Content de lai

Karai Kasang Hta Amying Kade Daram Nga Ai Kun?

Karai Kasang Hta Amying Kade Daram Nga Ai Kun?

Chyum Laika Mahtai

Karai Kasang hta amying langai sha nga ai. Hebre hte ndai hku יהוה ka nna, Jinghpaw hku gaw “Yehowa” re. * Karai Kasang gaw myihtoi Esaia kaw nna ndai hku tsun wa ai: “Ngai gaw Yehowa rai nga nngai; dai nye a amying shingteng rai nga ai.” (Esaia 42:8) Lata hte ka ai moi na Chyum Laika hta, Karai Kasang hpe kaga arawng sadang ni hte shaga ai hta grau nna, Yehowa ngu ai mying hpe 7,000 lang daram mu lu ai. Dai amying gaw, kaga masha ni a amying hta grau nna law ai. *

Yehowa a matu kaga amying naw nga ai kun?

Chyum Laika hta Karai Kasang a amying langai sha tsun da ai raitim, Karai Kasang hte seng nna shakawn shagrau ai hku shaga ai arawng sadang amying law law lawm ai. Lawu hta madun da ai arawng sadang amying langai hpra gaw, Yehowa a atsam marai langai ngai hpe tsun dan ai.

Arawng Sadang Amying

Madi Madun

Lachyum

Ala

(N Nga)

“Ala” ngu ai ga si gaw, marai langai ngai a amying shingteng n re ai sha, Arap amyu ga kaw na yu hkrat wa ai “Karai” ngu lachyum nga ai arawng sadang a amying sha re. Arap amyu ga hta n-ga, kaga amyu ga ni hte ga gale da ai Chyum Laika ni hta “Ala” hpe “Karai” a malai lang chye ai.

Chyahtum Chyalai N-Gun Rawng Ai

Ningpawt Ninghpang 17:1

Kadai shingjawng n lu ai n-gun atsam rawng ai. Hebre hku nna ʼEl Shad·daiʹ, “Chyahtum Chyalai n-gun rawng ai Karai Kasang” ngu ai ga si gaw, Chyum Laika hta 7 lang lawm ai.

Alhpa hte Omega

Shingran 1:8; 21:6; 22:13

“Apawt ningshawng mung, ahpang jahtum mung, rai nga nngai” (sh) “apawt ningshawng mung, ahpang jahtum mung” ngu ai a lachyum gaw, Chyahtum Chyalai N-gun Rawng Ai Karai Kasang Yehowa a shawng hta mung kadai n nga ai, hpang de mung kadai n nga sai ngu ai re. (Esaia 43:10) Alhpa hte omega ngu ai ga si gaw, Greek laika kanu ni a shawng ningnan hte hpang jahtum laika kanu ni re.

Moi Chyaloi Nhkoi Na Wa

Daniela 7:​9, 13, 21

Hpang wa ai lam n nga ai; hpa mung kadai mung n nga shi ai aten kaw nna nga nga sai.​—⁠Shakawn 90:2.

Hpan Da Madu

Esaia 40:28

Nga yawng nga pra hpe Hpan da ai.

Kawa

Mahte 6:9

Asak jaw ai wa.

Karai Kasang

Ningpawt Ninghpang 1:1

Nawku ging ai wa; n-gun atsam kaba ai wa re. Hebre ga si ʼElo·himʹ gaw, malaw masa hti hkum [plural] re ai majaw, Yehowa a grau htum ai lam, arawng kaba ai lam (sh) mai kaja ai lam hpe tsun mayu ai re.

Karai ni a Karai

Tara Jahprang 10:17

Masha nkau mi nawku ai “hpa akyu n rawng ai karai ni” hte shai nna, grau kaba htum ai Karai Kasang re.​—⁠Esaia 2:8, NW.

Grau Htum Ai Sharin Ya Ai Madu

Esaia 30:20, 21, JCLB

Sharin ya ai lam ni hte lam matsun ni gaw akyu jaw ai.​—⁠Esaia 48:17, 18.

Hpan Wa Ningsang

Shakawn Kungdawn 149:2

Nga yawng nga pra hte hpe hpan tawn da ai.​—⁠Shingran 4:​11.

A rawng ai Karai Kasang

1 Timohti 1:​11

Kabu gara ai Karai Kasang re.​—⁠Shakawn 104:31.

Akyu hpyi ai ga madat mara ai wa

Shakawn Kungdawn 65:2

Shi hpe kamsham ai myit hte hpyi ai langai hpra a akyu hpyi ai ga hpe madat ya ai.

Ngai Rai Nga Nngai Hte Maren Ngai Wa Rai Nga Nngai

Pru Mat Wa 3:​14

Shi a yaw shada lam hpring tsup wa na matu, ra mara yawng byin wa lu ai. Dai hpe ndai hku nna mung ga gale ai: “Ngai sharawng awng ai lam yawng byin wa na” (sh) “Ngai Gaw Ngai Nan Re” ngu nna mung ga gale ai. Dai gaw hpang na daw kaji ni hta lawm ai Karai Kasang a amying ningsang Yehowa a lachyum re.​—⁠Pru Mat 3:​15.

N Hkam Sharang Lu Ai Karai

Pru Mat 34:14, Kabu Gara Shiga

Nawku dawjau lam hte seng nna “shingjawng kashun ai hpe n hkam sharang lu” ai. Shi langai hpe sha nawku dawjau na matu hpyi shawn ai Karai Kasang re.​—⁠Kabu Gara Shiga Chyum Laika

Ju Majat Prat Janat Na Hkawhkam Wa

Shingran 15:3

Shi a uphkang lam gaw ningpawt hte jahtum n nga ai.

