Content de lai

Nta Kaw Galaw Na Jawng Laika Ni Yawng Hpe Ngai Gara Hku Galaw Na?

Nta Kaw Galaw Na Jawng Laika Ni Yawng Hpe Ngai Gara Hku Galaw Na?

Nang galaw mai ai lam

Laika hkaja na shara hpe tam u. Myit n bra shangun ai shara rai ra na re. Byin mai yang saboi tawn da u. TV n nga ai shara rai ra ai.

Aten gaw n-gun ja nna grai gat chyang ai gumra hte bung ai​—aten hpe nang lu hkang ra

Ahkyak shatai galaw ra ai ni hpe masat u. Jawng lung ai hpe nang ahkyak shatai ai rai yang, nta kaw galaw na matu jaw ai jawng laika hpe nang shawng galaw na re.

Aten hpe hkum garawt. Tup hkrak re ai chyarang langai galaw da nna, dai hte maren hkan sa u.

Galoi galaw na hpe dawdan da u. Gara hpe mahtang shawng galaw na, gara hpe gaw nambat lahkawng galaw na ngu masat nna, dai hte maren galaw na matu dawdan u. Laika pa langai hta ka matsing nna, langai hpra hpe galaw na aten masat da u. Galaw ngut ai langai hpra hpe mahkret nna matsing da u.

Chyahkring chyahkra hkring la u. Lama na, nang myit maju jung na matu yak wa yang chyahkring mi hkring la u. Raitim, byin mai yang jawng laika hpe alawan shangut u.

Tinang hkum tinang kam ai myit nga u. Matsing ra na gaw, laika ram ai jawng ma hte laika n ram ai jawng ma shai ai gaw, bawnu kaja ai n kaja ai hta madung ai n re. Laika shakut ai n shakut ai ngu ai hta sha madung ai. (Ga Shagawp 10:4) Nang mung awng dang ai jawng ma byin mai ai. Nang shakut shaja ai rai yang, kaja ai akyu ni lu wa na re.