Chyum Laika Mahtai

 Chyum Laika hta Yesu a hkrang nsam hte seng nna n tsun da ai majaw, kadai mung tup hkrak n chye ai. Dai gaw, Yesu a hkrang nsam gaw ahkyak n re ai hpe chye shangun ai. Raitim, chyum daw nkau mi hpe dinglik yu nna, Yesu a hkrang nsam hpe hkrang shapraw mai ai.

•   Gawng Shingyan: Yesu gaw Ju masha re ai majaw, Sinpraw Ka-ang na Simet masha ni zawn nsam nga na gaw teng sha re. (Hebre 7:14) Shi gaw kaga masha ni hte laklai nna nhtan shai ai nsam nga nan n san ai. Kalang mi hta, kadai mung n sadi hkrup ai sha, Galile mung kaw na Yerusalem de bu hkawm wa ai. (Yawhan 7:10, 11) Shi a sape ni hte pyi nsam nau n shai ai. Dai majaw mung, Yesu hpe rim na matu laknak lang da ai masha hpawng hpe Yuda Iskarut gaw garan ginhka dan wa ai.—Mahte 26:47-49.

•   Kara: Yesu gaw kara galu na masa n nga ai. Hpa majaw nga yang, “Lasha gaw kara madat yang shi a matu arawng hpoi ai lam rai nga ai” ngu Chyum Laika hta tsun da ai majaw re.—1 Korinhtu 11:14.

•   Nhka Mun: Yesu gaw nhka mun da ai. Yuda htung hta “nmun mung doi lu na n rai” ngu tsun da ai. (Jaw Jau 19:27; Galati 4:4) Yesu hkrum sha na yakhkak jamjau hte seng ai myihtoi ga hta mung, shi a nhka mun lam lawm ai.—Esaia 50:6.

•   Hkum Hkrang: Yesu gaw n-gun ja nna hkam kaja ai wa re ai lam dan dawng nga ai. Shi magam gun ai aten hta deng law law bu hkawm wa ai. (Mahte 9:35) Yuda ni a nawku htingnu hpe san seng hkra lahkawng lang galaw wa ai. Gum hpraw galai sha ai ni a saboi ni hpe galau kau ya ai. Kalang mi hta, sagu, dumsu ni hte dusat ni hpe lasik hte gawt shapraw wa ai. (Luka 19:45, 46; Yawhan 2:14, 15) “Kabu gara shi ga yawng hku nga yang (Yesu gaw) n-gun ja nna hkam kaja ai hkum hkrang lu da ai wa re ai lam madun ai” ngu McClintock and Strong’s Cyclopedia hta tsun da ai.—Volume 4, laika man 884.

•   Myiman Nsam: Yesu gaw sumnung nna matsan dum chye ai wa re ai majaw dai nsam ni gaw shi myiman hta dan dawng nga na gaw teng sha re. (Mahte 11:28, 29) Masha shagu gaw shalan shabran lam hte karum shingtau lu na matu shi hpang sa ma ai. (Luka 5:12, 13; 7:37, 38) Ma ni pyi shi makau hta nga mayu ma ai.—Mahte 19:13-15; Marku 9:35-37.

Yesu a hkrang nsam hte seng nna shut ai ningmu ni

 Shut ai: Yesu gaw mau mau re nna galoi mung yawn nga ai wa re.

 Jaw ai: Yesu gaw sumsing Kawa re ai “a rawng ai Karai Kasang” Yehowa a atsam ningja hpe hpring tup madun ai wa re. (1 Timohti 1:11; Yawhan 14:9) Ngwi pyaw lam lu la mai ai lam, kaga ni hpe pyi sharin ya wa ai. (Mahte 5:3-9; Luka 11:28) Dai lam ni hku nga yang, Yesu a myiman gaw ngwi pyaw nga ai myiman rai na gaw teng sha re.