Content de lai

Sumsing Lamu De Kadai Ni Sa Na Kun?

Sumsing Lamu De Kadai Ni Sa Na Kun?

Chyum Laika Mahtai

Karai Kasang gaw sadi dung ai Hkristan ni kaw nna, nkau mi hpe lata la ai. Shanhte ni gaw, si mat ai hpang sumsing lamu de hkrung rawt mat na re. (1 Petru 1:3, 4) Lata la hkrum ai ni gaw, makam masham ngangkang hkra, akyang lailen ni san seng hkra, matut nna hkang ra ai. Dai hku n galaw ai nga yang, sumsing lamu sali wunli lu la na matu atsam hpring na n re.​—⁠Ehpesu 5:5; Hpilipi 3:12-14.

Sumsing lamu hta shanhte hpa galaw na kun?

Yesu hte arau hkawhkam ni, hkinjawng ni hku nna shaning 1,000 uphkang na re. (Shingran 5:9, 10; 20:6) Shanhte gaw, “sumsing lamu ningnan” (sh) sumsing lamu asuya hpe hpawng de na re. Dai asuya gaw, “ginding aga ningnan” (sh) mungkan uhpung uhpawng hpe uphkang na re. Karai Kasang a shawng nnan na yaw shada lam hte maren, shinggyim masha yawng hpe ding hpring ai lam bai lu la hkra karum ya na re.​—⁠Esaia 65:17; 2 Petru 3:13.

Sumsing lamu de marai kade hkrung rawt na kun?

Sumsing lamu de hkrung rawt na ni gaw, 144,000 re ai ngu Chyum Laika hta tsun da ai. (Shingran 7:4) Shingran Laika 14:1-3 hta kasa Yawhan gaw, “Sagu Kasha gaw Ziun bum ntsa e tsap nga ai . . . sen mi mun mali e hkying mali mung, shi hte rau tsap nga ma ai” ngu ai shingran hpe mu wa ai. Ndai shingran hta lawm ai “Sagu Kasha” gaw, hkrung rawt ngut sai Yesu hpe tsun ai re. (Yawhan 1:29; 1 Petru 1:19) “Ziun bum” ngu ai gaw, Yesu hte shi hte arau sumsing lamu hta uphkang na 144,000 a shagrau hkrum ai lam hpe tsun mayu ai re.​—⁠Shakawn 2:6; Hebre 12:22.

Karai Kasang a Mungdan hta Yesu hte arau uphkang na matu, “lata la ai ni” hpe “sagu hpung kaji” nga nna tsun da ai. (Shingran 17:14; Luka 12:32) Dai majaw, Yesu a sagu ni hte shingdaw dat na nga yang, ndai hti hkum gaw yawm nga na hpe chye lu ai.​—⁠Yawhan 10:16.

Sumsing lamu de sa na ni hte seng nna chye na shut ai lam ni

Chye na shut ai lam: Masha kaja yawng sumsing lamu de sa na.

Teng man ai lam: Masha kaja law malawng hpe ginding aga hta htani htana asak hkrung lu ai ahkang jaw na ngu Karai Kasang ga sadi jaw da ai.​—⁠Shakawn 37:11, 29, 34.

  • “Kadai mung sumsing lamu de lung wa yu ai n rai” nga nna Yesu tsun wa ai. (Yawhan 3:13) Dai majaw, mungkan ga de Yesu n sa shi yang, si mat ai masha kaja ni re ai Abraham, Mawshe, Yoba hte Dawi ni gaw sumsing lamu de n lung mat wa ai hpe chye lu ai. (Kasa 2:29, 34) De a malai, shanhte gaw, ginding aga hta hkrung rawt wa na ngu ai myit mada lam lu la ma ai.​—⁠Yoba 14:13-15.

  • Sumsing lamu de hkrung rawt ai hpe “shawng na ngu ai bai hkrung rawt ai lam” ngu tsun da ai. (Shingran 20:6) Dai majaw, hkrung rawt ai lam langai naw nga ai lam chye lu ai. Dai gaw, ginding aga hta hkrung rawt ai lam re.

  • Karai Kasang Mungdan a uphkang ai npu hta “si hkrung si htan n nga lu na sai” ngu Chyum Laika hta tsun da ai. (Shingran 21:3, 4) Sumsing lamu hta, si hkrung si htan galoi mung n nga wa ai majaw, ndai ga sadi gaw ginding aga hte sha seng ai.

