Content de lai

Ngarai Ngu Ai Gaw Hpa Rai A Ta? Masha Ni Hpe Htani Htana Zingri Ai Shara Langai Kun?

Ngarai Ngu Ai Gaw Hpa Rai A Ta? Masha Ni Hpe Htani Htana Zingri Ai Shara Langai Kun?

Chyum Laika Mahtai

Hebre ga si “Sheol” hte Greek ga si “Hades” hpe, Chyum Laika ga gale ai ni nkau gaw, “ngarai” ngu nna ga gale ma ai. Gaja wa nga yang, si mat ai ni hpe lup ai lupsung hku hpe tsun mayu ai re. (Shakawn 16:10; Kasa 2:27) Masha nkau gaw ndai sumhpa hta hkrang madun da ai sumla hte maren, masha ni hpe wan nat nna zingri ai ngarai mung nga ai ngu kam ma ai. Raitim, Chyum Laika sharin ya ai gaw dai hku n re.

  1. Ngarai hta du nga ai ni gaw hpa hpe mung n chye sai. Nchyi nmu ai lam mung n hkam sha ai. “Nang yu wa na ra ai katsan ga [sheol, NW] hta e, amu bungli, maw mawn ai, chye chyang ai hte hpaji hparat hpa mung n nga ai.”​—⁠Hpaji Ningli 9:10.

  2. Masha kaja ni mung ngarai de du mat ai. Karai Kasang hpe sadi dung ai ni re ai Yaku hte Yoba mung ngarai (Hebre ga hku sheol) de sa na matu myit mada wa ai.​—⁠Ningpawt 37:35; Yoba 14:13.

  3. Yubak a shabrai gaw si mat ai lam re. Wan grung nga ai ngarai hta zingri hkrum ai n re. “Si mat ai wa gaw yubak hta na lawt pru nga ai.”​—⁠Roma 6:6.

  4. Karai Kasang gaw tara rap ra ai majaw, ngarai hta zingri ai lam galoi mung n galaw ai. (Tara Jahprang 32:4) Shawng nnan na shinggyim masha Adam gaw, mara galaw ai majaw, asak n mai hkrung sai lam Karai Kasang ndai hku tsun wa ai: “Nang ga yun rai nga ndai rai nna, ga yun bai tai na rin dai.” (Ningpawt 3:19) Adam hpe ngarai mung de sa kau ai nga yang, Karai Kasang gaw masu ai wa rai mat na re.

  5. Ngarai hta zingri na ngu nna Karai Kasang kalang pyi n myit. Shinggyim masha ni hpe wan grung nga ai ngarai di hta htani htana zingri na ngu ai gaw, “Karai Kasang gaw tsawra ai myit rai nga ai” ngu ai Chyum Laika sharin ya ai lam hte nhtan shai nga ai.​—⁠1 Yawhan 4:8; Yeremia 7:31.