Content de lai

Malawm Ni Hpe Lai U

Maumwi 50: Magrau Grang Ai Anum Lahkawng

Maumwi 50: Magrau Grang Ai Anum Lahkawng

Israela masha ni jam jau hkrum ma ai shaloi, Yehowa hpe hpyi jahtau ma ai. Yehowa mung magrau grang ai ningbaw ni hpe paw pru shangun nna, shanhte hpe karum ya ai. Dai ningbaw ni hpe Chyum Laika hta tara agyi ni nga nna shamying da ai.Yawshu gaw shawng nnan na tara agyi langai mi re. Shi a hpang na tara agyi ni gaw Otniela, Ehud, hte Shamga ni rai ma ai. Israela masha ni hpe hkye la ai masha ni hta na Debora hte Yaela ngu ai anum lahkawng mung lawm ai.

Barak hpe Debora ahga nga ai

Debora gaw myihtoi langai mi re. Yehowa gaw htawm hpang hte seng ai shi ga ni shi hpe chye shangun ai. Yehowa tsun ai ga shi kaw nna kalang mi masha ni hpe bai tsun dan ai. Debora gaw tara agyi mung re. Shi gaw bum ga na namhtan hpun nhpang e dung nna, masha ni mung yak mang hkang hparan ya na matu shi kaw sa wa ma ai.

Dai aten e Yabin gaw Hkanan mung na hkawhkam rai nga ai. Shi hta hpyen leng 900 lu ai. Shi a hpyen hpung gaw grai n-gun atsam kaba ai. Dai majaw Israela masha law law Yabin a mayam tai mat ma ai. Yabin hkawhkam a hpyen du kaba gaw, Sisera ngu ai wa re.

Lani mi hta e, Debora gaw tara agyi Barak hpang de masha shangun dat nna: ‘Masha 10,000 hpe shaga nna Tabora bum de lung wa u . Sisera hpe na a hpang de shangun dat na nngai. Shi hte shi a hpyen ntsa e awng dang na ahkang ngai jaw na nga nna Yehowa tsun ai,’ nga ai.

Barak gaw, ‘nang ngai hte hkan nang yang sa wa nngai’ nga nna Debora hpe bai tsun ai. Debora mung hkan nang ai. Raitimung Barak hpe shi ning nga nna tsun ai. ‘Awng dang wa yang nang arawng lu na nrai. Hpa majaw nga yang Sisera hpe num langai mi a lata hta Yehowa ap ya na nga ai.’ Byin wa ai lam gaw ndai hku rai nga ai.

Barak gaw Tabora Bum kaw na yu nna Sisera a hpyen ma ni hte hkrum kadup ai. Yehowa mung dai shara hta akajawng sha shau shaing dat ai. Sisera a hpyen ma ni law law hka hta lup si mat ma ai. Dai rai nna Sisera gaw hpyen leng kaw na rawt hprawng mat wa ai.

Barak, Yaela, hte Sisera

Tsawm ra na jang Sisera gaw Yaela a ginsum hta du wa ai. Shi gaw Sisera hpe ginsum de shaga la nna nga chyu jaw lu ai. Sisera gaw yup shamwi malap mat wa ai. Dai shaloi Yaela gaw hpri sumprat langai mi la nna, n hkru ai Sisera a baw hta adup jung dat ai. Hpang e Barak du wa ai shaloi, Yaela gaw si taw nga ai Sisera hpe madun dan ai. Dai majaw Debora tsun ai ga teng ai nrai ni?

Hpang jahtum e Yabin hkawhkam mung sat kau ai hkrum sai. Dai majaw Israela masha ni mung aten kadun mi simsa ai hte nga lu ma ai.

Tara agyi 2:14-22; 4:1-24; 5:1-31.