Content de lai

Anhte A Hkristan Prat Hte Magam Zuphpawng A Matu Lam Matsun Ni

Anhte A Hkristan Prat Hte Magam Zuphpawng A Matu Lam Matsun Ni

Malawm Ni

 

Laika Pang

Ga Nhpaw

 2

Karai A Mungga Kaw Na Sut Gan Ni

 3

Hkaw Tsun Bungli Hta Jailang U

 4

Hkristan Prat Hkrun Lam

 5

Hpungdim Dat Lam Matsun Ni

 6

Laika Hti Ai Hte Sharin Achyin Ai Lam Hta Shakut Nga U

 7

Sharin Achyin Ai Lam

 8

Aten

 9

Hpung Kawan Sa Ai Aten

 10

Ninghtawn Zuphpawng (sh) Ginwang Zuphpawng Bat

 11

Myit Dum Poi Bat

 12

Prat Hte Magam Zuphpawng Hpaawn

 13

Prat Hte Magam Zuphpawng Tingnyang Up

 14

Myitsu Salang Hpung A Bawng Jahkrup Hpaawn

 15

Hpaji Jaw Ai Wa

 16

No.2 Jawng

 17

Video Ni

 18

1. Anhte A Hkristan Prat Hte Magam Zuphpawng hpe, Anhte A Hkristan Prat Hte Magam Zuphpawng Shaman Laika Buk hta madung nna, lawu na lam matsun ni hte maren galaw mat wa na re. Jawng ma lit galaw mayu ai hkaw tsun masha yawng hpe, jahpan bang na matu saw shaga ging ai. Nawku hpung hte myit rawt let jawm galaw nga ai kaga masha ni mung, Chyum Laika sharin ya ai lam ni hpe myit hkrum nna, Hkristan tsang madang ni hte maren asak hkrung nga ai rai yang jahpan bang mai ai.​—⁠be laika man 282.

 2. Ga Nhpaw: Minit 3 (sh) dai hta yawm. Bat shagu hta, mahkawn hkawn nna akyu hpyi ngut ai hpang, Prat Hte Magam Zuphpawng a tingnyang up gaw, Prat hte Magam Zuphpawng A Mahtai Laika kaw na, ga san hpe dan dawng hkra tsun ai hte hpawn, lamang ni hpe myit lawm let la nga na matu shadut ya na re.

 3. Karai A Mungga Kaw Na Sut Gan Ni:

  • Mungga: Minit 10. Madung lam hte ahkyak ai lam lahkawng masum hpe Prat Hte Magam Zuphpawng Shaman Laika Buk hta madun da ai. Ndai mungga hpe myitsu salang (sh) atsam nga ai magam tau langai hpe lit jaw na re. Bat shagu Chyum hti lamang hta Chyum Laika a laika nnan langai hpe hpang ai nga yang, dai laika hpe shachyen ya ai video hpe madun na re. Mungga htawn ai wa gaw, video hta lawm ai lam hte madung lam hpe matut mahkai nna tsun dan na re. Raitim, shaman laika buk hta lawm ai kaga lam ni hpe mung tsun dan ging ai. Aten lu yang, dai hta lawm ai sumla hte Chyum Laika madung lam ni hpe atsawm sang lang ging ai. Dai ni yawng gaw, tsun nga ai lam hpe madi shadaw ya na matu re.

  •   Wenyi Sut Gan Ni Hpe Sawk Sagawn Ai Lam: Minit 8. Ndai daw gaw, ga nhpaw hte hpungdim ga n lawm ra ai sanhtai lamang re. Ndai daw hpe, myitsu salang (sh) atsam nga ai magam tau langai woi awn ra ai. Woi awn ai wa gaw, madung lam 4 hta lawm ai kaw nna, buga nawku hpung hte seng ai daw a matu aten gara hku grau jaw na hpe dawdan ging ai. Raitim, shawa masha ni hpe ga san yawng san ra ai. Shawng na ga san lahkawng hta lawm ai Chyum daw yawng hpe hti na (sh) n hti na hpe gaw dawdan mai ai. Mahtai jaw ai ni gaw second 30 (sh) dai hta yawm nna jaw ra ai.

