Content de lai

Chyum Laika Hpe Chye Na Na Matu Hpa Galaw Ra Ai Kun?

Chyum Laika Hpe Chye Na Na Matu Hpa Galaw Ra Ai Kun?

Chyum Laika Mahtai

Chye na na matu galaw ra ai lam ni hpe Chyum Laika kaw sha sanglang da ya ai. Na a masa gaw gara hku raitim, Chyum Laika hta lawm ai Karai Kasang a shiga gaw, “nang n hkan lu hkra yak ai n rai, nang hte tsan la ai mung n rai” nga nna Chyum Laika hta ka da ai.​—⁠Tara Jahprang 30:11.

Chyum Laika Hpe Chye Na Lu Hkra Karum Ya Ai Lam Ni

  1. Myit madung hte rai ra ai. Chyum Laika hpe Karai Kasang a mungga hku nna hkap la u. Karai Kasang gaw gumrawng ai hpe ningdang ai majaw myit shagrit shanem ra ai. (1 Htesaloni 2:13; Yaku 4:6) Madi madun lam hpe n mu ai sha, myi pat nna kam sham ai baw hkum galaw. Karai Kasang gaw “chye ginhka lu ai myit” hpe akyu jashawn shangun mayu ai.​—⁠Roma 12:1, 2.

  2. Nyan hpaji lu na matu akyu hpyi u. Na a chye chyang ai nyan hta hkum shamyet shanat nga u” nga nna Ga Shagawp 3:5 hta tsun da ai. Tinang a nyan hpe shamyet shanat na malai, Chyum Laika hpe chye na lu ai nyan hpaji lu na matu, ‘Karai Kasang kaw matut nna hpyi’ ra ai.​—⁠Yaku 1:5.

  3. Ayan hkaja u. Tinang kam ai shaloi she Chyum Laika hkaja ai baw n re ai sha, ayan hkaja na nga yang grau akyu nga na re.​—⁠Yawshu 1:8.

  4. Gin lam hku hkan nna hkaja mai ai. Gin lam langai ngai hpe lata nna dai hte seng ai Chyum Laika lam hpe sha, ahkri ahkrai hkaja na nga yang, Chyum Laika hpe chye na lu na matu karum ya na re. Madung lam ni re ai “ga kanu” hpe shawng hkaja u. Dai hpang she, lachyum sung ai ni hpe kahtap hkaja ai hku nna “kunghpan ai sharin shaga ai lam de lahkam sa” wa lu na re. (Hebre 6:1, 2, JCLB) Chyum daw langai hte langai hpe shingdaw nna hkaja mai ai. ‘Chye na yak ai lam’ ni rai yang pyi, Chyum daw ni hpe langai hte langai shingdaw dat yang, dan leng wa ai hpe nang mu lu na re.​—⁠2 Petru 3:16.

  5. Kaga masha ni karum ya ai hpe hkap la u. Chyum Laika hpe chye na ai kaga masha ni a karum shingtau lam hpe hkap la na matu, Chyum Laika hta n-gun jaw da ai. (Kasa 8:30, 31) Yehowa Sakse ni gaw Chyum Laika hkaja mayu ai ni hpe manu jahpu n la ai sha karum ya nga ai. Shanhte ni gaw shawng nnan na hkristan ni zawn, Chyum Laika lachyum ni hpe chye na na matu, Chyum daw ni hpe akyu jashawn nna kaga ni hpe karum ya ai.​—⁠Kasa 17:2, 3.

Chyum Laika chye na na matu lawu na lam ni nga n ra ai

  1. Zai byeng-ya shing nrai madang tsaw hpaji. Chyum Laika hpe atsawm chye na nna kaga masha ni hpe sharin achyin ya ai kasa 12 gaw “laika n chye ai, yu maya masha” ni sha rai ma ai.​—⁠Kasa 4:13.

  2. Gumhpraw. Chyum Laika hpe manu jahpu n jaw ra ai sha hkaja mai ai. Yesu gaw shi sape ni hpe ndai hku tsun wa ai: “jahpu n ya ai sha nanhte lu la mu ai rai nna, jahpu n hpyi ai she jaw ya mu.”​—⁠Mahte 10:8.