Content de lai

Karai Kasang Hta Amying Nga Ai Kun?

Karai Kasang Hta Amying Nga Ai Kun?

Chyum Laika Mahtai

Masha yawng hta amying nga ai. Karai Kasang hta mung amying nga ai ngu ai gaw htap htuk ai lam re. Masha shada da hku hkau na matu amying chye ra nna, dai amying hpe shaga na matu ahkyak ai. Karai Kasang hte hku hkau na matu mung dai zawn sha rai ging ai.

Chyum Laika hta Karai Kasang ndai hku tsun da ai: “Ngai gaw Yehowa rai nga nngai; dai nye a amying shingteng rai nga ai.” (Esaia 42:8) Karai Kasang hta “Chyahtum Chyalai N-gun Rawng Ai Karai,” “Hpan Da Madu” hte “Ninggawn Tawa Uphkang Madu” ngu ai arawng sadang amying ni grai law hkra nga tim, shi a amying shingteng hpe shaga na matu saw shaga ai hku nna shi hpe nawku ai ni hpe shagrau da ai.​—⁠Ningpawt 17:1; Kasa 4:24; 1 Petru 4:19.

Ga gale Chyum Laika law law a Pru Mat 6:3 hta Yehowa ngu ai Karai Kasang a amying ningsang lawm ai. Dai Chyum daw hta ndai hku tsun da ai: “Ngai gaw Abraham, Isak, Yaku hte kaw Chyahtum chyalai n-gun rawng ai, ngu ai Karai Kasang mying hte dan pru nngai, rai ti mung, nye a mying ningsang Yehowa re ai gaw shanhte n chye ma ai.

Karai Kasang a amying hpe Jinghpaw hku Yehowa nga nna ga gale wa ai gaw, shaning latsa jan sai. Chyum hpaji du ni gaw, “Yawe” nga nna shaga ai hpe grau ra sharawng tim, Yehowa ngu ai amying hpe masha law malawng chye nga sai. Chyum Laika a shawng nnan na Laika ni hpe ka wa ai gaw Jinghpaw ga hku n re. Hebre ga hku re. Dai Hebre ga gaw, hkra maga kaw nna, pai maga de hti ra ai. Dai amyu ga hta, Karai Kasang a amying hpe יהוה ngu ai gasi mali hte mu lu ai. Dai Hebre ga si mali hpe, Tetragrammaton ngu chye da nna YHWH ngu ga gale mai ai.