  • Chyum Hti Lamang: Minit 4 (sh) dai hta yawm. Ndai daw gaw, hpunau langai hpe lit jaw na re. Lit ang ai jawng ma gaw, shi hti na lam hpe shachyen ai (sh) hpungdim dat ai ni n galaw ai sha hti ging ai. Tingnyang up gaw, tup hkrak jaw hkra hte chye na loi hkra hti ai, tsun mayu ai lam dan dawng hkra htap htuk ai ahkyak shatai lam, nsen galai shai ai lam, hkring sa ai lam, manu hkra hti ai lam ni hta, karum ya na matu atsawm myit maju jung ging ai.

  4. Hkaw Tsun Bungli Hta Jailang U: Minit 15 (sh) dai hta yawm. Shang lawm ai ni yawng, hkaw tsun bungli a matu shaman shakyang lu hkra, hkaw tsun atsam rawt jat hkra, ndai daw hpe lajang da ya ai re. Jawng ma lit lu ai ni gaw, hkaw tsun ten hte bai kawan ai lam ni hpe, Prat Hte Magam Zuphpawng Shaman Laika Buk a, laika man langai hta madun da ai ni hpe madung tawn ging ai. Anhte a Sharin Achyin Hkingrai kaw na, laika langai ngai (sh) video langai ngai hpe, shachyen ya na (sh) n shachyen ya na ngu ai hpe, hkaw tsun masha ni dawdan mai ai. Prat Hte Magam Zuphpawng Shaman Laika Buk hta, galaw dan ra na lam san san matsun ya ai ni nga ai. Lit ang ai ni gaw kalang lang, jaw da ai aten hpring na matu, kaga lam ni hpe bai kahtap tsun n ra ai. Atsawm shajin da ai hkrang shala ni gaw, minit mi (sh) dai hta jau nna ngut chye ai. Ra wa yang, dai lit hpe myitsu salang ni mung lu na re.

  • Tsun Shaga Ladat Video Ni: Shata shagu a bat nkau mi hta, tsun shaga ladat video ni hpe madun nna bawngban mat na re. Dai video ni gaw, hkaw tsun ten, shawng nnan bai kawan hte No.2 lang bai kawan ai lam ni hpe madun da ya ai. Ndai daw hpe, Prat Hte Magam Zuphpawng tingnyang up woi awn mat na re.

  • Hkaw Tsun Ten: Ndai jawng ma lit hpe hpunau (sh) nauna galaw mai ai. Karum ai ni gaw, hpunau shada, nauna shada sha byin ging ai. Dai hku n rai yang, nta masha shada rai ra ai. Lit ang ai wa hte karum ya ai wa gaw, dung mai ai (sh) tsap mai ai. Buga hte htap htuk ai shachyen shaga ga ni hpe, lit ang ai wa lata ging ai. Bawngban na matu, tsun shaga ladat ni hpe madung nna tsun ging ai.

  • Shawng Nnan Bai Kawan: Ndai jawng ma lit hpe hpunau (sh) nauna galaw mai ai. Karum ai ni gaw, hpunau shada, nauna shada sha byin ging ai. (km 5/97 laika man 2) Lit ang ai wa hte karum ya ai wa gaw, dung mai ai (sh) tsap mai ai. Hkaw tsun ten hta, myit lawm ai masha hpang de, shawng nnan bai kawan ai shaloi, gara hku tsun ra na hpe hkrang shala dan ging ai. Bawngban na matu, Prat Hte Magam Zuphpawng Shaman Laika Buk kaw na tsun shaga ladat ni hpe, madung nna tsun ging ai.

  • No.2 Lang Bai Kawan: Ndai jawng ma lit hpe hpunau (sh) nauna galaw mai ai. Karum ai ni gaw, hpunau shada, nauna shada sha byin ging ai. (km 5/97 laika man 2) Lit ang ai wa hte karum ya ai wa gaw, dung mai ai (sh) tsap mai ai. Shawng nnan bai kawan ai shaloi, myit lawm ai lam madun ai wa hpang de, bai kawan ai shaloi gara hku tsun ra na hpe, hkrang shala dan ging ai. Bawngban na matu, tsun shaga ladat ni hpe, madung nna tsun ging ai.

