Content de lai

Yesu Hte Seng Ai Labau Hpe Galoi Ka Wa Ai Kun?

Yesu Hte Seng Ai Labau Hpe Galoi Ka Wa Ai Kun?

Chyum Laika Mahtai

Kasa Yawhan gaw, shi ka da ai Yesu a aprat labau hte seng nna ndai hku ka wa ai: “Dai lam mu ai wa gaw sakse hkam wu ai rai nna, shi a sakse gaw teng man lu ai: nanhte mung kam sham lu myit ga, teng man ai ga shi tsun nga ai gaw, shi dai chye nga ai.”​—⁠Yawhan 19:35.

Mahte, Marku, Luka hte Yawhan ni ka ai Kabu Gara Shiga Chyum Laika labau ni hpe kam ging ai lam langai gaw, mabyin ni hpe myi hte nan chyaw mu da ai ni law law asak hkrung nga ai aten hta ka wa ai majaw re. Madi madun lam nkau mi hpe yu yang, Mahte Laika hpe Hkristu si ai hpang 8 ning na ai aten, A.D. 41 hta ka wa ai hpe chye lu ai. Dai hta hpang hkrat nna she ka wa ai ngu nna Chyum Laika hpaji du ni tsun tim Hkristan Greek Chyum ni yawng hpe, tsa ban langai aten laman hta ka wa ai re ngu nna masha law law myit hkrum ma ai.

Yesu mungkan ga ntsa asak hkrung ai laman, shi hpe mu ga ai ni, shi si ai hpe mu ga ai ni hte hkrung rawt mat ai hpe mu wa ai ni gaw, Kabu Gara Chyum Laika labau ni jaw n jaw hpe, jep lu wa ma ai. N jaw ai lam lawm yang, shanhte tsun wa na re. Dakkasu na madang tsaw dik ai sara F. F. Bruce ndai hku tsun wa ai: “Yesu a sape ni hkaw tsun ai shaloi kaja ai atsam langai gaw, madat nga ai ni chye da ai lam ni hpe tsun dan ai re. Ndai lam ni hpe anhte sakse hkam ai ngu tsun ai sha n-ga, ‘Nanhte chye nga myit dai’ nga nna tsun wa ai (Kasa 2:22).