Content de lai

RAMMA NI A GA SAN

Dinghku De Na Matu Ngai Jin Jin Rai Nga Sai Kun?

Dinghku De Na Matu Ngai Jin Jin Rai Nga Sai Kun?

Dai ga san hpe garai n htai shi yang, na a lam nang chye hkra galaw ra ai. Ga shadawn, lawu kaw lawm ai lam ni hpe myit yu u:

Kanawn Mazum Ai Lam

Kanu kawa, kahpu kanau ni hte nang gara hku kanawn mazum ai rai? Shanhte hte tsun shaga ai aten hta tinang hkum tinang hkang ai myit n nga ai sha, na a mu mada lam hpe tsun dan na matu, mazut ai ga ni, adawt ai zawn tsun ai ga ni hpe ayan na tsun ai kun? Na a lam hte seng nna, shanhte gara hku tsun ai kun? Nta masha ni hpe nang kanawn mazum ai lailen gaw, na a ningrum ningtau hpe gara hku kanawn mazum na ngu ai hpe madun nga ai.​​—⁠Ehpesu 4:31.

Arawn Alai

Nang gaw kaja ai hku (sh) n kaja ai hku mu mada chye ai wa kun? Tinang galaw mayu ai hku sha galoi mung galaw ai kun? Rap ra ai ningmu nga ai kun? Myit tsang lam ni hpe myit azim sha hte hparan chye ai wa kun? Myit galu ai wa kun? Karai Kasang a chyoi pra ai wenyi a majaw pru wa ai atsam ningja ni hpe, ya aten kaw nna nga hkra shalat ai gaw, hpang de nang dinghku num, dinghku la byin wa ai shaloi mung karum shingtau ya na re.​​—⁠Galati 5:22, 23.

Ja Gumhpraw

Nang gumhpraw hpe gara hku jai ai kun? Ayan hka kap ai kun? Kan bau bungli langai hpe aten na na lu galaw ai kun? N lu galaw ai rai yang hpa majaw kun? Bungli a majaw i? Bungli madu a majaw i? Shing nrai, na a n kaja ai arawn alai nkau mi a majaw kun? Ja gumhpraw hpe atsawm n chye jai ai nga yang dinghku hpe gara hku yu lakawn lu na kun?​​—⁠1 Timohti 5:8.

Karai Kasang Hte Hku Hkau Ai Lam

Nang gaw Yehowa Sakse langai rai yang, na a wenyi lam gaw gara hku kun? Chyum Laika hti na matu, hkaw tsun bungli kaw shang lawm na matu hte Hkristan zuphpawng ni hpe lung na matu, sharawng awng let galaw ai kun? Nang gaw Karai Kasang hte kaja ai hku hkau lam nga yang she, na a ningrum ningtau a matu manang kaja byin lu na re.​—Hpaji 4:9, 10.

Na a lam hpe nang grau nna chye da yang she, na a gawng kya lam hpe hkap la lu ai manang kaja hpe tam mu na re.