai. Shinggyim asuya yawng pawng yang pyi Yesu a atsam hpe n dep ai.

5. Karai a asuya gaw, gara kaw nna uphkang na kun? Gara hpe uphkang na kun?

5 Hkrung rawt ai hpang nhtoi mali shi ya na jang, Yesu sumsing lamu de bai lung mat ai. Hpang jahtum, Yehowa gaw shi hpe Mungdan Hkawhkam hku nna aya tang ai. (Kasa 2:33) Karai a asuya gaw sumsing lamu kaw nna, mungkan ga hpe uphkang na re. (Shingran 11:15) Dai majaw, Chyum Laika hta Karai Kasang Mungdan hpe “sumsing lamu mungdan” nga nna tsun ai.—2 Timohti 4:18.

6, 7. Masha hkawhkam ni hta na Yesu gaw hpa majaw grau kaja ai kun?

6 Yesu gaw shinggyim hkawhkam yawng hta grau ai. Hpa majaw nga yang “shi chyu sha htani htana asak a rawng nga ai” ngu, Chyum Laika hta tsun da ai majaw re. (1 Timohti 6:16) Masha uphkang madu yawng gaw lani mi hta si ra ai. Raitim, Yesu gaw galoi mung si sana n re. Yesu anhte hpe galaw ya na kaja ai lam yawng gaw htani htana grin nga na re.

7 Yesu hpe tara rap ra ai, tsawra myit nga ai Hkawhkam tai na nga nna, Chyum Laika hta myihtoi htoi da ai. “Yehowa a wenyi ngu ai, hpaji byeng-ya hte nyan jaw ai wenyi, hpaji daw ai hte daru magam rawng ai wenyi, chye chyang ai hte Yehowa hpe hkrit hkungga ai wenyi, shi a ntsa e shanu nga na ra ai: shi gaw Yehowa hpe hkrit hkungga ai hta awng sharawng nga ai rai nna, shi mu hkrup ai hte maren n daw dan ai hte, na hkrup ai hte maren n jeyang na ra ai: shi gaw, ding hpring ai hku hkan let, matsan mayan ni hpe tara dara” na re. (Esaia 11:2-4) Nang dai zawn re ai Hkawhkam hpe ra sharawng na re.

8. Yesu hkrai uphkang na n re ai lam anhte gara hku chye lu a ta?

 8 Yesu hte rau sumsing lamu asuya hku nna uphkang na matu, masha nkau mi hpe Karai Kasang lata da ai. Ga shadawn, kasa Pawlu gaw Timohti hpe “anhte shakut sharang ga yang gaw, shi hte rau mung up lu na” ngu tsun wa ai. (2 Timohti 2:12) Yesu hte rau hkawhkam ni hku nna, marai kade uphkang na kun?

9. Yesu hte rau marai kade uphkang na kun? Karai Kasang gaw shanhte hpe galoi aten kaw nna lata wa ai kun?

9 Daw  7 hta, anhte hkaja wa sai hte maren, kasa Yawhan gaw shingran langai hta, Yesu gaw Hkawhkam hku nna sumsing lamu hta, kaga Hkawhkam 144,000 hte rau, nga nga ai hpe mu wa ai. 144,000 gaw kadai ni rai a ta? “Shi [Yesu] a amying hte shi Kawa a amying tinang a lahtan hta ka kap ai masha” ngu Yawhan tsun ai. Bai nna, “shanhte gaw Sagu Kasha sa wa ai shara shagu de hkan nang ai ni rai nga ma ai; dai ni gaw, . . . shinggyim masha ni hta na mari la ai ni rai nga ma ai” ngu shi matut tsun ai. (Shingran 14:1, 4 hpe hti u.) 144,000 gaw Yesu hte rau hkawhkam hku nna mungkan ga hpe up na matu, Karai Kasang lata da ai sadi dung ai Hkristan ni re. Shanhte si ai shaloi sumsing lamu de hkrung rawt mat na re. (Shingran 5:10) Kasa ni a aten kaw nna, 144,000 hta lawm na hkawhkam ni hpe sadi dung ai Hkristan ni kaw nna Yehowa lata hpang wa ai.

