Content de lai

Malawm Ni Hpe Lai U

Maumwi 63: Hpaji Rawng Ai Hkawhkam Shawlumon

Maumwi 63: Hpaji Rawng Ai Hkawhkam Shawlumon

Shawlumon hkawhkam galaw ai shaloi asak naw kaji ai. Shi gaw Yehowa hpe grai tsaw ra ai. Shi kawa sharin ya ai hpaji ga ni hpe madat la ai. Yehowa gaw Shawlumon hpe ra sharawng ai: ‘Shing rai lana mi hta e, shi hpe yup mang langai mi mu shangun nna, Shawlumon e nang hpe ngai hpa jaw na rai kun?’ nga nna san ai.

Shawlumon gaw: ‘Nye a Karai Kasang Yehowa e, ngai gaw asak naw kaji ai; kaning rai up hkang na hpe rai nchye nngai; dai majaw madu a amyu ni hpe teng man ai hte up hkang chye ai hpaji byeng- ya jaw rit,’ nga nna hpyi ai.

Shawlumon hpyi ai ga hpe Yehowa ra sharawng ai. Dai majaw: ‘Nang gaw asak galu hkra nga na matu hte sutsu na matu nhpyi ai sha, hpaji byeng-ya hpe hpyi ai majaw, mungkan hta nga ai masha yawng hta grau ai, hpaji byeng-ya hpe ngai jaw na nngai; bai nna nang nhpyi shalawm ai sutgan hte, arawng sadang hpe mung ngai naw kahtap jaw na nngai,’ nga nna tsun ai.

Dai hpang kade nna yang, anum lahkawng gaw, yak ai manghkang amu langai mi hte seng nna, Shawlumon hpang de sa wa ma ai. Langai mi gaw, ‘ndai num hte ngai nta langai mi hta rau nga ga ai;’ngai shadang sha langai mi shaprat nngai; dai hpang lahkawng ya na ai hpang e, ndai num mung shadang sha langai mi shaprat wa ai; lani mi hta e shi a kasha si mat ai shaloi, shi a ma chyasi hpe ngai kaw sa tawn da nna nye a kasha hpe shi pawn la kau ai; ngai yup hprang wa yang si nga ai ma hpe ngai mu nngai; nye a kasha nre ai hpe mung chye kau ai,’ nga nna tsun dan ai.

Dai hpang e kaga num langai mi gaw: ‘Nre ai. Asak hkrung nga ai ma gaw nye a kasha re. Si taw ai ma gaw shi a kasha re,’ nga nna tsun ai. Shawng na anum mung: ‘Nre ai law, si taw ai ma gaw na a kasha re. Asak hkrung taw ai ma gaw nye a kasha re,’ nga nna bai tsun ai. Ndai zawn anum lahkawng gaw dang rang hkat nga ma ai. Shawlumon gara hku galaw ya na kun?

Nhtu langai mi la shangun dat ai. Nhtu la wa ma ai shaloi shi gaw: ‘Asak hkrung ai ama hpe lahkawng brang di mu; dai anum yan hpe chyen mi hpra garan ya mu,’ nga nna tsun ai.

‘Hkum di mu!’nga nna kanu majing gaw jahtau dat ai. ‘Ama hpe hkum sat kau mu. Shi hpe mahtang ya kau mu,’ nga nna tsun ai. Raitimung kaga num gaw, ‘kadai hpe mung hkum jaw mu. Lahkawng brang she di dat mu,’ nga ai.

Hkawhkam Shawlumon gaw yak manghkang amu hpe hparan nga ai

Hpang jahtum e Shawlumon gaw: ‘Ama hpe hkum sat kau mu! Shawng nnan na anum hpe ya kau mu; shi gaw kanu majing re,’ nga nna tsun ai. Kanu majing gaw ama hpe tsaw ra ai majaw, n si shangun mayu ai. Dai majaw kaga num hpe jaw na matu, n lahpawt ai hpe Shawlumon gaw chye kau ai. Ndai manghkang amu hpe Shawlumon ndai hku hparan jeyang ya ai hpe, masha ni na la ma ai shaloi, ndai zawn hpaji rawng ai hkawhkam lu ai majaw grai kabu ma ai.

Shawlumon up hkang ai aten hta e, Karai Kasang gaw, Hkaulan mam, mu yaw, tsabyi si, lakum si ni hte kaga lusha ni law law jaw ai hku nna, masha ni hpe shaman chyeju jaw ai. Masha ni mung atsawm sha lu bu lu hpun nna dum nta kaja ai hta nga lu ma ai. Masha ni yawng gaw nga mu nga mai hte hkru kat lu ma ai.

1 Hkawhkam 3:3-28; 4:29-34.