Madu

Shakawn Kungdawn 135:5

Madu ai wa (sh) uphkang ai wa re. Hebre ga si gaw ʼA·dhohnʹ hte ʼAdho·nimʹ re.

Zaw Nawng Zaw Wa Up Ai

Esaia 1:9, Chyoi Pra Ai; Roma 9:​29, Mungkan Nnan Ga Gale

Lamu kasa dap a agyi re. “Zaw Nawng Zaw Wa Up Aingu ai arawng sadang a amying hpe “Daru magam atsam rawng ai Karai Kasang” ngu nna mung shaga mai ai.​—⁠Roma 9:​29, Kabu Gara Shiga

Tsaw Htum Ai

Shakawn Kungdawn 47:2

Tsaw htum ai ahkang aya lu da ai.

Chyoi Pra Ai Wa

Ga Shagawp 9:​10

Kaga ni yawng hta grau nna (akyang lailen kaja nna san seng ai) chyoi pra ai wa re.

Di Bu Sama

Esaia 64:8

Ga kagam ni hpe myit ra ai hku hkrang shachyaw lu ai zawn, masha langai hpra hte amyu baw sang ni a ntsa ahkaw ahkang nga ai wa re.​—⁠Roma 9:​20, 21.

Gawng Malai Jahpu Jaw Ai Wa, Bai Mari La Ai Wa

Esaia 41:14

Yesu Hkristu a gawng malai hkungga hku nna, shinggyim masha ni hpe yubak hte si hkrung si htan kaw nna hkye hkrang la ai (sh) mari la wa ai.​—⁠Yawhan 3:​16.

Lunghkrung

Shakawn Kungdawn 18:​2, 46

Shimlum ai shingbyi shara hte hkye la ai lam.

Hkye Hkrang La Ai Wa

Esaia 45:21

Jahten ai lam shing nrai shoihpa lam ni kaw nna makawp maga ya.

Sagu Hpe Rem Ai Wa

Shakawn Kungdawn 23:1

Shi hpe nawku dawjau ai ni hpe lanu lahku ya ai.

“Tsaw Htum Ai Madu”

Ningpawt Ninghpang 15:2

Grau htum ai ahkang aya lu ai wa; Hebre ga si ʼAdho·naiʹ ngu ai re.

Tsaw Htum Ai Wa

Daniela 7:​18, 27

Tsaw htum ai uphkang madu re.

Hebre Chyum Laika Ni Hta Lawm Ai Buga Shara Ni A Amying Ni

Chyum Laika hta lawm ai shara nkau mi a amying ni hta, Karai Kasang a amying lawm ai. Dai ni hpe Karai Kasang a kaga amying ni hku nna shaga mai na n re.

Buga shara amying

Lakap

Lachyum

Yehowa Yira

Ningpawt Ninghpang 22:13, 14

‘Yehowa Mazing Da Ya Na Ra Ai.’

Yehowa nisi

Pru Mat 17:15

“Yehowa Gaw Nye A Awng Padang” (sh) “nye a shingbyi shara” re. Yehowa a masha ni gaw karum shingtau hte makawp maga hkrum na matu, shi hpang de sa wa ra ai.​—⁠Pru Mat 17:13-​16.

Yehowa-shalom

Tara Agyi 6:​23, 24

“Yehowa Gaw Simsa Ai Lam.”

Karai Kasang a Amying hpe chye ra, akyu jashawn ra ai lam

  • Shi a amying gaw ahkyak ai nga nna sawn la ai majaw, Chyum Laika hta hkying hku law hkra bang da ai.​—⁠Malahki 1:​11.

  • Karai Kasang a Kasha Yesu gaw, Karai Kasang a amying ningsang hpe kahtap htap ahkyak shatai tsun dan wa ai. Ga shadawn, Yesu gaw Yehowa kaw akyu hpyi ai shaloi, “Na a amying nsang chyoi pra nga lit ga” ngu nna hpyi wa ai.​—⁠Mahte 6:9; Yawhan 17:6.

  • Karai Kasang Yehowa hte jinghku hku lu hkra, shi a amying hpe chye hkra shawng galaw nna, dai amying hpe akyu jashawn ra ai. (Shakawn 9:​10; Malahki 3:​16) Karai Kasang hte hku hkau ai ni, akyu lu na lam hpe ndai hku ga sadi jaw da ai: “Ngai hta shi kanan nang nga ai majaw, Ngai shi hpe mawai Ia na we ai; Nye a amying hpe chye nga ai majaw, Ngai shi hpe makawp maga na we ai.”​—⁠Shakawn 91:14.

  • Chyum Laika machye machyang: “Sumsing lamu hte ginding aga ntsa e, Hpara ngu ai ni nga shajang ma ai rai nna, Hpara law law hte madu law law rai nga ma ai.” (1 Korinhtu 8:​5, 6) Raitim, langai sha hte teng man ai Karai Kasang a amying ningsang gaw Yehowa re ai lam, Chyum Laika hta asan sha tsun dan da ai.​—⁠Shakawn 83:17.

^ စာပိုဒ်၊ 3 Hebre hpaji du nkau mi gaw, Karai Kasang a amying hpe “Yawe” ngu nna shaga ai hpe grai sharawng ma ai.

^ စာပိုဒ်၊ 3 Karai Kasang a amying kadun dawk “Ya” gaw, madung Hebre Chyum Laika ni hta 50 lang daram lawm ai. “Haleluya” ngu nna mung lang ma ai. Lachyum gaw “Yehowa hpe shakawn kungdawn mu” ngu ai re.​—⁠Shingran 19:1