Content de lai

Malawm Ni Hpe Lai U

Maumwi 24: Yosep Shi a Kahpu Ni Hpe Dinglik Yu Ai

Maumwi 24: Yosep Shi a Kahpu Ni Hpe Dinglik Yu Ai

Yosep gaw shi a kahpu 10 ni, ya du hkra matsan dum chye ai myit, nrawng ma ai kun nga nna, chye mayu ai. Dai rai nna: ‘Nanhte kin-yu ni rai madai. Anhte mung dan a n-gun kya ai hpe, kin-yu sa yu ai ni rai nga ai,’ nga nna tsun ai.

Shanhte gaw, ‘Anhte kin-yu nrai ga ai. Ding man ai masha ni rai ga ai. Anhte yawng kahpu kanau re. Marai 12 rai ga ai. Langai mi gaw n nga mat sai. Hpungdim mahtang gaw nta kaw wa hte nga nga da sai,’ nga nna tsun ma ai.

Yosep gaw shanhte a ga hpe nkam ai zawn rai masu ai. Simun ngu ai kahpu wa hpe htawng sharawng da nna, kaga ni hpe gaw nai mam jaw dat nna, nta de nhtang wa shangun ai. ‘Raitimung nanhte bai nhtang sa wa ai shaloi, nanhte a kanau hpungdim hpe woi sa wa mu,’ Nga nna htet dat ai.

Shi a kahpu ni Hkanan mung de, bai du wa ai shaloi, byin ai lam shagu hpe, shanhte a kawa Yaku hpe tsun dan ma ai. Yaku gaw grai yawn ai. ‘Yosep nnga mat sai. Ya kalang bai Simun mung nnga sai. Nye a kasha hpungdim hpe shaga sa na matu, ngai ahkang njaw lu ai’ nga nna tsun ai. Raitimung shanhte sha na matu, lu sha nlu mat wa ai shaloi, Ben-Yamin hpe woi sa wa shangun ai. Shing rai yang she lu sha lu la na re.’

Shi a kahpu ni bai nhtang sa wa ai hpe, Yosep hkap mu ai. Shi a kanau Bin-yamin lawm sa wa hpe mu jang, grai gabu ai. Ndai ahkyak ai masha wa gaw, Yosep re ai lam shanhte langai mi mung nchye ma ai. Ya Yosep gaw, shi hte kawa bung nna, kanu nbung ai kahpu 10 ni hpe maga mi hku nna, bai chyam dinglik yu ai.

Shi a kahpu ni a hting jan hta, lu sha hpring hkra mayam ni hpe, bang shangun ai. Raitimung shanhte n chye hkra, Bin-Yamin a hting jan hta, manu dan ai shi a gumhpraw gawm hpe bang dat ai. Shanhte pru nna, ram ram hkawm sa wa ma ai shaloi, Yosep gaw shi a mayam ni hpe shanhte hpang da hkan shachyut shangun ai. Shanhte hpe hkan dep ai shaloi, mayam ni gaw ning nga nna tsun ma ai: ‘Anhte a madu a gumhpraw gawm hpe, nanhte hpa rai lagu la ma ni?’ nga nna tsun ma ai.

‘Shi a gawm hpe anhte n lagu ga ai,’ nga nna, kahpu ni bai nhtang tsun ma ai. ‘Anhte hta na langai ngai kaw mu yang, dai wa hpe sat mu’ nga nna tsun ma ai.

Dai majaw shi a mayam ni gaw, hting jan shagu kaw sawk yu ma ai. Dai shaloi ndai sumla hta mu ai hte maren, Bin-Yamin a hting jan hta gumhpraw gawm hpe mu ma ai. Mayam ni tsun ai gaw: ‘Kaga ni yawng wa lu ai. Bin-Yamin gaw anhte hte hkan wa ra ai,’ nga nna tsun ma ai. Kawa bung nna kanu nbung ai kahpu 10 ni gaw, kaning de na masai kun?

Shanhte yawng Bin-yamin hte rau, Yosep a nta de hkan nang wa ma ai. Yosep gaw shi a kahpu ni hpe tsun ai: ‘Nanhte yawng nta de nhtang wa lu ai; Ben-Yamin gaw ngai kaw mayam galaw lu na’, nga ai.

Dai shaloi, Yuda gaw; ‘ Ndai ma nlawm ai sha nta de nhtang wa yang, nye wa gaw si na re. Nye wa gaw shi hpe grai tsaw ra ai. Dai majaw ngai hpe mahtang madu a nta hta mayam hku tawn u, ama hpe gaw nta da nhtang wa shangun u’ nga nna tsun ai.

Shi a kahpu ni gaw myit malai sai lam hpe, Yosep chye nu ai. Shanhte shawng na zawn nrai sai. Matsan dum chye ai myit rawng masai. Dai majaw ya Yosep gaw, hpa galaw sana kun? Yu yu ga.

Ningpawt Ninghpang 42:9-38; 43:1-34; 44:1-34.

Yosep a kahpu ni lagu ai ngu shadu ai