Content de lai

Mungkan Simsa Lam Gara Hku Lu La Na Kun?

Mungkan Simsa Lam Gara Hku Lu La Na Kun?

Chyum Laika Mahtai

Mungkan ting simsa wa na. Raitim, shinggyim masha ni shakut ai majaw n re. Karai Kasang a Mungdan a majaw byin wa na. Dai Mungdan gaw sumsing lamu asuya rai nna, Yesu Hkristu uphkang na re. Dai mau hpa myit mada lam hpe Chyum Laika hta gara hku tsun da ai hpe yu yu ga.

  1. Karai Kasang gaw “Ga ting hta na hpyen majan shi jasim kau” nna “Ga ntsa e mung, shi sharawng awng ai masha ni hta, ngwi pyaw ai gaw anga nga nu ga law” ngu ai ga sadi hpring tsup hkra galaw ya na re.​—⁠Shakawn 46:9; Luka 2:14.

  2. Karai Kasang a Mungdan gaw sumsing lamu kaw nna mungkan ting hpe uphkang na re. (Daniela 7:14) Mungkan ting hpe up hkang ai asuya re ai majaw, manghkang ni byin shangun ai lam a npawt re ai myu tsaw, mung tsaw myit jasat ni hpe aru kaw nna baw kau ya na re.

  3. Karai Kasang Mungdan a Uphkang Madu re ai Yesu hpe “Ngwi pyaw Sim Sa Ai A Hkawhkam Kasha” ngu nna shaga ai. Shi galaw ya na ‘mungdan gaw tut nawng ngwi pyaw sim sa’ lu na re.​—⁠Esaia 9:6, 7, JCLB.

  4. Matut nna gasat gala na matu dawdan da ai ni hpe Karai Kasang a Mungdan gaw hkap la na n re. Karai Kasang gaw “kashun kashe tsaw ai wa hpe, Shi a myit masin n dawng nga mu ai.”​—⁠Shakawn 11:5; Ga Shagawp 2:22.

  5. Karai Kasang gaw shi a Mungdan kaw nga na masha ni hpe simsa hkra gara hku nga ra na lam hpe sharin ya ai. Shi a sharin achyin ya ai lam a akyu hpe Chyum Laika hta ndai hku tsun da ai: “Shanhte gaw tinang a nhtu ni hpe najawn, tinang a ri ni hpe nhkyau dup kau na ma ra ai: amyu mi gaw amyu mi hpe nhtu n shaw ai hte, htawm hpang e hpyen majan sharin sa na, n rai.”​—⁠Esaia 2:3, 4.

Mungkan ting kaw na wan hku law ai Yehowa Sakse ni gaw, simsa hkra gara hku asak hkrung ra na ngu ai hpe Karai Kasang kaw nna sharin la nga ma ai. (Mahte 5:9) Anhte ni gaw amyu baw sang amyu myu kaw na ni rai nna mungdan 230 jan hta shanu nga tim anhte kaw nna kadai mung shada da gasat na matu laknak n lang ga ai.

Simsa lu na lam ni hpe Yehowa Sakse ni gaw daini aten hta sharin la nga ai