Content de lai

Malawm Ni Hpe Lai U

Maumwi 78: Shakum Na Lata Laika

Maumwi 78: Shakum Na Lata Laika
Shakum na lata laika langai mi

Ndai hta hpa byin nga a ni? Masha ni lusha poi kaba galaw nga ma ai. Babelon hkawhkam gaw ahkyak ai masha kaba hkying mi hpe saw shaga tawn ai. Shanhte gaw Yerusalem mare na Yehowa a htingnu kata na la wa ai ja gawm, gumhpraw gawm hpe lang nga ma ai. Raitimung akajawng sha masha langai mi na lata layung dawng pru wa nna shakum ntsa e, laika ka wa ai Masha yawng gaw hkrit kajawng nga ma ai.

Belashaza hte shi a manam ni

Nebuhkadneza a kashu Belashaza gaw ya hkawhkam galaw nga ai. Shi a hpaji chye ai masha ni hpe alawan sha shaga mu, nga nna jahtau dat ai. ‘Ndai laika hpe hti nna ngai hpe lachyum tsun dan lu ai wa hpe kum hpa law law shagrau na nngai. Mungdan hta mung masum ngu na hkawhkam tai wa na ra ai,’ nga nna tsun ai. Raitimung shakum ntsa na laika hpe hpaji chye ai masha ni kadai mung nchye hti ma ai. De a lachyum hpe mung ntsun dan lu ma ai.

Hkawhkam wa a kanu gaw shaga garu ma ai nsen hpe na nna lusha gawk kaba nga ai shara de shang wa ai. ‘Nau hkum hkrit mu; chyoi pra ai karai ni hpe chye ai masha langai mi na a mungdan hta nga nga ai. Na a nji dwi Nebuhkadneza hkawhkam galaw nga ai shaloi, dai wa hpe hpaji chye ai masha ni ma hkra a ntsa e, ningtawn ningla hku nna san tawn da ai. Shi a mying gaw Daniela re. Shi hpe sa shaga wa shangun u; ndai ni a lachyum hpe shi tsun dan na ra ai,’ nga nna hkawhkam wa hpe tsun ai.

Dai rai nna Daniela hpe alawan sha sa shaga wa ma ai. Daniela mung shagrau ya ai kumhpa ni hpe ndang kau ai hpang, Yehowa gaw Belashaza a kaji dwi Nebuhkadneza hpe hkawhkam galaw nga ai kaw na hpa majaw jahkrat kau ai lam kaw nna tsun hpang ai. ‘Nebuhkadneza gaw gumrawng gumtawng ai myit rawng ai.’ Dai majaw ‘Yehowa gaw shi hpe ari jaw ai re,’ nga nna tsun ai.

‘Nang mung nji dwi a ntsa e, byin mat wa ai lam hpe chye nga ninglen Nebuhkadneza zawn, gumrawng gumtawng rai nga ndai. Yehowa a nawku htingnu na gawm ni hpe shapraw nna, dai hta bang lu ndai. Hpun ni nlung ni hte galaw tawn ai karai ni hpe shakawn ndai. Anhte a tsaw htum ai hpan da madu hpe gaw n shagrau ai sha nga ndai. Dai majaw Karai Kasang gaw ndai laika ni hpe ka na matu, lata hpe shangun dat ai.’

‘Ka tawn ai laika gaw,’ ‘MANA, MANA, TEKELA, PERESA,’ ngu ai re.

‘MANA ngu ai lachyum gaw, Karai Kasang gaw na a mungdan hpe hti yu nna jahtum kau nu ai. TEKELA ngu ai lachyum gaw, nang hpe joi hta shen yu yang, nang nkaja ai hpe mu lu ai. PERESA ngu ai lachyum gaw, na a mungdan hpe Medi hte Persi masha ni a lata de ap ya sai,’ nga ai.

Daniela ga shaga nga yang Medi hte Persi masha ni gaw Babelon hpe sa gasat nga sai. Mare hpe madu la nna, Belashaza hpe sat kau ma ai. Dai shana e nan, shakum ntsa na lata laika tsun ai hte maren, hkum tsup wa ai. Raitimung Israela masha ni ya hpa byin mat wa na ma ai kun? Anhte kade nna yang mu lu na re. Raitimung shawng nnan Daniela hkrum kadup ai hpe shawng yu yu ga.

Daniela 5:1-31.