  • Chyum Ga Sharin: Ndai jawng ma lit hpe hpunau (sh) nauna galaw mai ai. Karum ai  ni gaw, hpunau shada, nauna shada sha byin ging ai. (km 5/97 laika man 2) Lit ang ai wa hte karum ya ai wa gaw, dung mai ai (sh) tsap mai ai. Ndai daw hpe, shinggan hta Chyum ga sharin galaw ai lamang a daw nkau mi hpe hkrang shala ging ai. Lit ang ai wa gaw, ga nhpaw (sh) hpungdim ga hte seng ai, hkaja na hti hkum hpe shaman shakyang nga ai aten hta lai nna, ndai daw hta ga nhpaw (sh) hpungdim ga ni n tsun ra ai. Matsun da ai laika hpe nsen shapru nna n hti ra ai. Hti mayu yang mung mai ai. Tang du ai sharin achyin atsam hpe, dan dawng shangun ging ai.

  • Mungga: Ndai jawng ma lit hpe hpunau langai galaw ra na rai nna, nawku hpung hta mungga htawn ai zawn galaw ra ai.

  5. Hkristan Prat Hkrun Lam: Mahkawn hkawn ngut ai hpang, minit 15 na ai ndai daw hta Karai A Mungga hpe, shawa masha tatut hkan sa lu hkra karum ya na matu, daw langai (sh) lahkawng lawm na re. Kaga lam matsun n nga yang, ndai daw hpe myitsu salang (sh) atsam nga ai magam tau ni hpe lit jaw mai ai. Buga hta ra ai lam ni ngu ai daw hpe gaw, myitsu salang langai galaw ging ai.

  • Hpung Chyum Laika Hkaja Hpawng: Minit 30. Ndai daw hpe atsam nga ai myitsu salang langai hpe lit jaw ra ai. (Myitsu salang n law ai nawku hpung ni hta, ra ang yang atsam hpring ai magam tau ni hpe lit jaw mai ai.) Hpung Chyum Laika Hkaja Hpawng hpe woi awn na matu, kadai ni atsam hpring ai ngu ai hpe gaw, myitsu salang hpung kaw nna dawdan ging ai. Woi awn na ahkang lu da ai ni gaw, tang du ai hku woi awn chye ra ai. Aten hkrak galaw chye ai wa, Chyum daw ni hpe dan dawng hkra tsun chye ai wa, tsun dan ai lam a tatut manu dan ai lam hpe, yawng chye na hkra sang lang lu ai wa byin ging ai. Sin Langchyi Hkaja Hpawng hpe woi awn ai hte seng nna, uhpung shapru da ai lam matsun ni hpe, bai maram yu ai gaw, grai karum ya lu na re. Mai byin yang, hkaja hpawng woi awn ai wa hte laika hti ai ni hpe, bat shagu galai ging ai. Prat Hte Magam Zuphpawng tingnyang up gaw, aten shayawm na matu tsun wa yang, gara hku shayawm ra na hpe woi awn ai wa gaw dawdan ra ai. Laika pang nkau mi hpe, matut nna n hti na matu dawdan mai ai.

  6. Hpungdim Dat Lam Matsun Ni: Minit 3 (sh) dai hta yawm. Prat Hte Magam Zuphpawng a tingnyang up gaw, zuphpawng hta na akyu rawng ai lam langai hpra hpe bai maram nna, Prat Hte Magam Zuphpawng A Mahtai Laika hta lawm ai ga san hte mahtai hpe tsun mat na re ai. Hpunau nauna ni myit sumru nna la nga na matu, hpang na bat zuphpawng hta san na ga san langai hpe tsun dan ging ai. Aten lu ai nga yang, hpang na bat hta lit ang ai jawng ma ni a mying hpe bai shadum ya mai ai. Kaga lam matsun n nga yang, shana ra ai lam ni hte laika ni hpe hpungdim daw laman, tingnyang up gaw nawku hpung hpe shana ra ai lam ni hpe shana ra ai zawn, hti dan ra ai laika ni hpe mung hti dan na re. Magam hkrum zup hpawng, jasan jaseng lamang ni zawn, ayan galaw nga ai lam ni hpe n shana ging ai. Ndau shana ai shara hta sha shakap da ya ging ai. Lama na, hpungdim daw hta shana ra ai lam (sh) laika hpe hti dan na matu aten n law ai nga yang, tingnyang up gaw, Hkristan Prat Hkrun Lam ngu ai daw hta lit ang ai hpunau ni hpe, aten shayawm na matu karum hpyi mai ai. ( Laika pang 5 hte  9 hpe yu u.) Zuphpawng hpe mahkawn hkawn ai hte akyu hpyi nna hpungdim dat na re.

