“Myeḥmalet gar-awen mliḥ, axaṭer ‘leḥmala tţesseṛ aṭas n ddnubat.’”1 Buṭrus 4:8

M’ara tebdum kečč ţ-ţmeṭṭut-ik tamεict-nwen jmiε, a d-ţbanen wuguren. Ţlalen-d ahat wuguren-agi imi yemxallaf wamek i teţxemmimem, wamek i teţḥussum d wamek i teţwalim ddunit. Yezmer lḥal daɣen ţ-ţiswiεin iɣef ur tebnim ara i d ssebba neɣ d ayen nniḍen.

Ahat aţ-ţebɣum aţ-ţeffrem iqerra-nwen ɣef iɣeblan m’ara d-ḍrun, acu kan Adlis Iqedsen yeţweṣṣi-yaɣ a ten-nqabel. (Matta 5:23, 24) Ma yella teṭṭebbiqem imenzayen n Wedlis Iqedsen, a d-tafem tifrat (lḥel) ifazen i iɣeblan-nwen.

 1 HEDṚET ΓEF WUGUR-NWEN

AYEN I D-IQQAR WEDLIS IQEDSEN: “Illa [...] lweqt i lhedṛa.” (Amusnaw 3:1, 7) Σzel-ed lweqt akken aţ-ţhedṛeḍ ţ-ţmeṭṭut-ik ɣef wugur i d-temmugrem. Ini-yas εinani ayen i teţḥussuḍ d wayen i teţxemmimeḍ ɣef wugur-agi. Heddeṛ-as dima tideţ. (Ifasusiyen 4:25) Γas akken yewεeṛ aţ-ţeṭṭfeḍ deg yiman-ik, ḥader iwakken ur tessaεlayeḍ ara ṣṣut-ik. Leǧwab s ṣṣut ḥlawen yezmer ad yeqḍeε i lhedṛa tamecṭuḥt aţ-ţuɣal d amennuɣ ameqran.—Lemtul 15:4; 26:20.

Γas ur k-yeεǧib ara ṛṛay n tmeṭṭut-ik, ili-k d aḥnin; beggen-as-d belli tḥemmleḍ-ţ yerna teţqadareḍ-ţ. (Ikulusiyen 4:6) Xdem lmeǧhud-ik akken a d-tafeḍ s lemɣawla tifrat i wugur-nwen yerna ur ţţemɣunzut ara.—Ifasusiyen 4:26.

AYEN I TZEMREḌ AŢ-ŢXEDMEḌ:

  • Xtiṛ lweqt iwulmen akken aţ-ţhedṛeḍ ţ-ţmeṭṭut-ik ɣef wugur-nwen

  • M’ara tili d nnuba-k aţ-ţefkeḍ tameẓẓuɣt i tmeṭṭut-ik, ur s-gezzem ara awal. Tzemreḍ a d-thedṛeḍ umbeεd

 2 ḤESSET TFEHMEM

AYEN I D-IQQAR WEDLIS IQEDSEN: “Iḥninet gar-awen; di leqder, wa ad iţεuzzu wa.” (Iṛumaniyen 12:10) Yesεa mliḥ azal wamek i teţḥessiseḍ. Nadi aţ-ţfehmeḍ s leḥnana akk-d wannuz ṛṛay i-d-tefka tmeṭṭut-ik. (1 Buṭrus 3:8; Yeεqub 1:19) Ur steεmil ara la teţḥessiseḍ. Ma yella wamek, ḥbes ayen i la txeddmeḍ akken aţ-ţḥesseḍ mliḥ i tmeṭṭut-ik, neɣ m’ulac ḍleb-as ma maεlic aţ-ţhedṛem ɣef wayenni mbeεd. Ma yella tḥesbeḍ-ţ am wakken ţ-ţarfiqt-ik mačči ţ-ţaxṣimt-ik, ur tţeččḥeḍ ara bihfih.—Amusnaw 7:9.

AYEN I TZEMREḌ AŢ-ŢXEDMEḌ:

  • Γas m’ur k-yeεǧib ara wayen iwumi i tselleḍ, ţḥessis s nneyya-k

  • Nadi aţ-ţfehmeḍ acu i tebɣa a d-tini tmeṭṭut-ik. Ţţarra ddehn-ik ɣer ṣṣut n taɣect-is d wayen i d-iţbeggin wudem-is akk-d lǧeţţa-s meṛṛa

3 XEDMET AYEN ILAQEN

AYEN I D-IQQAR WEDLIS IQEDSEN: “Mkul leεtab, deg-s nnfeε; lketṛa n wawal tessawal i laẓ.” (Lemtul 14:23) Ur ilaq ara kan aţ-ţemsefhamem s wawal ɣef kra n tifrat, yelzem daɣen aţ-ţṭebbqem leqrar i teṭṭfem lwaḥid. Annect-a yeṭṭalab-ed tikwal aṭas n lmeǧhud, meεna d ayen iwulmen. (Lemtul 10:4) Ma yella temεawanem, ‘a d-tesfaydim akteṛ si leεtab-nwen.’—Amusnaw 4:9.

AYEN I TZEMREḌ AŢ-ŢXEDMEḌ:

  • Qesdet jmiε kečč ţ-ţmeṭṭut-ik ɣef wayen ara yexdem mkul yiwen deg-wen bac aţ-ţefrum ugur-nwen

  • Si teswiεt ɣer tayeḍ, ţnadit aţ-ţeẓrem s anda i tewwḍem deg wayen yeεnan leqsed-agi-nwen