Content de lai

Malawm Ni Hpe Lai U

Maumwi 55: Ma Kaji Langai Karai Kasang Hpe NawKu Ai

Maumwi 55: Ma Kaji Langai Karai Kasang Hpe NawKu Ai

Ndai la sha gaw yu tsaw ra na zawn nsan a ni? Shi a amying gaw Samuela re. Samuela a baw hta jum ai masha kaba wa gaw, Israela mungdan a hkinjawng agyi Eli ngu ai wa re. Samuela hpe Eli hpang de shaga sa ai yan gaw Samuela a kawa Elakana hte kanu Hana rai ma ai.

Tara agyi Eli hte Samuela hkrum nga ai

Samuela a asak gaw mali, manga ning sha naw re ai. Raitimung shi gaw Yehowa a nawku sum nga ai dai shara kaw, Eli hte, kaga hkinjawhg ni hte nga na re. Elakana hte Hana gaw grai naw kaji ai Samuela hpe nawku sum hta e, Yehowa hpe nawku na matu hpa majaw sa ap yu ma ai kun? Anhte yu yu ga.

Ndai lam ni garai nbyin ai loi shawng shaning e, Hana gaw grai yawn kau ai. Shi hta Kasha nlu nna, kasha langai mi grai lu mayu ai majaw rai sai. Shing rai Hana gaw lani mi hta e, Yehowa a nawku sum de sa nna: ‘O Yehowa ngai hpe hkum malap kau et. Ngai hpe shadang sha langai mi jaw yang gaw, dai shadang sha hpe madu hpe prat dingsa nawku na matu, ap ya na nngai,’ nga nna akyu hpyi wu ai.

Yehowa mung Hana a akyu hpyi ai ga hpe madat ya ai. De a hpang shata tsawm ra na wa jang, Samuela hpe shangai wa ai. Hana gaw shi a shadang sha hpe grai tsaw ra ai majaw, naw kaji ai aten kaw nna, shi a kasha hpe Yehowa a lam sharin ya ai. Shi a madu wa hpe mung ning nga nna tsun ai: ‘Samuela hpe chyu hka ten du ai hte, ngai shi hpe nawku sum de woi sa nna Yehowa hpe nawku shangun na nngai,’ nga nna tsun ai.

Hana hte Elakana gaw tsun ai hte maren, Samuela hpe woi sa ma ai hpe ndai sumla hta e mu lu ai. Kanu yan kawa atsawm sha sharin tawn nna, Yehowa a nawku sum hta Yehowa hpe nawku lu ai majaw, Samuela grai kabu ai. Shaning shagu Hana hte Elakana gaw nawku na matu, ndai ahkyak ai nawku sum de sa ma ai. Shan a shadang sha hpe mung sa jahkrum ma ai. Hana gaw Samuela a matu, shi chywi tawn ai lawng hkai palawng ningnan langai mi shaning shagu la sa wa ai.

Shaning law law lai mat wa ai hte maren, Samuela gaw Yehowa a nawku sum hta, matut nna nawku ai. Shi hpe Yehowa mung masha ni mung, tsaw ra ai. Raitimung hkinjawng agyi Eli a shadang sha Hopni yan Hpineha gaw, nkaja ma ai. Nshawp nkap ai amu hpe shanhte galaw ma ai. Masha nkau mi hpe mung Yehowa a ga n madat hkra galaw ma ai. Eli gaw shanhte hpe hkinjawng amu kaw na jahkring kau mai ai, raitimung n jahkring kau ai sha tawn da ai.

Samuela gaw nawku sum hta byin nga ai nhkru nkaja ai amu ni a majaw Yehowa hpe nnawku ai sha nnga mat ai. Raitimung Yehowa hpe teng teng tsaw ra ai masha ni nlaw ma ai rai nna Yehowa mung masha ni hpe shingran njaw ai aten grai na sai. Samuela asak loi mi grau kaba wa ai shaloi, matut nna ndai hku byin wa ai.

Nawku sum hta e, Samuela yup nga yang nsen langai mi gaw shi hpe jasu dat ai: ‘Ngai nga nga nngai,’ nga nna htan dat ai. Bai nna yup ra kaw na rawt nhtawm, Eli hpang de gat sa nna, ‘Madu shaga nna ngai sa wa ai,’ nga nna tsun dat ai.

Raitimung Eli gaw: ‘Ngai n shaga nngai; bai wa yup nga su,’ ngu dat wu ai. Shing rai Samuela gaw bai wa yup nga ai.

Lahkawng lang ngu na bai shaga ai: ‘Samuela e,’nga ai. Samuela mung rawt nna Eli hpang de bai gat wa ai. ‘Madu shaga ai majaw wa nngai, ngai nga nga nngai’ nga ai. Raitimung Eli gaw: ‘Ngai sha e ngai n shaga nngai, wa yup nga u,’ nga nna bai wa shangun dat ai. Samuela mung bai wa yup nga ai.

‘Samuela e’ nga nna masum lang ngu na bai shaga ai. Samuela mung Eli hpang de bai gat wa ai. ‘Ngai nga nga nngai ndai lang gaw nang ngai hpe kaja wa shaga ai rai na re,’ nga nna tsun ai. Shaga ai wa gaw Yehowa re ai hpe ya Eli chye sai. Dai rai nna Samuela hpe ‘naw wa yup nga u, kalang bai shaga dat yang “Yehowa e tsun rit, na a mayam wa madat nga ai” nga nna htan u,’ nga ai.

Samuela mung Yehowa kalang bai shaga ai shaloi, dai hte maren htan ai. Dai shaloi Yehowa gaw Eli hte shi a shadang sha ni hpe ari jaw na lam Samuela hpe tsun dan ai. Dai hpang e Hopni hte Hpineha yan gaw Hpilisti masha ni hte hpyen gasat nga yang si mat ai. Dai shi ga hpe Eli na ai shaloi, shing du de kadang hkrat nna du daw ai majaw shi mung si mat sai. Dai majaw Yehowa tsun ai ga hte maren byin wa ai.

Samuela mung asak kaba wa nna Israela masha ni a hpang jahtum na tara agyi tai wa ai. Shi asak kaba wa jang masha ni gaw: ‘Anhte hpe up hkang na matu hkawhkam langai mi sharawt ya mi,’nga nna hpyi ma ai. Samuela gaw nkam galaw ya ai. Hpa majaw nga yang shanhte a hkawhkam majing gaw Yehowa re. Raitimung Yehowa gaw masha ni hpyi ai hte maren galaw ya u, nga nna Samuela hpe tsun ai.

1 Samuela 1:1-28; 2:11-36; 4:16-18; 8:4-9.