 7. Laika Hti Ai Hte Sharin Achyin Ai Lam Hta Shakut Nga U: 2019, January 7 bat kaw nna, Prat hte Magam Zuphpawng tingnyang up gaw, Sharin Achyin brochure hta madung nna, shakawn ai hte hpaji jaw ai ni galaw hpang mat na re. Jawng ma langai hpra gaw, Prat hte Magam Zuphpawng Shaman Laika Buk hta lawm ai masat da ai hkaja na hti hkum hpe hkan sa ra ai. Shata shagu a shawng na bat hta Prat hte Magam Zuphpawng tingnyang up gaw, Sharin Achyin brochure kaw nna, hkaja na hti hkum langai hpe shawa masha ni hte bawngban na re. Ndai brochure a “Nang Rawt Jat Wa Ai Ni Hpe Matsing U” ngu ai daw gaw, jawng ma lang na matu galaw da ai rai nna, dai hta tingnyang up gaw n ka matsing ya ging ai.

   8. Sharin Achyin Ai Lam: Jawng ma lamang langai hpra hta, Prat Hte Magam Zuphpawng tingnyang up gaw, Sharin Achyin brochure hpe madung nna, shakawn ai hte htap htuk ai hpaji jaw ga tsun na matu, minit mi hpra aten lu na re. Tingnyang up gaw, lit ang ai jawng ma hpe shachyen ya ai shaloi, jawng ma shaman mat na hkaja na hti hkum hpe n tsun ra ai. Raitim, jawng ma galaw ngut nna htap htuk ai hku shakawn ngut ai hpang, tingnyang up gaw jawng ma shaman mat ai hkaja na hti hkum hpe tsun nna, jawng ma gaw dai hpe gara hku atsawm shaman mat ai lam hte, lam matsun langai hpra hpe hkan sa ai gaw, jawng ma a matu hpa majaw akyu rawng ai lam tsun dan na re. Tingnyang up gaw, shawa masha ni akyu lu na re ngu hkamsha yang, jawng ma hkrang madun wa ai kaw nna, kaga lam ni hpe mung tsun dan mai ai. Zuphpawng ngut ai hpang (sh) kaga aten langai ngai hta, Hkaw Tsun Jawng laika buk (sh) Sharin Achyin brochure hpe madung nna, jawng ma ang ai hkaja na hti hkum (sh) kaga hkaja na hti hkum langai ngai hte, laksan hpaji jaw mai ai. Prat Hte Magam Zuphpawng hpaawn hte Hpaji Jaw Ai ni hte seng ai lam matsun ni hpe  laika pang 13 hte  16 hta yu u.

    9. Aten: Gara daw hpe mung aten n lai ging ai zawn, Prat Hte Magam Zuphpawng tingnyang up a, bai maram ai lam mung aten n lai ging ai. Jawng ma galaw ai shaloi, aten hpring ai hte hpaji rawng ai hku jahkring ra ai. Lama na, zuphpawng a kaga daw ni gaw aten lai mat yang hpaji jaw ai wa gaw, laksan hpaji jaw na re. Mahkawn hkawn ai hte akyu hpyi ai aten ni hte hpawn, zuphpawng galaw ai aten gaw hkying hkum 1 hte minit 45 sha rai ra ai.

 10. Hpung Kawan Sa Ai Aten: Hpung kawan sa ai shaloi, lawu na lam matsun ni hta lai nna, zuphpawng ni hpe Prat Hte Magam Zuphpawng Shaman Laika Buk hta lawm ai hte maren galaw ging ai. Hkristan Prat Hkrun Lam ngu ai daw a Hpung Chyum Laika Hkaja Hpawng a malai, hpung kawan htawn na minit 30 magam mungga hpe galaw na re. Mungga n htawn shi yang, Prat Hte Magam Zuphpawng a tingnyang up gaw, galaw ngut mat ai lamang ni hpe bai maram nna, hpang na bat hta galaw na lamang hpe tau hkrau tsun dan nna, ndau shana ra na ni hte hti dan ra na laika ni hpe hti ngut ai hpang, hpung kawan hpunau hpe shachyen ya na re. Magam mungga htawn ngut ai shaloi, hpung kawan gaw shi lata da ai mahkawn hte zuphpawng hpe hpungdim dat na re. Hpung kawan ai bat hta, No.2 jawng nga na n re. Madung nawku hpung hpe hpung kawan sa kawan ai aten hta, kaga amyu ga shaga ai group gaw, shanhte ayan galaw nga ai zuphpawng ni hpe matut galaw mat na re. Raitim, hpung kawan hpunau a magam mungga htawn ai aten hta gaw, madung nawku hpung hta sa madat ra ai.