Chye na shut ai lam: Masha langai hpra gaw sumsing lamu asak aprat (sh) ginding aga asak aprat hpe tinang nan lata lu ai ahkang nga ai.

Teng man lam: “Grau htum ai shaga la ai lam” re ai sumsing lamu asak aprat hpe sadi dung ai gara Hkristan ni lu na ngu ai hpe Karai Kasang sha dawdan ai. (Hpilipi 3:14) Dai majaw, lata la hkrum ai ni gaw tinang myit ra ai hku lata ai n re.​—⁠Mahte 20:20-23.

Chye na shut ai lam: Ginding aga ntsa hta htani htana asak hkrung lu ai ahkang gaw madang grau nem ai. Sumsing lamu de sa na matu n gingdan ai majaw, jaw ai re.

Teng man lam: Ginding aga ntsa hta htani htana asak hkrung na ni hpe Karai Kasang gaw, “nye a amyu masha ni,” “ngai lata la ai amyu,” “Yehowa kaw na shaman lu la ai nli” nga nna shaga ai. (Esaia 65:21-23) Karai Kasang a shawng ningnan na yaw shada lam re ai hkum tsup ai asak aprat hte hparadisu hta htani htana asak hkrung lu na matu, shanhte laksan ahkaw ahkang lu la na re.​—⁠Ningpawt 1:28; Shakawn 115:16; Esaia 45:18.

Chye na shut ai lam: Shingran Laika hta tsun da ai 144,000 gaw, teng sha n re ai. Ga shadawn langai sha re.

Teng man lam: Shingran Laika hta lawm ai hti hkum nkau hpe ga shadawn hku nna lang ai raitim, nkau hti hkum ni hpe gaw, teng sha nga ai hti hkum hku nna madun da ai. Ga shadawn, “Sagu Kasha a kasa shi lahkawng ni a amying shingteng shi lahkawng” nga nna tsun da ai. (Shingran 21:14) Dai zawn sha, 144,000 hti hkum gaw gaja wa nga ai hpe chye shangun lu ai madi madun lam ni hpe yu yu ga.

“Dazik shakap hkam la ai ni . . . [shing nrai, sumsing asak aprat lu na matu masat da hkrum ai ni] sen mi mun mali e hkying mali” nga nna Shingran 7:4 hta tsun da ai. Ndai Chyum daw a lawu na ga ni hta lahkawng ngu na hpung hpe, “kadai n dang hti lu ai wunawng wuwa kaba” nga nna tsun da ai. Dai “wunawng wuwa kaba” mung, Karai Kasang a hkye hkrang la hkrum ai ni re. (Shingran 7:9, 10) 144,000 ngu ai hti hkum gaw, ga shadawn langai rai nna, hkrak n chye ai uhpung langai rai na nga yang, uhpung lahkawng hte seng nna n bung ai hku madun da ai lam ni gaw lachyum nga sana n re. *

Dai hta n-ga, 144,000 hpe “shawng si ai asi tai mu ga nga, shinggyim masha ni hta na mari la ai ni rai nga ma ai” ngu nna tsun da ai. (Shingran 14:4) “Shawng si ai asi” ngu ai lachyum gaw, lata la hkrum ai ni hpe tsun mayu ai re. N dang hti hkra law htam ai mungkan ntsa na mung masha ni hpe, Hkristu hte arau sumsing lamu kaw nna uphkang na ni hte seng nna, dai zawn tsun ai gaw gaja wa htap htuk nga ai.​—⁠Shingran 5:10.

^ စာပိုဒ်၊ 21 Shingran 7:4 hta tsun da ai 144,000 ngu ai hti hkum hte seng nna, Professor Robert L. Thomas gaw, ya na zawn ka wa ai: “Ndai tup hkrak re ai hti hkum gaw Shingran 7:9 hta lawm ai tup hkrak n re ai hti hkum ni hte shai hkra madun da ai. Dai hpe ga shadawn langai hku nna sawn la kau na nga yang, ndai Chyum Laika hta lawm ai hti hkum ni hpe gaja wa nga ai hti hkum ni hku nna n mai sawn la sana re.”​—⁠Shingran 1-7: Ga Htai Chyum, laika man 474.