10. Yehowa gaw masha ni hpe uphkang na matu, Yesu hte 144,000 hpe lata ai gaw hpa majaw tsawra myit nga ai lam re ai kun?

10 Yehowa gaw anhte hpe grai lanu lahku ai majaw, shinggyim masha hpe uphkang na matu Yesu hpe lata ya ai. Yesu gaw anhte hpe chye na ya ai majaw, kaja ai uphkang madu byin na ra ai. Shinggyim masha ni gara hku hkam sha ai, gara hku yakhkak hkrum ai hpe shi chye ai. Anhte hte seng nna, Yesu hkam sha ai lam Pawlu tsun wa ai. Shi gaw “anhte a gawng kya ai lam hpe mastan” dum nna, “lam shagu hta anhte zawn gung lau hkrum yu” ai wa re. (Hebre 4:15; 5:8) 144,000 mung, shanhte hta machyi  ai lam hte n hkum tsup ai hpe ninghkap ra ai lam ni nga ga wa ai majaw, masha a lam hpe chye na ai. Dai majaw, Yesu hte 144,000 gaw anhte gara hku hkamsha ai, gara manghkang ni hkrum ai hpe chye na ya ai lam anhte kam mai ai.

KARAI KASANG MUNGDAN GAW HPA GALAW YA NA KUN?

11. Sumsing lamu hta Karai Kasang a myit dik wa lu hkra akyu hpyi na matu, sape ni hpe Yesu hpa majaw sharin ya ai kun?

11 Sumsing lamu hta Karai a myit dik wa lu hkra akyu hpyi na matu, sape ni hpe Yesu sharin ya ai. Hpa majaw kun? Daw 3 hta anhte hkaja wa sai hte maren, Nat Satan gaw, Yehowa hpe ninghkap wa ai. Satan ninghkap ngut ai hpang, shi hte sadi n dung ai lamu kasa ni (sh) nat ni hpe sumsing lamu hta aten loi naw nga na matu, Yehowa ahkang jaw wa ai. Dai majaw, sumsing lamu hta Karai Kasang myit n dik nga ai. Daw 10 hta, Satan hte nat ni a lam grau chye lu na re.

12. Shingran 12:10 hta lawm ai ahkyak ai mabyin lahkawng gaw hpa rai a ta?

12 Yesu gaw, Karai Kasang Mungdan a Hkawhkam byin ai hte kalang ta Satan hpe gasat ai lam Chyum Laika hta tsun da ai. (Shingran 12:7-10 hpe hti u.) Daw kaji 10 hta, grai ahkyak ai mabyin lahkawng hpe tsun da ai. Karai Kasang a Mungdan hta Yesu Hkristu Hkawhkam hku nna uphkang ai hte, Satan hpe sumsing lamu kaw nna ga de jahkrat kau ai lam re. Byin ngut sai ndai lam ni hpe anhte hkaja yu ga.

13. Satan hpe jahkrat kau ngut ai hpang sumsing lamu hta hpa byin ai kun?

13 Satan hte nat ni sumsing lamu kaw nna jahkrat kau hkrum ai hpang, sadi dung ai lamu kasa ni kabu nga ai hpe Chyum Laika hta tsun da ai. “Sumsing lamu ni hte dai hte hta rawng nga ai ni e, kabu gara nga mu” ngu tsun da ai. (Shingran 12:12) Ya, sumsing lamu hta yawng gaw Karai a  myit ra ai hku hkan ai majaw, ngwi pyaw simsa nna kahkyin gumdin nga sai.

Satan hte shi a nat ni mungkan ga de jahkrat hkrum ai aten kaw nna mungkan hta yakhkak ai lam ni grau law wa ai. Ndai lam ni kade n na yang htum mat na

14. Sumsing lamu kaw nna Satan jahkrat hkrum ai hpang, mungkan hta hpa byin wa ai kun?

14 Raitim, mungkan ga gaw hkrit tsang hpa lam ni hte hpring nga ai. Hpa majaw nga yang, “Nat gaw, shi a nhtoi loi mi sha ngam sai chye wu ai majaw, n-yun bu let nanhte hpang de yu wa sai” ngu tsun da ai. (Shingran 12:12) Satan grai pawt nga ai. Shi gaw sumsing lamu kaw nna jahkrat kau hkrum nna, kade n na yang jahten hkrum sana hpe chye ai. Shi gaw mungkan ting hta yakhkak jamjau ai lam ni byin hkra galaw nga ai.