 11. Ninghtawn Zuphpawng (sh) Ginwang Zuphpawng Bat: Ninghtawn zuphpawng (sh) Ginwang zuphpawng bat laman hta, nawku hpung zuphpawng ni galaw na n re. Dai bat hta na lam ni hpe tinang hkrai (sh) tinang a nta masha ni hte rau hkaja ging ai.

 12. Myit Dum Poi Bat: Bat langai ya kaw nna manga ya laman hta Myit Dum Poi ang yang, Prat hte Magam Zuphpawng galaw na n re. Raitim, Myit Dum Poi shani hta magam hkrum zup hpawng gaw galaw ging ai.

  13. Prat Hte Magam Zuphpawng A Hpaawn: Myitsu salang hpung kaw nna lata tawn ai myitsu salang langai gaw, Prat Hte Magam Zuphpawng hpaawn hku nna galaw ra ai. Shi gaw, zuphpawng hpe atsawm woi awn nna, lam matsun ni hte hkrak galaw na matu lit la ra ai. Shi gaw hpaji jaw ai wa hte kaja ai matut mahkai nga ra ai. Shata mi a matu Prat Hte Magam Zuphpawng Shaman Laika Buk lu ai hte kalang ta, Prat Hte Magam Zuphpawng hpaawn gaw, dai shata a jawng ma lamang ni hpe lit jahkrat ra ai. ( Laika pang 4 hpe yu u.) Jawng ma galaw ra na lam matsun hte lit ap ai lam langai hpra hpe, Anhte A Hkristan Prat Hte Magam Zuphpawng Lit Ang Laika (S-89) hte maren, bat 3 tau hkrau nna lit ap laika hpe jaw da ging ai.

 14. Prat Hte Magam Zuphpawng Tingnyang Up: Bat shagu hta, Myitsu salang langai gaw Prat Hte Magam Zuphpawng Tingnyang Up hku nna, woi awn mat na re. (Myitsu salang n law ai nawku hpung ni hta, ra ang yang atsam hpring ai magam tau ni hpe lit jaw mai ai.) Shi gaw ga nhpaw hte hpungdim dat ai lam ni, tsun shaga ladat video ni, Sharin Achyin brochure kaw na hkaja na hti  hkum nnan langai hpe shachyen ya ai video ni hpe bawngban na matu, hkyen lajang da ra ai. Zuphpawng a daw yawng hpe shachyen ya ra ai hta n-ga, nawku hpung hta, myitsu salang marai kade nga ai hta hkan nna, ra ang yang zuphpawng a daw nkau mi hpe woi awn na matu mung, lit la ra na re. Daw langai hte langai a lapran hta, tsun ai lam ni gaw kadun dawk sha rai ra ai. Ndai daw hpe lit la na matu, gara myitsu salang ni atsam nga ai ngu ai hpe, myitsu salang hpung kaw nna dawdan ra ai. Atsam nga ai myitsu salang ni gaw, tingnyang up hku nna woi awn na re. Buga a masa hta hkan nna, Prat Hte Magam Zuphpawng hpaawn gaw, atsam nga ai kaga myitsu salang ni hta grau nna tingnyang up lit hpe gun hpai mai ai. Myitsu salang langai gaw Hpung Chyum Laika Hkaja Hpawng hpe woi awn na matu atsam nga yang, zuphpawng tingnyang up hku nna lit gun na matu mung atsam nga na re. Raitim, tingnyang up galaw na myitsu salang gaw, jawng ma lit ang ai ni hpe tsawra myit hte shakawn ya nna, akyu rawng ai lam matsun ni jaw ra ai hpe chyeju hte matsing da u. Zuphpawng hpe aten dep ngut na matu, tingnyang up lit la ra ai. ( Laika pang 6 hte  9 hpe yu u.) Lama na, tingnyang up gaw, shara mung nga nna galaw mayu ai nga yang, tingnyang up a matu pinra ntsa hta kaga microphone stand langai hpe tawn da mai ai. Rai yang, tingnyang gaw hpang na daw ni hpe shachyen ya nga ai shaloi, lit ang ai hpunau gaw alawan shara la na matu galaw lu na re. Dai hte maren, tingnyang up gaw, Chyum hti lamang hte Hkaw Tsun Bungli Hta Jailang U ngu ai daw laman, pinra ntsa hta saboi hte dung mayu yang dung mai ai. Dai hku galaw yang, aten hkyam sa na re.

