Content de lai

Hkristu du sa ai ngu ai gaw hpa hpe tsun ai kun?

Hkristu du sa ai ngu ai gaw hpa hpe tsun ai kun?

Chyum Laika Mahtai

Ginding aga kaw na masha ni hpe tara jeyang na matu, Hkristu bai du sa na aten hte seng nna sanglang da ai Chyum daw law law Chyum Laika hta lawm ai. * Ga shadawn, Mahte 25:31-33 hta ndai hku tsun da ai:

“Dai Masha Kasha [Yesu] gaw shi a hpung shingkang dan hkung let, lamu kasa ni nlang hte rau sa du ai shaloi, shi a hpung shingkang a tingnyang ntsa e shi dung nna, amyu baw shagu hpe shi a man e jahpawng tawn da nhtawm, sagu rem wa gaw sagu ni hte bainam ni hpe karan ginhka da ai zawn, shanhte hpe karan ginhka da nna, sagu ni hpe hkra maga de bainam ni hpe pai maga de tawn da na maru ai.”

Dai tara jeyang ai aten gaw, masha labau hta kalang mung n byin ga shi ai “ru tsang kaba” aten hta byin na re. Ru tsang kaba a jahtum hta Hara Magedon majan byin na re. (Mahte 24:21; Shingran 16:16) Bainam hku nna shingdaw hkrum ai Hkristu a hpyen ni gaw, “htani htana hten nan ai ari ahpri hkrum na ma ra ai.” (2 Htesaloni 1:10; Shingran 19:11, 15) Raitim, sadi dung ai mayam ni re ai sagu ni gaw “n htum n wai asak” lu la na re.​—⁠Mahte 25:46.

Gara aten hta Hkristu du sa na kun?

Yesu gaw, “dai shani hte ahkying hpe chyawm gaw kadai mung n chye lu ai” nga nna tsun wa ai. (Mahte 24:36, 42; 25:13) Raitim, Hkristu du sa na aten ni sai ngu ai lam hpe chye lu hkra, dan leng ai “kumla” Yesu jaw wa ai.​—⁠Mahte 24:3, 7-14; Luka 21:10, 11.

Hkristu gaw wenyi hkum hte du sa na kun? Shinggyim hkum hte du sa na kun?

Yesu gaw, wenyi hkum hte hkrung rawt wa ai majaw, shinggyim hkum hte n re ai sha, wenyi hkum hte du sa na re. (1 Korinhtu 15:45; 1 Petru 3:18) Dai majaw, Yesu gaw kasa ni hpe shi n si shi yang, ya na zawn tsun wa ai: “Loi hkring mi rai jang, mungkan ga gaw ngai hpe n mu dat na nu ai.”​—⁠Yawhan 14:19.

Hkristu du sa na hte seng nna chye na shut ai lam ni

Chye na shut ai lam: Yesu gaw “sumwi hta du sa ai hpe” mu lu na ngu ai Chyum Laika hta tsun da ai lam gaw, Yesu du sa ai hpe myi hte chyaw mu lu na hpe tsun ai re.​—⁠Mahte 24:30.

Teng man lam: Chyum Laika hta sumwi hpe n mu lu ai lam ni hte shingdaw nna tsun da ai lam ni nga ai. (Jaw Jau 16:2; Bu Hkawm 11:25; Tara Jahprang 33:26) Ga shadawn, Karai Kasang gaw Mawshe hpe “htat ai sumwi hta ngai nang kaw a du nga na ring ngai” nga nna tsun wa ai. (Pru Mat 19:9) Mawshe gaw Karai Kasang hpe myi hte n mu wa ai. Dai hte maren, Hkristu “sumwi hta du sa ai” ngu ai gaw, Yesu du sa ai hpe masha ni myi hte n mu lu tim, shi du sa ai hpe chye lu na lam tsun mayu ai re.

Chye na shut ai lam: Hkristu du sa ai hte seng nna Shingran 1:7 hta tsun da ai ‘myi yawng mayawng mung, shi hpe hkap mu na ma ra ai’ ngu tsun da ai hpe dai hte maren chye na ra ai.

Teng man lam: “Myi” hte “mu” ai lam a matu Chyum Laika hta lang da ai Greek ga si ni gaw, myi hte mu lu ai hpe n re ai sha garan ginhka chye ai, chye na ai hpe tsun mayu ai shaloi, lang ai aten ni mung nga ai. * (Mahte 13:15; Luka 19:42; Roma 15:21; Ehpesu 1:18) Chyum Laika hta, hkrung rawt wa ai Yesu hpe “shi chyu sha . . . n dep lu ai nhtoi hta a nga nga ai; masha gade ai mung shi hpe n mu yu ai, hte n mu lu nga ai” ngu nna tsun da ai. (1 Timohti 6:16) Dai majaw, ‘myi yawng mayawng mung, shi hpe hkap mu na mara ai’ ngu ai gaw, Karai Kasang a tara jeyang ai lam hpe woi awn na gaw Yesu re ai lam masha ni chye lu na ngu tsun mayu ai re.​—⁠Mahte 24:30.

Chye na shut ai lam: Yesu gaw shinggyim hkum hkrang hte du sa na lam 2 Yawhan 7 hta mu lu ai.

Teng man lam: Dai Chyum daw hta ndai hku tsun da ai: “Yesu Hkristu gaw masha a hkum shan hpe dagraw nna du sa ai hpe, ndang kau ai hkalem ai masha law law wa mungkan ga de pru sa ma ra ai.”

Kasa Yawhan prat kaw na masha nkau mi gaw, shinggyim masha langai hku nna Yesu ginding aga de yu hkrat wa ai hpe n hkap la wa ai. Shanhte hpe, machye machyang hpe sha madung tawn ai ni ngu nna shaga ai. Lahkawng Yawhan 7 gaw, shanhte a sawn la ai lam shut ai hpe tsun dan na matu ka da ai re.

^ စာပိုဒ်၊ 3 Masha law law gaw Hkristu du sa ai hpe “lahkawng lang du sa ai lam” “lahkawng lang paw pru ai lam” ngu tsun ma tim, dai zawn tsun da ai hpe Chyum Laika hta n mu lu ai.

^ စာပိုဒ်၊ 14 The New Thayer’s Greek-English Lexicon of hte New Testament (1981), laika man 451 hte 470 hpe yu u.