Chyum Laika mahtai

Hara Magedon majan ngu ai gaw, masha asuya ni hte Karai Kasang gasat na majan hpe tsun mayu ai re. Shinggyim asuya ni hte shanhte hpe madi shadaw ai ni gaw, Karai Kasang a uphkang ai lam hpe nyet kau nna, Karai hpe ninghkap nga ai. (Shakawn 2:2) Hara Magedon majan hta, masha uphkang ai lam yawng htum mat na re.​—⁠Daniela 2:44.

“Hara Magedon” ngu ai ga si hpe, Shingran 16:16 hta sha mu lu ai. “Mungkan ting na hkawhkam ni” hpe, “Chyahtum chyalai n-gun rawng ai Karai Kasang a nhtoi kaba shani na majan gasat na matu” “Hebre ga hte Hara Magedon ngu ai shara de jahpawng” da na re.​—⁠Shingran 16:14.

Hara Magedon hta kadai gasat na kun? Karai Kasang a hpyen ni hpe gasat na matu sumsing lamu hpyen dap hpe Yesu Hkristu woi awn na re. (Shingran 19:11-16, 19-21) Dai hpyen ni hta, Karai Kasang a ahkang aya hpe ninghkap ai ni hte Karai Kasang hpe nkaw nlaw di ai ni lawm ai.​—⁠Ezekela 39:7.

Hara Magedon majan gaw Sinpraw Ka-ang Mung hta gasat na kun? N re. Shara mi hta sha byin na n re. Mungkan ting hta byin na re.​—⁠Yeremia 25:32-34; Ezekela 39:17-20.

Hara Magedon ngu ai gaw “Megido Bum” nga nna lachyum nga ai. Megido mare gaw moi Israela mungdan a mare byin ga ai. Megido makau grup-yin hta majan ni byin ga ai ngu labau hta tsun da ai. Chyum Laika hta tsun da ai majan nkau mi mung, dai mare hta byin ga ai. (Tara Agyi 5:19, 20; 2 Hkawhkam 9:27; 23:29) Raitim, Hara Magedon majan gaw moi na Megido mare makau hta byin na n re. Dai mare hta, grai kaba ai bum n nga ai. Karai Kasang hpe gasat na ni yawng hpawng na nga yang, bum hta n-ga Yezrela pa layang du hkra pyi shara shang na n re. Dai majaw, Hara Magedon ngu ai gaw, mungdan ni yawng Karai Kasang uphkang ai hpe ninghkap na matu, hpawng chyawm ai masa hpe tsun ai re.

Hara Magedon majan hta hpa ni byin na kun? Karai Kasang gaw, shi a atsam hpe gara hku akyu jashawn mat na hpe anhte n chye ga ai. Raitim, moi na aten hta akyu jashawn wa ai laknak ni hpe Hara Magedon hta ra ang ai hku akyu jashawn na mai byin ai. Karai Kasang a laknak ni hta, sin marang htu ai, nnang nawn ai, hka sha-u ing ai, kan wan htu ai, mu achye ai hte ana zinli law htam ai ni lawm ai. (Yoba 38:22, 23; Ezekela 38:19, 22; Habaku 3:10, 11; Zehkaria 14:12) Karai Kasang a hpyen nkau mi gaw, shada da sat hkat na re. Raitim, shanhte hpe gasat nga ai wa gaw Yehowa rai nga ai lam hpang jahtum hta shanhte chye mat na re.​—⁠Ezekela 38:21, 23; Zehkaria 14:13.

Hara Magedon majan a majaw mungkan ga gaw htenza mat na kun? Htenza mat na n re. Hpa majaw nga yang, mungkan ga hpe shinggyim masha ni htani htana shanu nga na matu hpan da ai majaw re. (Shakawn 37:29; 96:10; Hpaji 1:4) Hara Magedon majan a majaw, shinggyim masha yawng si mat na n re. Karai Kasang a mayam ni re ai masha “wunawng wuwa kaba” gaw ru tsang kaba hpe tawt lai nna asak hkrung na re.​—⁠Shingran 7:9, 14; Shakawn 37:34.

Chyum Laika hta lawm ai “mungkan” ngu ai ga si gaw, ginding aga ngu ai lachyum nga ai. Raitim, kalang lang Karai Kasang hpe ninghkap ai nhkru ai shinggyim masha ni hpe mung tsun mayu ai. (1 Yawhan 2:15-17) Nhkru ai masha ni hpe yeng seng kau ai hku nna, Hara Magedon majan hta, ‘mungkan ga htum’ mat na re.​—⁠Mahte 24:3.

Gara aten hta Hara Magedon majan byin na kun? “Ru tsang kaba” a jahtum re ai Hara Magedon majan hte seng nna Yesu ndai hku tsun wa ai: “Dai shani hte ahkying hpe chyawm gaw kadai mung n chye lu ai: lamu kasa ni hte Kasha pyi, dai hpe n chye lu ai; Wa hkrai sha dai hpe chye lu ai.” (Mahte 24:21, 36) 1914 ning kaw nna myi hte n mu lu ai lam hku Yesu du wa ai hpang, aten langai ngai hta Hara Magedon majan byin wa na ngu Chyum Laika hta tsun da ai.​—⁠Mahte 24:37-39.