Content de lai

Malawm Ni Hpe Lai U

Maumwi 102: Yesu Bai Hkrung Sai

Maumwi 102: Yesu Bai Hkrung Sai

Ndai anum hte masha lahkawng hpe chye ma ni? Ndai anum gaw Yesu a jinghku Magdala Mari rai nga ai. Palawng hpraw hpun tawn ai yan gaw lamu kasa rai ma ai. Mari shang yu nga ai ndai gawk kaji gaw, Yesu si ai hpang shi a moi mang hpe tawn ai shara re. Lup sung hku mung nga ma ai. Raitimung ya gaw moi mang nnga mat sai. Kadai la kau a ni? Yu yu ga.

Magdala Mari hpe lamu kasa ni tsun ai

Yesu si ai hpang hkinjawng ni gaw Pilat hpe ning nga nna tsun ma ai: ‘Yesu asak naw hkrung nga yang si ai hpang masum ya nhtoi hta bai hkrung rawt wa na nngai, nga nna tsun ga ai. Dai majaw lup sin na matu, hkang da ya mi. Shing rai jang shi a sape ni shi a moi mang hpe nlu lagu la nna si ai kaw na rawt sai nga nna ntsun lu na ma ai.’ Hpyen la nkau mi hpe shangun dat nna lup hpe sin na matu, hkinjawng ni hpe Pilat tsun dat ai.

Raitimung Yesu si ai hpang masum ya ngu na jahpawt jau jau e, Yehowa a lamu kasa langai mi akajawng sha dan pru wa ai. Lup hpe pat tawn ai nlung hpe galau kau nu ai. Hpyen la ni grai hkrit nna nwam shamu mat ma ai. Hpang jahtum e lup sung hku hta shanhte yu dat yang moi mang hpe nmu lu masai. Hpyen la nkau mi gaw mare de sa nhtawm, hkinjawng ni hpe tsun dan ma ai. Dai shaloi nhkru ai hkinjawng ni hpa galaw ai hpe chye a ni? Hpyen la ni hpe gunhpraw jaw nhtawm masu tsun shangun ma ai. ‘Anhte yup pyaw nga yang shi a sape ni sa wa nhtawm moi mang hpe sa lagu la ma ai ngu tsun mu,’ nga nna hkinjawng ni gaw hpyen la ni hpe htet dat ma ai.

Dai shaloi e Yesu a jinghku numsha nkau mi lup de sa wa ma ai. Lup hta kaman re ai hpe mu ai majaw mau ma ai. Dai shaloi kabrim ai hpun palawng hpun tawn ai lamu kasa lahkawng akajawng sha dan pru wa ai. Yesu hpe hpa rai ndai yang e tam nga ma ni? Shi hkrung rawt wa sai. Shi a sape ni hpe ndai lam alawansha wa tsun dan mu,’ nga ai. Numsha ni kade daram lawan nna kagat na ma hka! Raitimung masha langai mi shanhte hpe lam lapran e jahkring ai. Dai wa gaw kadai wa re ai hpe chye ma ni? Yesu re. ‘Nye a sape ni hpe wa tsun dan mu,’ nga ai.

Numsha ni gaw sape ni hpe, Yesu bai hkrung wa sai, anhte mu ga ai, nga nna wa tsun dan ma yang sape ni gaw kam na yak ma ai. Petru yan Yawhan gaw tinang nan mu mayu ma ai majaw, lup de kagat sa wa ma timung lup hta hpa mung nngai sai. Petru yan Yawhan dai shara kaw na pru wa ma yang Magdala Mari hti ngam nga ai. Dai shaloi shi kata de yu dat yang lamu kasa lahkawng hpe mu ai.

Yesu a moi mang hpa byin mat ai hpe chye ma ni? Dai hpe mat hkra Karai Kasang galaw dat ai. Yesu si wa yang na hkum hte Yesu hpe Karai Kasang sharawt ai nrai . Yesu hpe lamu kasa ni zawn wenyi hkum jaw ai. Raitimung shi bai hkrung sai re, ngu ai lam sape ni hpe madun dan na matu masha ni mu lu ai hkum hpe Yesu lang lu ai. Ndai lam hpe ya chye lu na re.

Mahte 27:62-66; 28:1-15; Luka 24:1-12; Yawhan 20:1-12.