Content de lai

Karai Kasang A Mungdan Ngu Ai Gaw Hpa Rai A Ta?

Karai Kasang A Mungdan Ngu Ai Gaw Hpa Rai A Ta?

Chyum Laika Mahtai

Karai Kasang A Mungdan ngu ai gaw Yehowa Karai Kasang gawde da ai asuya langai re. Chyum Laika hta, “Karai Kasang A Mungdan” hpe “sumsing lamu a mungdan” nga nna mung tsun ai. Hpa majaw nga yang, sumsing lamu kaw nna uphkang ai majaw re. (Marku 1:14, 15; Mahte 4:17) Karai Kasang A Mungdan gaw shinggyim masha asuya ni hte bung ai lam law law nga ai. Raitim, masa lam yawng hta masha asuya hta grau kaja ai.

  • Uphkang Ai Ni. Karai Kasang gaw Mungdan a hkawhkam hku nna Yesu Hkristu hpe aya tang da ai. Shi hpe shinggyim masha asuya yawng hta grau ai ahkang aya jaw da ai. (Mahte 28:18) Yesu gaw shi lu da ai hpung atsam hpe kaja ai hku nna sha akyu jashawn ai. Shi gaw kam hpa ging ai, tsawra matsan dum chye ai ningbaw re ai lam hpe sakse madun ngut sai. (Mahte 4:23; Marku 1:40, 41; 6:31-34; Luka 7:11-17) Karai Kasang a lam matsun hte maren, Yesu gaw sumsing lamu kaw nna shi hte arau “ga ntsa e up” na matu amyu baw lakung shagu kaw nna masha ni hpe lata ai.​—⁠Shingran 5:9, 10.

  • Uphkang Ai Aten ladaw. Masha uphkang ai zawn aten kadun n re ai sha, Karai Kasang A Mungdan gaw “prat dingsa e n hten n mat” ai mungdan rai na re.​—⁠Daniela 2:44.

  • Mung Masha Ni. Karai Kasang hpyi shawn da ai lam ni hpe galaw yang, gara amyu, gara shara kaw nna mi raitim, Karai Kasang A Mungdan a mung masha mai byin ai.​—⁠Kasa 10:34, 35.

  • Tara Upadi. Karai Kasang Mungdan a tara upadi ni (shing nrai hkang da ai tara ni) gaw n kaja ai akyang lailen ni hpe hkum pat ai daram sha n re ai. Mung masha ni a akyang lailen hte seng ai tsang madang ni hpe rawt jat wa shangun ai. Ga shadawn, Chyum Laika hta ndai hku tsun da ai: “Dai Madu, na a Karai Kasang hpe, na a myit kraw lawang mahkra hte, na a myit masin mahkra hte, na a myit mang mahkra hte nang tsaw ra lu na ndai, nga nna hkang da ai ga gaw, grau kaba ai hte shawng na ga mung, rai nga ai. Hpang na ga mung dai hte bung nga nna, Na a htingbu wa hpe, na a hkum hte maren nang tsaw ra lu na ndai, nga nna rawng nga ai.” (Mahte 22:37-39) Karai Kasang hte masha shada da hpe tsaw ra ai myit gaw, kaga masha ni a akyu hpe tam na matu, Karai Mungdan a mung masha ni hpe shadut ya ai.

  • Hpaji Hparat. Karai Kasang A Mungdan gaw mung masha ni a matu kaja ai tsang madang ni hpe jahkrat da ya nna, dai tsang madang ni hpe dep lu na matu, mung masha ni hpe sharin achyin ya ai.​—⁠Esaia 48:17, 18.

  • Magam Lit. Mung masha ni hpe hkra machyi nna, uphkang ai ni lusu na hpe Karai Kasang A Mungdan gaw byin shangun na n re. Karai Kasang a Mungdan gaw, Karai Kasang hpe tsawra ai ni yawng hparadisu hta htani htana nga lu na matu hte, Karai Kasang myit ra ai lam yawng hpring tsup wa hkra galaw ya na re.​—⁠Esaia 35:1, 5, 6; Mahte 6:10; Shingran 21:1-4.