15. Mungkan a matu Karai a yaw shada lam gaw hpa rai kun?

15 Raitim, mungkan hte seng nna Karai a yaw shada lam gaw n galai shai ai. Mungkan hparadisu hta hkum tsup ai masha ni htani htana nga na hpe shi ra sharawng ai. (Shakawn 37:29) Dai hku byin wa hkra, Karai Kasang a mungdan gaw gara hku galaw ya na kun?

16, 17. Daniela 2:44 hta Karai a Mungdan hte seng nna hpa tsun da a ta?

16 Daniela 2:44 hta, “ndai hkawhkam ni a aprat e, sumsing lamu na Karai Kasang gaw, prat dingsa e n hten n mat ai mungdan de da nna, de a ahkang aya gaw maigan amyu a lata hta galoi mung shang lu na, n rai: dai gaw ya tsun ai mungdan ni yawng hpe, agrawp shamyit kau nna, dai nan htani htana a grin nga na ra ai” nga nna myihtoi htoi da ai. Dai myihtoi ga gaw, Karai Kasang Mungdan hte seng nna hpa sharin ya a ta?

17 Langai, “ndai hkawhkam ni a aprat” hta Karai a Mungdan uphkang hpang na ngu tsun ai. Lachyum gaw, mungkan ntsa hta shinggyim asuya ni naw uphkang nga ai aten hta, Karai a Mungdan uphkang hpang na hpe tsun mayu ai. Lahkawng, Karai a Mungdan gaw htani htana grin nga nna gara asuya mung malai shang lu na n re. Masum, shinggyim masha asuya ni hte Karai a Mungdan  lapran, majan byin wa na. Karai a Mungdan gaw, awng dang nna mungkan ting hpe Karai Kasang a asuya sha uphkang sana re. Dai shaloi, shinggyim masha ni gaw kaja htum asuya hpe lu la na re.

18. Ndai mungkan asuya ni hte Karai a Mungdan lapran byin ai hpang jahtum majan a mying gaw hpa rai kun?

18 Karai a Mungdan gaw shinggyim asuya ni a shara hta gara hku shang wa na kun? Hara Magedon ngu ai hpang jahtum majan n byin shi yang, nat ni gaw “chyahtum chyalai n-gun rawng ai Karai Kasang a nhtoi kaba shani na majan gasat na matu, mungkan ting na hkawhkam ni hpe jahpawng la” na re. Masha asuya ni hte Karai a Mungdan gaw gasat na re. —Shingran 16:14, 16; Jahtum Matsing 10 hpe yu u.

19, 20. Mungkan ga hpe uphkang na matu Karai Kasang a Mungdan hpa majaw ra ai kun?

19 Karai a Mungdan hpa majaw ra ai kun? Yawm htum lam masum nga ai. Langai, anhte gaw yubak masha ni re ai majaw machyi ai, si ra ai. Raitim, Karai a Mungdan hta anhte htani htana asak hkrung na lam Chyum Laika hta tsun da ai. Yawhan 3:16 hta “Karai Kasang a Kasha hpe kam sham ai ni nlang hte gaw, hten bya n hkrum ai sha, htani htana asak lu la mu ga nga, Karai Kasang gaw shi a Kasha shingtai hpe jaw kau ai kaw du hkra, mungkan ga hpe tsawra wu ai” nga nna tsun da ai.

