Content de lai

Malawm Ni Hpe Lai U

Maumwi 110: Timohti-Pawlu A Shingtau Ningnan

Maumwi 110: Timohti-Pawlu A Shingtau Ningnan

Kasa Pawlu a makau na ndai lasha gaw Timohti re. Timohti gaw shi a nta masha ni hte rau Lustra mare kaw e nga ai. Shi a kanu amying hpe Uni rai nna, kawoi dwi amying Lui nga ma ai.

Lustra mare de Pawlu sa ai ndai lang hte masum lang rai sai. Lai wa sai laning mi jan hta Pawlu hte Barnaba gaw hkaw tsun na matu ndai mare kaw shawng kalang du sa wa ma ai.

Timohti hte Pawlu

Timohti hpe Pawlu hpa tsun nga ai hpe chye a ni? ‘Ngai hte Sila a hpang hkan na kun? Sum tsan mung na masha ni hpe hkaw tsun ai hta na a karum ai hpe ra nga ai,’ nga nna tsun nga ai.

‘Ngai hkan nang mayu ai,’ nga nna Timohti htan ai. Shing rai kade nna yang Timohti gaw shi a dum nta hte hka nna Pawlu hte Sila a hpang hkan nang ai. Shanhte a hkrun lam hte seng nna grai ntsun yang Pawlu kaning rai byin ai hpe shawng yu yu ga. Damasaku mare de sa wa ai lam ntsa hta, shi a man e Yesu shadan dan ai aten kaw na 17 ning daram na mat wa sai.

Matsing a ni? Pawlu gaw Yesu a sape ni hpe zingri na matu Damasaku mare de sa wa ai. Raitimung ya gaw shi hkum nan Yesu a sape langai mi tai nga sai. Hpang e Pawlu gaw Yesu a lam hpe hkaw tsun dan ai majaw hpyen nkau mi nra nna shi hpe sat kau na matu yaw wa ma ai. Raitimung sape nkau mi gaw Pawlu a asak lawt hkra karum ya ma ai. Shi hpe ka hta bang nna mare bunghku shinggan de shayu jahkrat dat ma ai.

Dai hpang e Pawlu gaw Antioki mare de sa nna hkaw tsun ai. Antioki mare hta Yesu a hpang hkan ai ni hpe Hkristan ni nga nna shawng shamying hpang ai. Antioki mare kaw nna Pawlu hte Barnaba hpe tsan ai mungdan ni kaw hkaw tsun na matu bai shangun dat ma ai. Shanhte sa ai hta na mare langai mi gaw Timohti nga ai Lustra mare kaw du ma ai.

Laning mi daram na ai hpang, lahkawng ngu na hkawm sa ai lang Lustra mare de bai du ma ai. Timohti gaw Pawlu yan Barnaba hte hkan nang ai shaloi, shanhte gara de sa ai hpe chye a ni? Ga sumla hpe yu dat u. Shanhte du hkawm ai shara nkau mi a lam hpe yu yu ga.

Shawng nnan e makau mayang na Ikoni ngu ai mare de sa ma ai. Dai hpang Antioki ngu ai mare de sa ai. Dai hpang Troa mare du hkra sa ma ai. De a hpang e, Hpilipyi, Htesaloni hte Beria mare ni kaw du ma ai. Ahten mare hpe ga sumla hta mu a ni? Dai kaw e Pawlu tara hkaw ai. Dai hpang e, Korinhtu mare e, laning mi jan tara hkaw ai. Hpang jahtum e, Ehpesu mare kaw jahkring mi shang ai. Dai hpang e Kesare de Sanghpawli hte wa ai. Bai nna Pawlu nga ai Antioki mare de bai nhtang wa ma ai.

Dai majaw, Timohti gaw hkrun lam deng hkying lam sa nna, “kabu gara shi ga” hkaw tsun ai hte, Hkristan hpung law law gaw ai amu hta Pawlu hpe karum ai. Nanhte kaba wa ai shaloi, Timohti zawn kangka ai mayam langai tai wa na kun?

Kasa 9:19-30; 11:19-26; Daw kaba 13 kaw na 17; 18:1-22.

Ga sumla

1. Roma; 2. Melite; 3. Beria; 4. Htesaloni; 5. Korinhtu; 6. Hpilipyi; 7. Ahten; 8. Kreti; 9. Troa; 10. Ehpesu; 11. Melitu; 12. Kolose; 13. Antioki; 14. Ikoni; 15. Lustra; 16. Kupru; 17. Antioki; 18. Kesare; 19. Yopa; 20. Damasaku; 21. Yerusalem; 22. Nammukdara kaba (Mediterranean)