 15. Myitsu Salang Hpung A Bawng Jahkrup Hpaawn: Myitsu salang pung a bawng jahkrup hpaawn gaw, jawng ma lit jahkrat ai hta lai nna, zuphpawng daw yawng hpe lit jahkrat ra ai. Dai hta, myitsu salang hpung myit hkrum da ai ni hpe, bat langai hpra a matu zuphpawng tingnyang up lit hpe jahkrat ai lam mung lawm ai. Myitsu salang hpung a bawng jahkrup hpaawn gaw, Prat Hte Magam Zuphpawng hpaawn hte matut mahkai nna, zuphpawng a matu lit jahkrat ai chyarang hpe, ndau shana ai shara hta shakap da na matu, atsawm galaw da ging ai.

  16. Hpaji Jaw Ai Wa: Byin mai yang, ndai shara hta mahkrum madup nga ai myitsu salang langai hpe lit la shangun yang grau kaja ai. Shi a lit gaw laksan hpaji jaw na matu re. Prat Hte Magam Zuphpawng daw ni, shawa mungga hte Sin Langchyi Sharin Hpawng (sh) Hpung Chyum Laika Hkaja Hpawng woi awn ai (sh) laika pang hti ya ai myitsu salang ni hte magam tau ni hpe, shanhte galaw ai lit hte seng nna, ra ang yang hpaji jaw ai wa gaw, laksan hpaji jaw ra ai. ( Laika pang 9 hpe yu u.) Lama na, hpung hta hkaw tsun ai lam hte sharin achyin ai lam hta, atsam nga ai myitsu salang ni law yang, shanhte gaw hpaji jaw ai wa hku nna, laning mi hpra lit gun mai ai. Hpaji jaw ai wa gaw, zuphpawng ni hta lit gun ngut shagu hpaji n jaw ra ai.

 17. No.2 Jawng: Jawng ma kade nga ai hta hkan nna, jawng ma lamang ni a matu, No.2 jawng hpe galaw yang galaw ra na re. Dai jawng hpe, hpaji jaw ga tsun na matu, atsam nga ai myitsu salang langai woi awn ra ai. Ra ang yang, atsam nga ai magam tau langai mung woi awn mai ai. Dai lit kadai gun na ngu ai hpe myitsu salang hpung gaw dawdan ging ai. Dai lit hpe kahti galai gun hpai na kun, ngu ai hpe mung dawdan ging ai. Hpaji jaw ga tsun ai wa gaw,  laika pang 8 hta madun da ai ladat hte maren galaw ging ai. Lama na, No.2 jawng hpe galaw ai nga yang, Karai A Mungga Kaw Na Sut Gan Ni ngu ai daw npu na, Wenyi Sut Gan Ni Hpe Sawk Sagawn Ai Lam ngu ai daw galaw ngut ai hpang, jawng ma ni hpe dai jawng de sa na matu tsun ging ai. Hkaw Tsun Bungli Hta Jailang U ngu ai daw ngut ai shaloi, madung zuphpawng galaw ai shara de bai wa ging ai. Tsun shaga ladat video ni hpe bawngban ai shaloi, No.2 jawng hta nga ai ni gaw, mai byin yang dai shara kaw nna sha, bawngban ai lam hpe yu (sh) madat ging ai. Shing nrai, hpaji jaw ai wa gaw, video madun nna bawngban ging ai.

 18. Video Ni: Ndai zuphpawng hte seng nna, lata da ai video ni hpe jailang na re. Bat lapran zuphpawng a matu, video ni hpe JW Library hta lu mai nna, jak rai amyu myu hte shang yu mai ai. Kalang lang, tsun shaga ladat video ni hpe, Prat Hte Magam Zuphpawng hta madun ngut ai hpang, hkaw tsun bungli a matu hkrum zup hpawng ni hta mung madun mai ai.