20 Lahkawng, anhte gaw n hkru ai masha ni a lapran asak hkrung nga ai majaw re. Masha law law gaw masu ai, akyang n kaja ai. Anhte gaw dai lam ni hpe n yeng seng lu tim, Karai Kasang gaw dang di lu ai. N hkru ai amu matut galaw nga ai masha ni gaw, Hara Magedon hta jahten hkrum na re. (Shakawn 37:10 hpe hti u.) Masum, shinggyim asuya gaw atsam n nga ai, n hkru ai hte akyang hten ai. Shanhte gaw, masha ni hpe Karai Kasang a ga madat na matu n karum ya ai. Chyum Laika hta masha shada da “adip arip” nga ai ngu tsun da ai.—Hpaji Ningli 8:9.

21. Karai a Mungdan gaw mungkan ntsa hta Karai Kasang a myit ra ai hku gara hku galaw ya na kun?

 21 Hara Magedon ngut ai hpang, Karai a Mungdan gaw mungkan ga hta, Karai a myit ra ai hku galaw na re. Ga shadawn, Karai a Mungdan gaw Satan hte nat ni hpe yeng seng ya na re. (Shingran 20:1-3) Hpang jahtum hta machyi makaw hte si hkrung si htan nga sana n re. Gawng malai jahpu a majaw, sadi dung ai masha yawng gaw, Hparadisu hta htani htana nga lu na re. (Shingran 22:1-3) Karai Kasang a Mungdan gaw Karai Kasang a amying hpe shachyoi shapra ya na re. Dai lachyum gaw hpa rai a ta? Mungkan ntsa Karai a asuya uphkang ai shaloi, masha yawng Yehowa a amying hpe shakawn na ngu ai lachyum re.—Jahtum Matsing 20 hpe yu u.

YESU GALOI HKAWHKAM BYIN WA AI KUN?

22. Yesu mungkan ntsa nga ai aten (sh) hkrung rawt ai hpang kalang ta Hkawhkam n byin ai lam anhte gara hku chye lu a ta?

22 Yesu gaw, shi a sape ni hpe “Na a mungdan du wa ru ga” nga nna, akyu hpyi na matu sharin ya ai. Dai majaw, htawm hpang hta Karai a asuya byin wa na gaw danleng nga ai. Yehowa gaw shi a asuya hpe shawng gawde nna, Yesu hpe Hkawhkam aya tang na re. Yesu sumsing lamu de bai wa ai hte kalang ta hkawhkam byin ai kun? N re, shi naw la ra ai. Yesu lamu de lung ngut ai hpang she, Kasa  Pawlu hte Petru gaw, Shakawn Kungdawn 110:1 hta lawm ai Yesu hte seng ai lam hpe tsun dan ai. Dai myihtoi ga hta Yehowa gaw, “Na a gumlau ni hpe, na a lagaw nhpang e, lagaw kabye lahkum, ngai shatai kau ai du hkra, nye a hkra maga de naw dung nga u” nga nna tsun ai. (Kasa 2:32-35; Hebre 10:12, 13) Yehowa jaw na Hkawhkam aya hpe lu na matu, Yesu kade daram na hkra la ra ai kun?

Karai a Mungdan gaw Karai a myit ra ai hku byin wa hkra galaw ya na re

23. (a) Yesu gaw Karai asuya a Hkawhkam hku nna galoi aten hta uphkang hpang ai kun? (b) Hpang na daw hta anhte hpa lam hkaja lu na kun?

23 1914 n du shi ai shaning law law kaw nna, Chyum Laika myihtoi ga ni hta, 1914 ning gaw ahkyak ai shaning re ai hpe myit dingman ai Hkristan hpung langai gaw chye na wa ai. 1914 kaw nna mungkan a mabyin masa ni gaw dai myihtoi ga teng ai hpe sakse madun nga ai. Yesu dai shaning kaw nna, Hkawhkam hku uphkang hpang sai. (Shakawn 110:2) Dai hpang, kade n na yang Satan ga de jahkrat hkrum nna, ya “shi a nhtoi loi mi sha ngam sai.” (Shingran 12:12) Hpang na daw hta, anhte jahtum nhtoi hta asak hkrung nga ai hpe madi madun ai lam ni chye lu na re. Kade n na yang, mungkan ntsa Karai a myit ra ai hku byin wa hkra, Karai a Mungdan galaw ya na ni hpe hkaja lu na re.—Jahtum Matsing 21 hpe yu u.