Content de lai

Malawm Ni Hpe Lai U

Maumwi 11: Shawng Nnan Na N-Goi La Tum

Maumwi 11: Shawng Nnan Na N-Goi La Tum

Noa hte shi a nta masha ni sanghpaw li kata na pru wa ai shaloi, shawng nnan e, hpa galaw ma ai hpe chye a ni? Karai Kasang hpe shagu hkungga nat nawng ya ma ai. Kumhpa hpe nawng jaw ai re. Lawu na sumla hta e, shi shagu hkungga nat nawng nga ai hpe mu lu ai. Shau-ing ai hka kaba kaw na shi a kun dinghku hpe Karai Kasang hkye la ai majaw, chyeju dum ai hku nna, dusat shagu hkungga nawng ya ai re.

Sanghpaw li hte n-goi la tum

Shi nawng ya ai shagu hkungga hpe Karai Kasang ra sharawng ya na zawn nawn a ni? Teng ai. Karai Kasang ra sharawng ai. Dai majaw mungkan hpe shau-ing nna, galoi mung bai n jahten sana re, nga nna Noa hpe shi ga sadi jaw ai.

Kade nna yang hkarang kawng mahkra hkun hkraw wa ai. Noa hte shi a nta masha ni mung Sanghpaw li shinggan de prat ningnan, hpang ma ai. Karai Kasang shanhte hpe shaman ya ai gaw: ‘kashu kasha law law shaprat wa mu; ginding aga mahkra hta shinggyim masha ni hte hpring wa hkra law htam jat sa wa mu,’ nga tsun ai.

Raitimung hpang e shinggyim masha ni gaw, shau-ing ai hka kaba a lam hpe na shagu, ndai zawn re ai shau kalang bai ing wa na hpe, hkrit kajawng na ma ai. Dai majaw ginding aga hpe, shau-ing ai hka kaba hte galoi mung bai n jahten na sai, nga ai shi a ga sadi hpe bai myit dum na matu, kumla langai mi jaw ai. Kaning re kumla re ai hpe chye ani? Dai gaw n-goi la tum re da.

Noa hte shi a nta masha ni

Marang htu ai hpang jan mai wa ai shaloi, lamu ntsa hta n-goi la tum hpe mu lu ai. N-goi la tum kaw e tsawm la ai nsam amyu shagu lawm ai. N-goi la tum hpe mu yu sani? Sumla kaw na n-goi la tum hpe mu ani?

Karai Kasang gaw ning nga nna tsun ai: ‘Shinggyim masha ni hte dusat nhprang amyu baw shagu hpe shau-ing ai hka hte galoi mung bai n jahten kau na nngai; sumwi ntsa e, nye a n-goi la tum hpe ngai tawn da na nngai, n-goi la tum paw pru wa ai shaloi, ngai mu nna nye a ga sadi hpe, dum na nngai,’ nga nna tsun ai.

Dai majaw n-goi la tum hpe mu shagu hpa hpe myit dum na ma ani? Teng ai. Hka hte mungkan ga hpe, galoi mung kalang bai n jahten kau na nngai, nga ai Karai Kasang a ga sadi hpe, myit dum na matu re.

Ningpawt Ninghpang 8:18-22; 9:9-17.